• Өнөөдөр 2026-03-31

Вакцин авчирсан нь БААТАР болох гээд Х.Баттулга, У.Хүрэлсүх хоёр уралдаж гүйлдээд...

2020-12-03,   1503

-МОНГОЛД КОРОНАВИРУСИЙН ВАКЦИН ОРУУЛЖ ИРСЭН ХЭНБУГАЙ Ч АРДЫН БААТАР БОЛЖ, ИРЭХ ОНД ШУУД ЕРӨНХИЙЛӨГЧ БОЛНО ГЭЖ ДЭЭГҮҮРЭЭ “МӨРИЙЦЧИХСӨН" ЮМ БИШ БИЗ-

         Сүүлийн хоёр хоног хэн хүнгүй л коронавирусийн эсрэг вакцин оруулж ирэхээр ханцуй шамлаад эхэллээ. Эсвэл “Коронавирусийн эсрэг вакциныг хэн түрүүлж Монголд оруулж ирэх вэ” гэдэг нэр алдрын төлөөх уралдаан эхэллээ гэвэл онох ч юм уу. Одоогоор Ерөнхийлөгч Х.Баттулга өнгөнд, түүний араас Ерөнхий сайд У.Хүрэлсүхийн сойж буй Сангийн сайд Ч.Хүрэлбаатар зуузай холбож явна. Харин айргийн гуравт Ардчилсан намын угшилтай, УИХ-ын гишүүн асан, “Монос”-ын Л.Эрдэнэчимэг нэхэж явна. 
Эл уралдаанд оролцогчдын хэн хэн нь Англи-Шведийн хамтарсан “Астразенека” эмийн үйлдвэрийн боловсруулж буй “AZD1222” вакциныг оруулж ирэхээр дор бүрнээ яриа хэлцэл хийж байгаа гэх. 
     Тухайлбал, Монгол Улсын Ерөнхийлөгч Х.Баттулга ““Астразенека” компанийн удирдлагуудтай цахимаар холбогдож, 70 хувийн үр дүнтэй байгаа “AZD1222” вакциныг нь авах сонирхолтой байгаагаа илэрхийллээ” хэмээн их л баяртайгаар цахим хаягтаа нийтэлжээ. Улмаар тус компани Х.Баттулгын саналыг уриалгахан хүлээн авч, вакцинаа худалдаанд гаргамагцаа эхний ээлжинд Монгол Улсад өгөхөөр болсон гэнэ. 
 
           Түүнчлэн, Сангийн сайд Ч.Хүрэлбаатар мөн л “Ерөнхий сайдын захирамжаар байгуулагдсан коронавирусийн вакцины ажлын хэсэг “Астразенека” компанитай цахимаар хуралдаж, яриа хэлцэл хийлээ” хэмээн цахим хаягтаа нийтэлсэн байна. 
 
          Мөн УИХ-ын гишүүн асан, “Монос”группын захирал Л.Эрдэнэчимэг “Монос нь Английн “Астразенека” эмийн үйлдвэрийн Монгол дахь төлөөлөгч юм. Тэдний хийсэн ковидын вакцин хамгийн хямд бөгөөд хадгалах нөхцөл энгийн. Манайхыг захиалгаа өг гэв. Бид Монголын нэрийн өмнөөс захиалгыг өгөх ёстой болоод байдаг” хэмээн цахим хаягаараа мэдэгджээ. 

КОРОНАВИРУСИЙН ЭСРЭГ ВАКЦИНЫГ “АРДЫН БААТАР” БОЛОХ ХЭРЭГСЭЛ БОЛГОХ ГЭЭД БАЙНА УУ

       Гайхаад байх юм. Яг хэн нь коронавирусийн вакцин худалдаж авах ажлыг гардан гүйцэтгэх эрхтэй юм бэ. Хэн нь Монгол Улсын 3.5 сая иргэний эрүүл мэндийн асуудалд толгой мэдэн шийдвэр гаргах эрх мэдэлтэй юм бэ. “Астразенека” компанитай Ерөнхийлөгч, Засгийн газар, Үндэсний эмийн үйлдвэр нь ээлж дараалан, тус тусдаа холбогдоод, яриа хэлцэл хийгээд байгааг нь харахаар вакцин оруулж ирж, ард түмнийг халдвараас хамгаалах гээд байгаа агуу үйл хэрэг огт биш, харин вакцин анх оруулж ирсэн алдар нэр зүүж, ардын баатар болох гэсэн шунал л харагдаад байна. 
 
      Түүнчлэн дэлхий нийтийг айлгаж байгаа коронавирусийг дарах, халдвар авахгүй дархлаатай болгох вакцин оруулж ирэх асуудал бол ашиг хүртэх гэсэн, алдар нэр олох гэсэн атгаг шуналаас ангид байх ёстой асуудал. Бүр цаашилбал, үндэсний аюулгүй байдлыг сахин хамгаалах нэн чухал, магад нууцлалын зэрэгт хийгдэх ёстой хариуцлагатайгаас хариуцлагатай ажил баймаар. Гэтэл бүхэл бүтэн улсыг төлөөлж, сайн судлаагүй компанитайгаа цахимаар холбогдоод, олон нийтэд “Бусад улсаас түрүүлж авахаар тохирчихлоо” гэж сайрхах энэ эмзэг цаг үед хэр тохиромжтой вэ. 

“АСТРАЗЕНЕКА” КОМПАНИЙН ВАКЦИНЫГ БУСДААСАА ХЯМД БОЛОХООР НЬ СОНГОСОН ЮМ БИШ БИЗ

         “Астразенека” компанитай ээлж дараалан холбогдоод байгаа Ерөнхийлөгч, Засгийн газар, “Монос” групп оруулж ирэх гээд байгаа вакцинаа сайн судалж чадсан, амжсан юм болов уу. Ямар үр дүн харгалзаж сонгосон бэ. Монгол Улсын 3.5 сая иргэн цусандаа ямар эрсдэлтэй, ямар үйлчилгээтэй вакцин шахуулах гээд байгаагаа мэдэх бүрэн эрхтэй. Дэлхий нийтэд 10 гаруй төрлийн вакцин боловсруулагдаж байна. Хамгийн амжилттай яваа нь АНУ-ын “Модерна”, Германы “Пфизер”, ОХУ-ын “Спутник-V”, манай улсын оруулж ирэх гээд байгаа Англи-Шведийн хамтарсан “Астразенека” буюу “AZD1222” вакцин. 
 
Тухайлбал, Модерна 95 хувь, Спутник-V 92 хувь, Пфизер 90 хувь, Астразенека 70 хувь хамгаална гэсэн судалгааг тус бүрдээ танилцуулаад буй. Тэд бүгд эмнэлзүйн зөвшөөрлөө хүлээж байгаа. 
 
Манай улсын гэрээ хэлцэл хийх гэж буй “Астразенека” компанийн боловсруулж буй вакциныг олон улсад Вектор вакцин ч гэж нэрлэдэг. Энэ нь нийтлэг ханиадны вирусийн эсрэг ашигладаг аденовирусийн уургийг коронавирусийн эс рүү оруулах үүрэгтэй. Аденавирус нь шимпанзед халдварладаг боловч хүнд үйлчилдэггүй. Ингэснээр бидний биед вирус дахин үржихгүйгээр генетик түвшинд инженерчлэгддэг. Энэхүү вакциныг хийхэд хямд өртөгтэй бөгөөд хөргөгчний хэмд зургаан сар хадгалах боломжтой. 
Товчхондоо, энэ вакцин нь хямд үнэтэй, хадгалахад хялбар гэдгээрээ бусад вакцинаас ялгарч байгаа. Тэгэхээр манай улс зөвхөн хямд үнэтэй гэдгээр нь “Астразенека”компанийн вакциныг оруулж ирэх гээд байгаа юм биш биз. 
    Түүнчлэн вирус судлалаар тэргүүлэгч олон улсын эрдэмтэд вакцин сонгох гэж байгаа улс орнуудад хэд хэдэн зөвлөгөө өгч байгаа. Тухайлбал, Нэгдүгээрт, цаг хугацааны явцад вирус хувирч байдаг. Гэтэл өнөөдөр захиалсан вакцин жилийн дараа ч ирж магадгүй. Энэ хугацаанд вирус мутацид орсноор вакцин үйлчлэхгүй байх магадлалтайг анхаарах ёстой. Хоёрдугаарт, бүс нутаг, тухайн үндэстний биеийн онцлогоос шалтгаалж вирусийн генийн дараалал өөр өөр байх тохиолдол өөр өөр байдаг. Тиймээс 90 хувийн үр дүнтэй гэж туршигдсан вакцин өөр үндэстний хүмүүс дээр 60 хувийн үр дүнтэй байх ч тохиолдол байдаг аж. 
 
    Эндээс харвал, “Вакцин авахаар боллоо” гэж зарлахаасаа өмнө тухайн вакцин манай улсын иргэдэд үр дүн үзүүлж чадах уу, халдвараас хэдэн хувь хамгаалах вэ, сөрөг нөлөөлөл нь юу байх вэ гэх мэт баттай судалгаа, шинжилгээ хийж, түүнээс хамаарч аль улсын, ямар вакцин авах вэ гэдгээ сонгох нь зөв баймаар. 

ТӨГСГӨЛИЙН ОРОНД

       Коронавирусийн эсрэг тэмцэх ажилд нэгдмэл бодлого сох дутагдаж байна. Нэгдмэл бодлогоос гадна хэтэрхий бэлтгэлгүй, зохион байгуулалтгүй, хэтэрхий олон толгойтой явж ирсэн нь зөвхөн вакцин худалдаж авах асуудал дээрээс ил болж байна. Жишээлбэл, өнгөрсөн наймдугаар сард Шадар сайд Я.Содбаатар “Хоёр хөрш нэг нэг вакцин хийж байгаа. Бид авах хүсэлт явуулсан байгаа” хэмээн мэдэгдэж байсан. Гэтэл одоо тэс өөр улсаас вакцин авах асуудал яриад сууж байна. Мөн тэр үед Гадаад харилцааны сайд Н.Энхтайван “Вакцин авахад зориулж, 7.8 тэрбум төгрөг төсөвлөсөн” хэмээн мэдэгдэж байсан. Гэтэл одоо ирэх оны төсөвтөө вакцин авах мөнгө суулгаагүй хэмээн шүүмжлүүлж сууна.

Одоо Ерөнхий сайд У.Хүрэлсүх, УИХ-ын дарга Г.Занданшатар, Шадар сайд Я.Содбаатар бүр цаашлаад хотын мээр Д.Сумъяабазар, ХӨСҮТ-ийн Ерөнхий захирал  Д.Нямхүү тэргүүтэй хүмүүс “Астразенека” компанитай биечлэн холбогдох дутуу байх шиг. Эрх биш тэгэхгүй байлгүй дээ.

       Ер нь Монголд коронавирусийн вакцин оруулж ирсэн хэнбугай ч ард түмний баатар болж, ирэх онд шууд Ерөнхийлөгч болно гэж дээгүүрээ “мөрийцчихөөд" сууж байгаа юм биш биз. Ард түмнийг аюулт тахлаас аврах, сэргийлэх нь чухал бус, албан тушаал, алдар нэрийг юугаар ч хамаагүй олж авах нь чухал байдгийн баталгааг манай томчууд зохиогүй цагтаа бэлхнээ харуулж суугаа нь эмгэнэл. 

Вакцин авчирсан нь БААТАР болох гээд Х.Баттулга, У.Хүрэлсүх хоёр уралдаж гүйлдээд...
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188
[email protected]
2026 © Зохиогчийн эрх хуулиар хамгаалагдсан. Мэдээлэл хуулбарлах хориотой.