Эргэлт.мн мэдээллийн сайт долоо хоног бүр манай улсын төр, нийгэм, эдийн засаг, соёл урлагийн салбарт болон дэлхий дахинд болж өнгөрсөн онцлох үйл явдлыг тоймлон хүргэдэг билээ. Өнгөрөгч долоо хоногт Хууль зүй, дотоод хэргийн сайд Х.Нямбаатар Замын-Үүд суманд ажиллаж, "Авлигын мафи"-ийнхныг баривчиллаа, тэдний орны хүмүүсийг томиллоо, Ардын хувьсгалын 100 жилийн ойг тохиолдуулан баталсан Өршөөл үзүүлэх тухай хууль хэрэгжиж эхэллээ, улс даяар цахилгаан тасарлаа зэрэг дуулиан шуугиантай үйл явдлууд өрнөснийг тоймлож байна. 

Х.НЯМБААТАР: Засгийн газар "Замын-Үүдийн МАФИ"-тай тэмцэнэ

            Хууль зүй, дотоод хэргийн сайд Х.Нямбаатар Замын-Үүд суманд ажиллаж, төрийн байгууллагын нэр бүхий дарга нарыг баривчилж, орных нь хүмүүсийг тэр дор нь томилсон нь өнгөрөгч долоо хоногийн хамгийн дуулиантай онцлох үйл явдал байлаа.

"Замын-Үүдийн боомтод төрийн байгууллагын дарга нарын авлигын сүлжээ бий болсон нь ачаа тээврийн гацаах, урт дараалал үүсгэх, улсад хохирол учруулах гол шалтгаан болж байна" гэх гомдол мэдээллүүдийн дагуу хууль хяналтын байгууллагууд тус боомтод гүйцэтгэх ажиллагаа явуулж, мэдээлэл танилцуулсны дараа Ерөнхий сайд Л.Оюун-Эрдэнэ тус боомтод ажиллаад ирсэн. Улмаар өнгөрсөн долоо хоногт ХЗДХ-ийн сайд Х.Нямбаатараар ахлуулсан ажлын хэсэг Замын-Үүдэд ажиллалаа. Ингэхдээ АТГ, ТЕГ, Эрүүгийн  цагдаагийн газар хамтран тус сумын онцгой комисс, авто тээврийн газрын дарга, Засаг дарга, түүний орлогчтой холбоотой хэрэг бүртгэлийн ажиллагааг эхлүүлж, нийт зургаан хүнийг түр саатуулан шалгахаар, цагдан хорьж шалгахаар зөвшөөрөл авч очиж, хэрэгжүүлсэн. 

• Хилийн боомтын экспорт, импортыг зохицуулах бүрэн эрхт төлөөлөгчөөр Ерөнхий сайдын зөвлөх Л.Алтангэрэлийг,
• Хилийн боомтын экспорт, импортыг зохицуулах бүрэн эрхт төлөөлөгчийн орлогчоор ЗХЖШ-ын орлогч, Бригадын генерал Ц.Жавхланбаатарыг,
• Хилийн 0108 дугаар ангийн захирагч, хурандаа Б.Нямбатыг чөлөөлж, түүний оронд З.Намхайнямбууг тус ангийн захирагчаар,
• Замын-Үүд боомт дахь Хилийн мэргэжлийн хяналтын албаны даргын үүргийг түр орлон гүйцэтгэгч С.Цогбадрахыг чөлөөлж, НМХЕГ-ын дарга Л.Эрдэнэчулууныг ажиллуулахаар,
• Замын-Үүд боомт дахь Гаалийн газрын дарга Д.Зоригоог чөлөөлж, түүний оронд НГЕГ-ын харьяа Улаанбаатар хот дахь ГЕГ-ын даргын үүргийн түр орлон гүйцэтгэгч Б.Отгонсүхийг,
• Замын-Үүд боомт дахь АТҮТ-ийн салбарын дарга А.Хатансайханыг үүрэгт ажлаас чөлөөлж, Дорноговь аймгийн АТҮТ-ийн дарга Сүхбаатарыг томилсон.

Өршөөл үзүүлэх тухай хууль хэрэгжиж эхэллээ

           Тулгар төр байгуулагдсаны 2230 жил, Их Монгол Улсын 815 жил, Ардын хувьсгалын 100 жилийн ой болон Коронавируст цар тахлын эдийн засагт үзүүлэх сөрөг нөлөөллийг буруулах зорилгоор Улсын Их Хурлын 2021 оны долдугаар сарын 03-ны өдөр баталсан “Өршөөл үзүүлэх тухай хууль” өнгөрөгч мягмар гарагаас хэрэгжиж эхэллээ.

---

 

ХЗДХ-ийн сайд Х.Нямбаатар "Энэхүү хууль нь 2017 оны 6 дугаар сарын 30-ны өдрийн 24:00 цагаас өмнө 2002 онд баталсан Эрүүгийн хууль болон 2021 оны зургадугаар сарын 24-ний өдрийн 24:00 цагаас өмнө 2015 онд баталсан Эрүүгийн хуульд заасан зарим гэмт хэрэг болон Зөрчлийн тухай хууль д заасан зарим зөрчил үйлдсэн хүн, хуулийн этгээдэд хамаарах ба өршөөлд хамруулах гэмт хэрэг, зөрчил үйлдсэн хүний хэрэг бүртгэлт, мөрдөн байцаалтын болон шүүхээр хянан хэлэлцэх шатанд байгаа хэргийг хэрэгсэхгүй болгоно. Ялаас өршөөн хэлтрүүлэхэд ялтан, эрүүгийн хэргийг хэрэгсэхгүй болгоход яллагдагч гэмт хэргийн улмаас учруулсан хохирлоо нөхөн төлсөн эсхүл нөхөн төлөхөө илэрхийлсэн байна" гэж тайлбарласан.

 

Өршөөл үзүүлэх тухай хуулиас онцлох нь: 

 

- ФАТФ-ын зөвлөмжид нийцүүлэн мөнгө угаах, терроризмыг санхүүжүүлэх, үй олноор хөнөөх зэвсэг дэлгэрүүлэх, түүнчлэн дээрх гэмт хэргийн суурь гэмт хэрэг болох татвар төлөхөөс зайлсхийх, авилга, албан тушаалын гэмт хэрэг, цахим мэдээллийн аюулгүй байдлын эсрэг зэрэг гэмт хэргийг өршөөлд хамруулахгүй.

 

- Хүний бэлгийн эрх чөлөө, халдашгүй байдлын эсрэг гэмт хэрэг, хүүхдийн эсрэг гэмт хэрэг, эдийн засгийн гэмт хэрэг, үндэсний аюулгүй байдлын эсрэг гэмт хэрэг, хүн төрөлхтний аюулгүй байдал, энх тайвны эсрэг гэмт хэргийг бүлгээр нь, хүнийг алах, галт зэвсэг хууль бусаар бэлтгэх, мансууруулах эм, сэтгэцэд нөлөөт бодис, тэдгээрийн түүхий эдийг тариалах худалдаалах, хэрэглэх, байгаль орчныг бохирдуулах зэрэг 38 төрлийн гэмт хэргийг, өмчийн эсрэг гэмт хэрэг болон мансууруулах эм, сэтгэцэд нөлөөт бодисыг хууль бусаар ашиглах, цэргийн эд хөрөнгийг санаатай устгах, гэмтээх зэрэг 19 төрлийн гэмт хэргийг хүндрүүлэх бүрэлдэхүүнийг өршөөлд хамруулахгүй.

 

- Өршөөлийн тухай хуулиар 2021 оны аравдугаар сарын 1-ний дотор Замын хөдөлгөөний аюулгүй байдлыг зөрчсөн торгуулийнхаа 50 хувийг төлбөл үлдсэнийг нь чөлөөлнө. Хуулийн төсөлд автозамын торгуулийг нэг удаа чөлөөлөхөөр тусгасан байсан хэдий ч батлахдаа дээрх өөрчлөлтийг оруулж, 50 хувийг төлсөн тохиолдолд нэг удаа өршөөлд хамруулахаар болсон юм.

 

- 2021 оны зургадугаар сарын 24-нөөс өмнө жолоодох эрхээ хасуулсан жолооч нарын эрхийг сэргээнэ.

 

Шүүхийн шийдвэр гүйцэтгэх ерөнхий газрын Хорих ял эдлүүлэх албаны хэмжээнд нийт 4100 гаруй хоригдол ял эдэлж байгаа бөгөөд эдгээр хоригдлоос: 

 

-Шууд суллагдах  буюу өршөөн хэлтрүүлэх эрэгтэй 157, эмэгтэй 3, нийт 160 хоригдол буюу 3.8 хувь;

 

-Үндсэн болон эдлээгүй үлдсэн ялаас 2 жил хасагдаж суллагдах эрэгтэй 168, эмэгтэй 16, өсвөр насны 1, нийт 184 хоригдол, нийт суллагдах 344 хоригдол буюу  8.2 хувь;

 

- 2 жил хасагдаж байгаа боловч хорих ялаа үргэлжлүүлэн эдлэх эрэгтэй 348, эмэгтэй 17, нийт 365 буюу 8.7 хувь;

 

-Тав ба түүнээс доош жилийн хорих ялаар шийтгүүлсэн хоригдлуудын хорих ялыг зорчих эрхийг хязгаарлах ялаар солих эрэгтэй 1086, эмэгтэй 41, өсвөр насны 3, нийт 1130 хоригдол буюу 27 хувь; нийт хоригдлын 44.2 хувь өршөөлийн хуульд хамрагдаж байна.

 

Эмэгтэй 213 хоригдлын 43.7 хувь өршөөлийн хуульд хамрагдаж, 56.3 хувь,  өсвөр насны 25 хоригдлын 72 хувь өршөөлийн хуульд хамрагдаж, 28 хувь нь хамрагдахааргүй байна.

 

Аймаг болон Улаанбаатар хотын дүүрэг бүрт 4-5 шүүгчийн бүрэлдэхүүнтэй комисс ажиллаж байгаа бөгөөд Баривчлах байр, Баривчлах төвд зөрчлийн тухай хуулиар баривчлах шийтгэлийг эдэлж байсан нийт баривчлагдсан этгээдүүдийг өршөөлийн хуульд хамруулан суллаад байна.

 

Эмч, эмнэлгийн ажилтнууд тэмцлийн хурц хэлбэрт шилжив

                 Эмч, эмнэлгийн ажилтнууд цалингаа хоёр дахин нэмүүлэхээр төрийн гурван өндөрлөгт шаардлага хүргүүлж, Сүхбаатарын талбайд 11 хоног суулт зарласан боловч төр шаардлагыг нь биелүүлээгүй учир өчигдөр буюу баасан гарагт тэмцлийн хурц хэлбэрт шилжиж буйгаа мэдэгдлээ.

---

Эмч, эмнэлгийн ажилтнуудаа төлөөлөн Үйлдвэрчний эвлэлийн дэд ерөнхийлөгч Б.Эрдэнэбат “Монгол Улсын 56 мянган эмч ажилчдын төлөөлөл цалингаа хоёр дахин нэмүүлэх шаардлага хүргүүлж, бодит үр дүн гарахыг хүлээж 11 дэх өдрөө төв талбайд сууж байна. Төр засгийн зүгээс олон нийтийг төөрөгдүүлж, эмч нарын цалинг нэмсэн мэт ташаа мэдээлэл гаргасаар байна. Ерөнхийлөгчид шаардлагаа удаа дараа хүргүүлсэн. Гэвч хүрсэн эсэх нь тодорхойгүй байна. Тиймээс бид өнөөдөр Ерөнхийлөгч У.Хүрэлсүхийг өөрийн биеэр гарч ирж бидний шаардлагыг хүлээн авахыг хүсч байна. Хэрэв өнөөдөр бидний шаардлагыг биечлэн хүлээж авахгүй бол цаашид бүх эмч, ажилчин ажил хаяна. Өнөөдрөөс бид тэмцлийн хурц хэлбэрт шилжиж байна” гэж мэдэгдсэн. 

 

Харин Эрүүл мэндийн ажилтнуудын үйлдвэрчний эвлэлийн дарга Х.Ариунаа “Эрүүл мэндийн 56 мянган эмч, ажилтан хоёр жилийн хугацаанд цар тахлын эсрэг тасралтгүй ажиллаж байна. Гэсэн ч халдварын тархалт буурахгүй, өдөрт 10 гаруй хүний амь нас эндэж байна. Энэ бол үндэсний аюулгүй байдалд нөлөөлж буй явдал юм. Мөн эмч, ажилтнуудын хомсдолд орж байгаа нь 3.2 сая хүн амын амь насыг хамгаалахад хүчрэхгүйд хүрч байна. Иргэдийн амь насыг аврахын тулд эмч, ажилтнууд өөрсдөө эрүүл, аюулгүй байх ёстой. Тэд бусад улс орны эмч, ажилтнуудтай харьцуулахад 100 ам.доллар ч хүрэхгүй цалин авч байна. ажилчдын хөдөлмөрийг үнэлэх ёстой. Бид нэг удаагийн тусламж, тэтгэмж хүсээгүй” хэмээсэн.

 

Тэмцлийн хурц хэлбэрт шилжсэн эмч, эмнэлгийн ажилчдын төлөөллийг Ерөнхий сайд Л.Оюун-Эрдэнэ төрийн ордонд хүлээн авч уулзсан.

---

Ерөнхий сайд Л.Оюун-Эрдэнэ “Бид өнгөрсөн нэг жилийн хугацаанд 300 орчим тэрбум төгрөгийг дархлаажуулалтад зарцуулсан. Шинжилгээнд өдөр тутамд 500 сая төгрөг зарцуулж байгаа.

 

Эрүүл мэндийн даатгал болон улсын төсөв нийлээд 735 тэрбум төгрөгийн нэмэлт санхүүжилтийг эрүүл мэндийн салбарт олгохоор болж байгаа. Эрүүл мэндийн салбарын 13 мянган ажилтанд мөнгөн хэлбэрийн урамшуулал олгохоор болсон.  Үүнд шаардлагатай 45 тэрбум төгрөгийн нэмэлт санхүүжилтийг улсын төсвөөс гаргана. Цар тахлын үеийн эм тариа бусад тоног төхөөрөмжийн санхүүжилтийг улсын төсвөөс гаргана. Мөн PCR шинжилгээнд 125 тэрбум төгрөгийг төлөвлөж байна. Нэмэлтээр 2000 орыг дэлгэхэд шаардлагатай 110 тэрбум төгрөгийг гаргах нь зүйтэй гэж үзсэн" гэж тайлбарласан.

 

Түүнчлэн “Би хөшигний ард юу болж байгааг мэдэж байгаа, Эрүүл мэндийн сайд асан хүмүүс хууль бус үйлдлээ зогсоо. Улс төр хиймээр байвал Ерөнхий сайдтай хийх хэрэгтэй. Арай ядан тогтож байгаа эрүүл мэндийн салбарынхан дээр улс төр хийж болохгүй. Цаашид ийм байдлаараа байвал нэр бүхий хүмүүсийг зарлана. Эрүүл мэндийн салбартай холбоотой улс төржилтийн асуудлыг таслан зогсоохын тулд хатуу арга хэмжээг авах болно" гэсэн нь олон нийтийн анхаарлыг татсан. 

Бригадын генерал С.Ганбатын гэрээс нь баривчиллаа

             Цагдаа болон дотоодын цэргийн байгууллагад 35 жил тасралтгүй ажиллаж, энэ жил Бригадын генерал цол хүртсэн Сийлэгийн Ганбатыг ТЕГ-аас баривчилж, гэрээс нь олон тооны галт зэвсэг, мөнгө олсон нь өнгөрөгч долоо хоногийн дуулиантай сэдвийн нэг байлаа. 

---

        Монгол Улсын Ерөнхийлөгч асан Х.Баттулгаас өнгөрсөн тавдугаар сарын 3-нд Бригадын генерал цол хүртсэн Дотоодын цэргийн штабын дарга Сийлэгийн Ганбатыг ТЕГ-аас дайчлан баривчилж, ШШГЕГ-ын харьяа Урьдчилан хорих 461 дүгээр хорих ангид цагдан хорилоо. 

 

ТЕГ-ын баривчилгааны үеэр С.Ганбатын гэрээс олон тооны галт зэвсэг, тагнах хэрэгсэл хурааж авсан бол гэрийнхээ ойролцоо 500 мянган ам.доллар нууцаар хадгалж байсныг илрүүлсэн гэх мэдээлэл бий. Энэ талаар эх сурвалжууд “Гүйцэтгэх ажиллагааны хүрээнд олж авсан мэдээллийг хууль бусаар ашиглаж, бусдыг шантаажилж ашиг олдог байсан” хэмээн онцолсон.

 

Хууль хяналтын байгууллагуудаас С.Ганбатыг ямар шалтгаанаар баривчилсан тухай албан ёсны тайлбар хийгээгүй байгаа бөгөөд хууль хяналтын байгууллага түүнийг Конторвант буюу зэвсгийн наймаатай холбоотой хэргээр шалгаж буй гэх мэдээлэл гарч байгаа юм.