Монгол Улсын хүний Гавьяат эмч, Төрийн  соёрхолт, Анагаахын шинжлэх ухааны доктор, профессор О.Сэргэлэн Ардын эмч цол хүртлээ. Тэрбээр “Өнөөдөр хүний амьдралд тэр болгон тохиолдоод байдаггүй их сайхан өдөр тохиолдож байна. Тэр тусмаа амжилтын, Нэгдүгээр төв эмнэлгийн 100 жилийн ойн өдрөө үзэж чаддаг хүн тун цөөн байх. Тийм болохоор энэ өдөр Ардын эмч шагнал авсандаа өөрийгөө хязгааргүй их азтайд тооцож байна. Өдий зэрэгт хүргэсэн багш нар минь тэнгэрээс хараад баярлаж байгаа хэмээн найдаж байна. Мөн 43 жилийн турш босгыг нь элээсэн, авралын од болсон саарал ордон минь, тэнд ажиллаж байгаа эмч нартаа, олон сайхан шавь нар болон Нэгдүгээр төв эмнэлгийн хамт олондоо 100 жилийн баярын мэндийг хүргэе. Энэ хүртэл тусалж дэмжсэн үр хүүхэд, ах дүү нартаа, надтай хамтарч ажилласан бүх хүмүүстээ баярлалаа. Сүүлийн 13 жилийн хугацаанд 340 гаруй хүнд элэг шилжүүлэн суулгасан тоогоороо Монгол улс дэлхийд сүүлийн гурван жил дараалан нэгдүгээр байранд орж байгаа. Би 2017 онд Дэлхийн шилдэг таван эмчийн нэгээр Ази тивээс шалгарсан 11 дэх эмч болж байлаа” гэв.