Улсын баяр наадмын үндэсний бөхийн барилдаанд найм даван үзүүрлэж, Улсын гарди цол хүртсэн Сүхбаатар аймгийн Онгон сумын харьяат Н.Өсөхбаяраас хориотой бодис илэрсэн. Гэвч Н.Өсөхбаяр өөрийн цахим хуудаснаа "Би хориотой бодис хэрэглээгүй учир өөрийнхөө нэр төрийг сэргээлгэнэ. Удахгүй барилдана" хэмээж байв. Харин Бөхийн салбар хорооноос түүний цолыг хурааж, барилдах эрхийг гурван жилээр хасах саналыг баяр наадам зохион байгуулах хороонд хүргүүлсэн байна. Тухайн хорооны хурал удахгүй товлогдож, дээрх асуудлыг шийдэх юм.