Э.АГИЙМААГИЙН ДУУНЫ ЕРТӨНЦӨӨР

2024-11-22, 307

Түүний уянгалаг дуунуудад уяран татагддаггүй хүн ховор биз ээ. Нэг сонссон л бол гарцаагүй дахин эхлүүлж, бүр даган дуулж, хайрлан татагдмаар болох нь энүүхэнд. Хэний тухай бичих гээд буйг хэдийнэ мэдсэн уншигчийн хувьд мэдрэмж, дуулалт нь шууд л санаанд нь бууж, “Нээрээ ойрд Э.Агиймааг сонсоогүй юм байна шүү дээ” гээд гарцаагүй дууг нь сонсоно гэдэгт итгэлтэй байна. Түүний тухай үгсээр илэрхийлье гэж бодож байсан ч зүрхлэхгүй явсаар энд ирэв. Удаан эмээж явахын нөгөө талд ийм сайхан дуучны талаар бичихгүй өнгөрч бас боломгүй бодол төрнө. Тэгээд дуу бүрээр нь өртөөлж, түүнийг илэрхийлэхийг зорьсон минь энэ.

Э.Агиймаагийн дуу хоолойтой анх “Үлгэрийн хайр” киноны дуугаар нь танилцаж байлаа. Хэчнээн уянгалаг, мэдрэмж дүүрэн, үг бүрээ тултал урласан дуулалт байдгийг хэн бүхэн мэднэ. Дээрээс нь энхрий ялдам, дуундаа бүрэн орж, сэтгэлээсээ эгшиглүүлэгч тэр эмэгтэйг одоо ч сонсоход хэвээр.

Цаашлаад "Надаас чи", "Хайрлах хүсэл", “Зүрхэн хоёр алга”, "Зэрлэг цэцэгсийн хүлэмж" киноны дуу, "Нэгэн зүг" хамтлагийн Заяатай хамтран дуулсан дуунууд гээд ихэнх нь хайрын дуунууд зонхилдог.

Тэрбээр багаасаа л урлагийн үзлэг болон янз бүрийн уралдаан тэмцээнүүдэд идэвхтэй оролцдог охин байжээ. Тэр үеэс л урлагийн хүн болохыг мөрөөддөг байсан гэдэг. Цөөн боловч чанартай уран бүтээлүүд нь үзэгчдийн сэтгэлд амьдарч, тэр өөрөө ч дуунаас дууны хооронд улам чамбайрч, гарцаагүй сайхан бүтээлийг бидэнд үзүүлдэг. Харин Э.Агиймааг өөрөөр харах боломж бидэнд гарч ирсний нэг нь "Яг түүн шиг" шоу. Тэр үүгээр авьяас чадвар, мэдрэмж сэтгэлээ бүрмөсөн дэлгэн харуулж, хувирч, өөрийгөө дайчилж чаддаг гэдгээ харуулсан. Уянгын намуухан дуучин гэдгээсээ тэр өндийн босож “Би ямар ч жанрын дуунуудыг дуулдаг” гэдгээ илэрхийлсэн. Гэхдээ уянгалаг дуунуудгүйгээр нь үзэгч, сонсогч бид төсөөлшгүй.

Түүний аль ч дуунаас сонсоход хайрлах сэтгэл төрж, амьдралын хамгийн сайхан мөчүүд тодорч, гэгээн дурсамжууд хөвөрдөг. Тэр дуу хоолойгоороо хүмүүсийг догдлуулж, түмэн завгүй, үргэлжийн яарч тэвдсэн амьдралаас нь өөр ертөнцөд аваачиж түр амраадаг.

Э.Агиймаагийн тэр ертөнцөд саатсан хэн бүхэн хайраа хайж олж, хайрлаж дурлаж, дахилттай дуу шиг амьдралд ахин дахин дуулж, дуугаар жигүүрлэж, өөрөө ч гүнд нь амьдарсан он жилүүд өнгөрсөн. Яг одоо түүний дууг сонсоорой. Аяндаа уужран тайвширч, нэн тийм хөөр догдлол, гэгээн мэдрэмж төрөх вий.

Э.АГИЙМААГИЙН ДУУНЫ ЕРТӨНЦӨӨР

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.