Хөгжлийн банкны “хөө”-тэй хэрэг өнөөдрийг хүртэл эцэслэгдээгүй байна. Тэгэхдээ бүүр Хөгжлийн банканд 36.4 тэрбум төгрөгийн хохирол учруулсан хэрэгт яллагдагчаар татагдаж,гурван удаа цагаадсан УИХ-ын гишүүн Н.Алтанхуягийн хэрэг дахиад сөхөгдөх нь тодорхой боллоо. Тодруулбал, Эрүүгийн хэргийн давж заалдах шатны шүүх хуралдаанаар анхан шатны шүүхийн шийтгэх тогтоолын зарим хэсгийг хүчингүй болгож, УИХ-ын гишүүн Н.Алтанхуягт холбогдох хэргийг цагаатгасан анхан шатны шүүхийн шийдвэрийг хүчингүй болгож шийдвэрлэсэн.

       Ингэхдээ “Анхан шатны шүүх хэргийн бодит байдлыг бүрэн гүйцэд дүгнээгүй, Эрүүгийн хэрэг хянан шийдвэрлэх тухай хуулийг зөрчсөн гэж үзэх бөгөөд зөвтгөх үндэслэлгүй” гэх шүүхийн шийдвэр гарлаа.

       Гэтэл нийгэмд улс төрийн зорилготой гурван удаагийн цаатгасан шийдвэрийг хүчингүй болголоо гэх мессежийг түгээж эхлээд байна. Үнэндээ бодит байдал дээрээ анхан шатны шүүхэд нөлөөлсөн байж болзошгүй нь баримтаар дэлгэгдэж байлаа. Өөрөөр хэлбэл, гурван удаа Н.Алтанхуягийг цагаатгасан эрүүгийн хэргийн анхан шатны шүүгчид улс төрийн уг гарлаараа ч, унасан газар нутгаараа ч Н.Алтанхуягтай холбогдох баримтууд ил болж байлаа. Тодруулбал, Н.Алтанхуяг анхан шатны шүүхээс гэм буруугүй гээд нотлоод цагаадчихсан гэсэн үг огтоос биш юм.

        Тэгвэл Давж заалдах шатны шүүхээс гаргасан үндэслэлийг эргэн харвал “Дээд шатны шүүхийн өмнөх шийдвэрүүдэд тодорхой зааснаар “анхан шатны шүүх хэргийн бодит байдалд нийцээгүй дүгнэлт хийсэн болон Эрүүгийн хэрэг хянан шийдвэрлэх тухай хуулийг зөрчсөн алдаа, анхаарах асуудал” бүрийг анхан шатны шүүхээс дахин давтсан буюу хууль ёсны ба үндэслэл бүхий дүгнэлт огт хийлгүй орхигдуулсан байна.

Энэ нь Монгол Улсын Үндсэн хуулийн Дөчин наймдугаар зүйлийн 1-д заасан “...Дагнасан шүүхийн үйл ажиллагаа, шийдвэр нь Улсын дээд шүүхийн хяналтаас гадуур байж үл болно”, мөн Тавьдугаар зүйлийн 2-т заасан “ Улсын дээд шүүхийн шийдвэр шүүхийн эцсийн шийдвэр байх бөгөөд түүнийг бүх шүүх, бусад этгээд заавал биелүүлнэ”, Эрүүгийн хэрэг хянан шийдвэрлэх тухай хуулийн 37.3 дугаар зүйлийн 1 дэх хэсэгт заасан “Дээд шатны шүүхийн хүчин төгөлдөр шийдвэр заавал биелэгдэх үндэслэл, журам”-д тус тус нийцээгүй гэж үзэх үндэслэлд хамаарч байна” хэмээн тодорхой заасан байна.  

      Урьд нь Улсын дээд шүүх Н.Алтанхуягийн хэргийг хянаад “Хэргийн гол нотлох баримтуудыг анхаарахгүй орхисон байна” гэж үзэж,  цагаатгасан шийдвэрийг нь цуцалж байсан удаатай. Үндсэндээ хоёр шатны шүүхээс “Цагаатгасан шийдвэрээ эргэж хараачээ” гэдэг шийдвэр гарсаар байтал олны төөрөгдүүлэх мэдээллийг удаа дараа цацаж байгаа нь ямар эрх ашиг нууж байгаа вэ гэдэг хардлагыг ч төрүүлж байгаа юм.