Ерөнхий боловсролын сурагчдын II дугаар улирлын амралт болон бие даалтын долоо хоног хэзээ эхлэх талаар Боловсролын ерөнхий газрын Сургалтын хөтөлбөрийн хэрэгжилт, үнэлгээний хөгжлийн газрын дарга Б.Лхагвабаяртай холбогдож тодрууллаа.

Тэрбээр “Орон нутгийн ерөнхий боловсролын сургуулийн сурагчдын II дугаар улирлын бие даалтын долоо хоног гуравдугаар сарын 23-нд эхэлнэ, улирлын амралт дөрөвдүгээр сарын 10-нд дуусна. Харин нийслэлийн сургуулиудын бие даалтын долоо хоног гуравдугаар сарын 30-нд эхэлж, улирлын амралт дөрөвдүгээр сарын 6-нд эхэлж, 10-нд дуусна. Орон нутаг, нийслэлийн бие даалтын долоо хоног зөрүүтэй байгаа шалтгаан нь нэгдүгээр улиралд нийслэлийн сурагчид утаа, томуунаас шалтгаалан нэг долоо хоног түрүүлж амарсантай холбоотой. Мөн хаврын мал төллөлтэй холбоотойгоор зөрүүлдэг. Энэ удаагийн хаврын бие даалтын долоо хоногийг гамшгийн эрсдэлийн хүрээнд зохион байгуулах чиглэлийг гуравдугаар сарын 2-нд холбогдох байгууллагууд руу хүргүүлсэн” гэв.