-“ТВ КОКТЕЙЛ”-ИЙН Э.ЦОЛМОНБАЯР-

          Монголын урлагт элдэвтэй, тууштай, дундаршгүй авьяастай цөөн хэдэн уран бүтээлч бий. Тэдний нэг бол “ТВ коктейл” хамтлагийн жүжигчин, СТА Э.Цолмонбаяр. Бид түүнийг энэ удаагийн "Уран бүтээлчийн цаг" буландаа онцолж байна.

Цоомоогийн хүүхэд нас зургаан буудалд дүү нараа харж, чөлөөт цагаараа гудамжинд сагсан бөмбөг тоглож өнгөрсөн гэдэг. Багын л адтай тэр найзуудтайгаа хамт самар түүн зарж, 100-гийн ундааг цехээс 50 төгрөгөөр авч, зах дээр очоод “Интоорын ундаагаа уугаарай” гээд орилж зардаг байж. Тэр багаасаа л ийм хөдөлмөрч, юм бүхнийг туршиж, өөрийгөө сорьж үздэг байсан. Тэрбээр 35 дугаар сургуулийг төгссөн. Хүүхэд байхдаа сургуулийнхаа шинэ жилийн алиалагч, хөтлөгч хийж, авьяас нь илэрч эхэлсэн байна. Мөн хүүхэд байхад нь ээжийнх нь телевизэд ажилладаг найз нэг өдөр ирээд “Хоёр дүүгээ манайд оруул, гоё хувцсаа өмс” гээд дагуулан явж, МҮОНРТ-ийн киноны сонгон шалгаруултад оруулсан байдаг. Улмаар тэр алтан үеийн жүжигчидтэй хамт анхны кинондоо дүр бүтээж байсан юм.

          Харин арван жилээ төгсөөд, СУИС-д суралцаж,  оюутан ахуй цагаасаа “Шинэ үе” продакшнд ажиллаж эхэлсэн. Монголын хошин урлагийн энэ том айлд жүжигчин Э.Цолмонбаяр, А.Өнөржаргал, Н.Цэнд-Аюуш нар нөхөрлөж, нэгнээ өнгөлж, өрдөж “ТВ коктейль” хамтлагийг байгуулж, “Халуун чинжүү” нэвтрүүлгээрээ хүмүүсийг зурагтын өмнө уяж байлаа. Үүний дараа тэд  “Намрын синдром”, “Омарын эрэлд”, “Сайн уу амьдрал минь” зэрэг уран бүтээлийг үзэгчдийн хүртээл болгосон. Эдгээр киног одоо ч үзэхэд тухайн үеийн дурсамж нүдний өмнө “хөвөрч”, догдлол нь мэдрэгддэг. “Намрын синдром” кино тухайн үедээ залуусыг байлдан дагуулж, кино урлагт бас нэг өнгө нэмж байсан. Киноны “Хайрын гүн хордлого” дууг тухайн үед хүн болгон сонсож

“Чи намайг дурлалд уруу татаад

Хайрыг минь нууцхан хулгайлж

Харцыг минь харцаараа булаалаа

Би чамайг ганцхан хараад яахаа ч мэдэхгүй алмайраад

Анхны хайрын гүн хордлогод орлоо” хэмээн амандаа аялдаг байлаа.  Энэ киноны буянаар хамтлагийн гишүүд бүгд байрны урьдчилгаа, өөрсдийн студи, техниктэй болж байсан гэнэ. Энэ үеэс л Э.Цолмонбаярын продюсерын гараа амжилттай эхэлсэн байдаг.

            Цоомоо хамтлагийнхаа талаар “Би "Шинэ үе" продакшны Бооёо /МУГЖ Н.Ариунболд/ ахтай  учирсандаа баярладаг. Сургуулийн “Дэвжээ” наадам дээр Бооёо ахыг манай н.Намбал багш урьж авчирсан юм. Улмаар Бооёо ахтай танилцаад, найзалж нөхөрлөсөн. Ээждээ энэ тухай хэлэхэд, биднийг ах дүү болгож өгсөн юм. "Шинэ үе" продакшнд орсондоо баярладаг. Тэнд Өөскө, Аюуш хоёртой уулзсан. Эндээс л бүх зүйл эхэлсэн. Улмаар уран бүтээлийн нэгдүгээр нэгдлийг байгуулж байсан. Энэ хорвоод надад тохиосон учрал бүхэндээ талархдаг. Хамгийн гол нь өдийг хүртэл цуг байгаа хамтлагийнхаа найзуудаараа бахархдаг. Биднийг амжилт гаргаагүй гэж өнөөдөр хэн ч хэлэхгүй. Батсүмбэрийн Н.Цэнд-Аюуш гэдэг охиныг өнөөдөр танихгүй хүн гэж байхгүй. Энхбаяр, Өөскөг ч гэсэн хүмүүс мэднэ, танина гэсэн" байдаг.

МОНГОЛЫГ ХӨДӨӨГ ДЭЛХИЙД ГАЙХУУЛЖ БАЙНА, ПРОДЮСЕР Э.ЦОЛМОНБАЯР

       Харин өдгөө тэр орон нутагт аялал жуулчлалыг тултал нь хөгжүүлж байна. Өнгөрсөн жил Архангай аймаг үүсэж хөгжсөний 100 жилийн ойг найруулагч Б.Тамирын хамт төрийн наадмаас дутахааргүй хийсэн. Тэгвэл энэ жил “Ara complex”-д Монголын болон дэлхийн алдартай уран бүтээлчдийг цуглуулж, энэ зуны хамгийн том фестивалийг хийж байна.  Ёстой л Монголын хөдөө, цэлгэр уудам талыг тултал ашиглаж, гялалзуулж буй. Өмнө нь түүн шиг ингэж мэргэжлийн түвшинд зохион байгуулж байсан хүн үгүй. Үүнийгээ дагаад орон нутгийн хөгжил нэмэгдэж, иргэдийн ашиг орлого өсөж, зорин очих иргэдийн цуваа тасрахгүй байна.  Бараг л найман настай балчраас наян настай буурай хүртэл “Ara complex”-ийг ярьж, тал талаас зорин очиж байна. Харин очсон нэгнийх нь сэтгэл дүүрч, тав тухтай амраад буцаж байна. Энэ жишиг 21 аймагт хэрэгжиж, Э.Цолмонбаяр шиг зохион байгуулж чадах хүн олширвол Монголын хөдөө дэлхийд гайхагдах нь ээ. Монголчууд ч эх орондоо сэтгэл дүүрэн, сайхан аялдаг болох нь тодорхой.

           Тэр спортод ч адтай, багаасаа сагсан бөмбөг сонирхож, хорхойсож эхэлсэн гэдэг. Одоо “Найзууд” лигт тоглодог билээ. Цоомоо сайн жүжигчин, продюсер байхаас гадна Монголын урдаа барьдаг цөөн хэдэн чадварлаг хөтлөгч нарын нэг. “Яг түүн шиг” нэвтрүүлгийг түүний хоолой, дүр төрхгүйгээр төсөөлөхөд бэрх. Цоомоо тайзнаа гарч ирэхэд сая нэг нэвтрүүлэг "амь" ордог. Түүний “Воов л даааа” гэх үг одоо ч үзэгчдийн дунд трэнд хэвээр. Тэр зөвхөн нэвтрүүлэг хөтлөөд зогсохгүй, бүхий л баяр ёслол, бидний хамгийн жаргалтай мөчүүдэд хамгийн мэдрэмжтэй хөтлөгч байдаг. СТА, жүжигчин Э.Цолмонбаяр тийм л адтай, авьяастай, хөдөлмөрч уран бүтээлч. Урлагийн хүрээллийнхэн нь түүнийг авьяасын ундарга, хүнлэг энэрэнгүй, хариуцлагатай, мэдрэмжтэй хүн гэлцдэг юм билээ.

   Ер нь өнөө цагийн урлагт түүн шиг даацтай уран бүтээлч тун цөөн. Эгэл айлын хөдөлмөрч хүүгийн дараагийн том ажил юу байх бол гэх хүлээлт нэгэнт үүсжээ. СТА, жүжигчин Э.Цолмонбаярт цаашдын ажилд нь амжилт хүсье.