Н.АЛТАНХУЯГ ХӨГЖЛИЙН БАНКНЫ ХЭРГЭЭ ХЭНТИЙН АХ ДҮҮСЭЭР ЦАГААТГУУЛСАН УУ

2026-02-11, 364

Монголын шүүх эрх мэдэлтнүүдэд үйлчилдэг хэмээн үглэн дуулж, “Шударга бусын хонгил” нэртэй ном хүртэл хэвлүүлсэн Н.Алтанхуяг өөрөө ийм хонгилтой юм биш биз. Өөрөө өөрийгөө Хөгжлийн банкны хэргээс зугтаалгах хонгил шүүхэд угсарчихаад, тэр хонгилоороо халаасандаа гараа шаачихсан, шүгэлдэн алхаж яваа юм биш биз дээ.

Хөгжлийн банканд 36.4 тэрбум төгрөгийн хохирол учруулсан хэрэгт яллагдагчаар татагдсан Н.Алтанхуягийн хэргийг 2023 оны долдугаар сард СБД-ийн Эрүүгийн хэргийн анхан шатны шүүхээр хэлэлцсэн. Ингээд тус шүүхийн Ерөнхий шүүгч Ж.Болдбаатар нь Н.Алтанхуягийг “гэм буруугүй” хэмээн дүгнэж, цагаатгасан байдаг. Улмаар 2024 оны арванхоёрдугаар сард Улсын дээд шүүх Н.Алтанхуягийн хэргийг хянаад “Хэргийн гол нотлох баримтуудыг анхаарахгүй орхисон байна” гэж үзэж, цагаатгасан шийдвэрийг нь цуцалж, СБД-ийн Эрүүгийн хэргийн анхан шатны шүүхэд дахин хэлэлцүүлэхээр буцаасан. Өөрөөр бол, Улсын дээд шүүх “Ял авах ёстой хүнийг цагаатгаж, ямбанд нь буцаах шийдвэр гаргасан байна” гэж буцаасан байдаг.

Энэ дагуу 2025 оны есдүгээр сард анхан шатны шүүх Н.Алтанхуягийг хэргийг дахин хэлэлцсэн. Гэтэл өнөөх Ерөнхий шүүгч Ж.Болдбаатар Н.Алтанхуягийг дахиад цагаатгасан. Үндсэн хуульд “Улсын дээд шүүхийн шийдвэр эцсийн шийдвэр байх бөгөөд түүнийг бүх шүүх заавал биелүүлнэ” гэсэн заалт бий. Өөрөөр хэлбэл, Улсын дээд шүүх “Н.Алтанхуягийг гэм буруугүй гэж үзэх, цагаатгах үндэслэлгүй байна” гэсэн эцсийн шийдвэрээ гаргачихаад байхад Ж.Болдбаатар Улсын дээд шүүхийн шийдвэрийг сөрж, Н.Алтанхуягийг дахин гэм буруугүй хэмээн дүгнэж, цагаатгачихсан гэсэн үг. Тиймээс Н.Алтанхуягийн энэ шүүх хуралд Улсын яллагчаар оролцсон дөрвөн прокурор “Анхан шатны шүүх Н.Алтанхуягийг дахин цагаатгасан нь Улсын дээд шүүхийн шийдвэртэй нийцэхгүй байна” гэх агуулгаар Нийслэлийн давж заалдах шатны шүүхэд хандсан. Өчигдөр Н.Алтанхуягийн шүүх хурал болох товтой байсан ч өмгөөлөгч нар нь өвлөж хавдсан, өөр шүүх хурал давхацсан гэх мэт шалгаанаар ирэх гуравдугаар сарын 2-нд хүртэл хойшлууллаа.

Өөрөөр хэлбэл, Ж.Болдбаатар гэх шүүгч Улсын яллагч нарын нотлон баримтуудыг үл хайхран байж, Улсын дээд шүүхийн шийдвэрийг сөрөн байж Н.Алтанхуягийг цагаатгахаар улайрч, бүр хоёр ч удаа цагаатгачихсан байна гэсэн үг. Яг л “Ямар ч хамаагүй аргаар надад ял өгүүлж л болохгүй” гээд Н.Алтанхуяг өөрөө Ж.Болдбаатарт “захиалчихсан” мэт. Их ч бай, бага ч бай ял авчихвал ирэх оны мөрөөдөл нь талаар болж, Ерөнхийлөгчийн сэнтий зөвхөн зүүдэнд нь л үлдэх учраас тэр ийм “захиалга” өгсөн байхыг үгүйсгэх аргагүй.

Хамгийн ноцтой нь, дээр дурдсан Ерөнхий шүүгч Ж.Болдбаатар, түүний төрсөн ах Ж.Оюунбаатар хоёрын туулсан намтар, тушаал дэвшсэн цаг хугацаа Н.Алтанхуягтай шууд холбогдож байна. Өөрөөр хэлбэл, Н.Алтанхуяг Ж.Болдбаатарыг Ерөнхий шүүгч болтол нь дэвшүүлж, Ж.Болдбаатар нь эргээд “эзэндээ үйлчлэх” хуулиар Хөгжлийн банкны хэргийг нь цагаатгахаар улайрч байж болзошгүй баримтууд гарч ирж байна.

Н.Алтанхуяг АН-ын дарга байхдаа Ж.Болдбаатарыг Хэнтийн Өндөрхаан хотын АН-ын даргаар томилж, дараа нь Х.Баттулгын зөвлөх байхдаа Ерөнхий шүүгчээр томилуулсан байж болзошгүй

2008 оны УИХ-ын сонгуулийн дараа, наймдугаар сард АН-ын даргаар Н.Алтанхуяг сонгогдсон. Тэгмэгцээ Н.Алтанхуяг Хэнтий аймгийн Өндөрхаан хотын АН-ын даргаар өмгөөлөгч Ж.Болдбаатар гэх залууг томилсон. Гурван сонгууль дараалан МАН-д саналаа өгсөн, “улаан тойрог” гэгддэг Хэнтийнхнийг АН-д урвуулах хариуцлагатай даалгаварыг Н.Алтанхуяг Ж.Болдбаатарт хариуцуулсан гэсэн үг л дээ. Ингээд АН-ын дарга Н.Алтанхуяг Ж.Болдбаатарыг өөрийн удирдлага доор Өндөрхаан хотын АН-ын даргаар 2012 он хүртэл дөрвөн жил ажиллуулсан байдаг. Хөгжлийн банкны хэргийн шүүх танхимд яллагдагч, шүүгчийн “дүрд тоглосон” Н.Алтанхуяг, Ж.Болдбаатар хоёр үнэндээ аль 2008 оноос л дарга, цэрэг байсан гэсэн үг.

Ингээд 2012 оны УИХ-ын сонгуулиар үнэхээр ч Хэнтийнхэн АН-д урваж, АН-аас нэр дэвшсэн Б.Гарамгайбаатар ялж, үүнд нь Ж.Болдбаатар хувь нэмэр их байсан. “Шагнал”-д нь Ж.Болдбаатар 2012 оны Орон нутгийн сонгуулиар АН-аас нэр дэвшиж Хэнтий аймгийн ИТХ-ын төлөөлөгчөөр сонгогдож, улс төрд хөл тавьсан.

Ийнхүү Хэнтий аймгийн ИТХ-ын төлөөлөгчөөр АН-аас сонгогдон ажиллаж байсан Ж.Болдбаатар 2015 оноос Хэнтий аймаг дахь сум дундын Иргэний хэргийн шүүхийн шүүгчээр томилогдон ажиллаж эхэлсэн.

2016 оны УИХ-ын сонгуулиар Н.Алтанхуяг уугуул Увсдаа нэр дэвшээд унасан. Аз болж 2017 онд Х.Баттулга Ерөнхийлөгчөөр сонгогдож, анхны зарлигаараа өөрийн Улс төрийн бодлогын зөвлөхөөр Н.Алтанхуягийг томилж дэргэдээ авсан. Хоёр жилийн дараа буюу 2019 оны хоёрдугаар сарын 28-нд Ерөнхийлөгч Х.Баттулга “Анхан болон давж заалдах шатны шүүхийн Ерөнхий шүүгчийн албан тушаалд томилох тухай” 29 дугаартай зарлиг гаргаж, Хэнтий аймаг дахь сум дундын Иргэний хэргийн шүүхийн шүүгч өнөөх Ж.Болдбаатарыг Сүхбаатар дүүргийн Эрүүгийн хэргийн анхан шатны шүүхийн Ерөнхий шүүгчээр томилсон байдаг. Өөрөөр бол, Ерөнхийлөгч Х.Баттулга зөвлөх Н.Алтанхуягийнхаа “захиалга”-аар хаа байсан Хэнтийд байсан Ж.Болдбаатарыг Ерөнхий шүүгч болгож дэвшүүлсэн байж болно.

Ингээд Ж.Болдбаатарыг Хэнтийгээс Улаанбаатарт ирж, Ерөнхий шүүгчээр томилогдсоноос ердөө 15 хоногийн дараа Н.Алтанхуяг Ерөнхийлөгч Х.Баттулгын Улс төрийн бодлогын зөвлөхийн албан тушаалаас өөрийн хүсэлтээр чөлөөлөгдсөн. Яг л “Гол ажлаа амжуулчихлаа” гэсэн шиг. Тэр цагаас хойш Ж.Болдбаатар Сүхбаатар дүүргийн Эрүүгийн хэргийн анхан шатны шүүх буюу шинэчилсэн нэрээр Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны тойргийн шүүхийн Ерөнхий шүүгчээр долоо дахь жилдээ ажиллаж байна.

Нэгтгэвэл, Ж.Болдбаатарыг Н.Алтанхуяг анх АН-тай холбож, намын хорооны болгосон. 2012 онд АН-аас нэр дэвшүүлж Хэнтий аймгийн ИТХ-ын төлөөлөгч болгож улс төрийн босго алхуулсан. 2019 онд Ерөнхийлөгч Х.Баттулгын зөвлөх байхдаа Хэнтийгээс Улаанбаатарт авчирч, сум дундын иргэний хэргийн шүүгчээс дүүргийн эрүүгийн хэргийн Ерөнхий шүүгч болгож суга дэвшүүлсэн. Энэ бүхнийх нь хариуд Ж.Болдбаатар Н.Алтанхуягийг Хөгжлийн банкны хэргээс ялгүй үлдээхээр улайрч, хоёр удаа цагаатгасан байж болох дүр зураг гарч ирж байгаа юм.

Н.Алтанхуяг Ерөнхий сайд байхдаа Ж.Болдбаатарын төрсөн ах Ж.Оюунбаатарыг Хэнтий аймгийн Засаг дарга болгосон

Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны тойргийн шүүхийн Ерөнхий шүүгч Ж.Болдбаатарын төрсөн ах нь Ж.Оюунбаатар гэж хүн бий. Ерөнхий шүүгч Ж.Болдбаатар төрсөн ах Ж.Оюунбаатарынхаа эхнэр Б.Гэрэлмаатай “Жо интернэшнл” ХХК-ийг хамтран эзэмшдэг. Энэ компани нь Төв аймгийн Батсүмбэр суманд “Баянбайгаль” гэх амралтын газар ажиллуулдаг, ахмад настнуудад амралт сувиллын үйлчилгээ үзүүлсний төлбөрт улсаас жил тутам хэдэн зуун сая төгрөг халаасладаг. Тэгээд болоогүй, Төв аймгийн Алтанбулаг суманд МV-015042 дугаартай 29.97 га талбайд хайрга, дайрганы орд эзэмшиж, ажиллуулдаг. Товчхондоо, Ж.Болдбаатар төрсөн ах Ж.Оюунбаатартайгаа халаас нэгтэй.

Цаашилбал, Ерөнхий шүүгч Ж.Болдбаатар төрсөн ах Ж.Оюунбаатартайгаа улс төрийн ашиг сонирхол ч нэгтэй. Гол нь, төрсөн ах Ж.Оюунбаатар нь Н.Алтанхуягтай Ж.Болдбаатараас ч дотно.

Тодруулбал, төрсөн ах Ж.Оюунбаатар нь олноо “Цагаан шонхор”-ын гэж алдаршсан, орон шоронгоор олон жил явсан Ч.Энхтайваны баруун гар, бас дотнын найз нь гэдгээрээ Хэнтийд анх танигдсан “хүнд гар”. Анх 2000-2006 онд “Цагаан шонхор холдинг” ХХК-ийн Ерөнхий захирлаар Ч.Энхтайван, гүйцэтгэх захирлаар нь Ж.Оюунбаатар ажиллаж, аль нэгийгээ УИХ-ын гишүүн болгохоор зүтгүүлж байсан. Жишээ нь, 2000 оны УИХ-ын сонгуульд Ч.Энхтайван нь Хэнтийд нэр дэвшээд унасан. 2004 онд Ж.Оюунбаатар нь нэр дэвшээд унасан байдаг.

Ийнхүү УИХ-д орох оролдлого нь удаа дараа бүтэлгүйтэж байсан Ж.Оюунбаатар 2012 оны УИХ-ын сонгуулийн өмнөөс АН-ын дарга Н.Алтанхуягтай дотноссон. Ингээд 2012 оны УИХ-ын сонгуулиар Ж.Оюунбаатар Хэнтийн АН-ын Сонгуулийн менежерээр ажиллаж, штаб удирдсан. Тэр жилийн сонгуулиар Хэнтийн тойрог хоёр мандаттай байсан бөгөөд АН-аас Ж.Оюунбаатар, “Цагаан шонхор”-ын Ч.Энхтайван хоёрын хуурай дүү М.Хүдэрбаатар, “Монроуд” ХХК-ийн захирал Б.Гарамгайбаатар хоёр нэр дэвшсэн. Ингээд Б.Гарамгайбаатар нь УИХ-ын гишүүн болж, М.Хүдэрбаатар нь унасан. Гэсэн ч сонгуулийн дараа Н.Алтанхуяг Ерөнхий сайд болж, Ж.Оюунбаатар, Ч.Энхтайван хоёр өнөөх М.Хүдэрбаатарыгаа Ерөнхий сайд Н.Алтанхуягийн зөвлөхөөр томилуулсан байдаг.

Ингээд намар нь 2012 оны Орон нутгийн сонгуульд Ж.Оюунбаатар мөн л Хэнтийн АН-ыг удирдаж, сонгуулийн менежерээр ажилласны сацуу өөрөө нэр дэвшсэн. Ингээд Хэнтий аймгийн ИТХ-д АН олонх болж, Ж.Оюунбаатар Хэнтий аймгийн ИТХ-ын төлөөлөгчөөр сонгогдсон. Ийнхүү УИХ-ын олон Орон нутгийн сонгуулийг амжилттай удирдаж, Хэнтийд АН-ыг ялуулсан Ж.Оюунбаатарыг Ерөнхий сайд Н.Алтанхуяг “шагнаж”, Хэнтий аймгийн Засаг даргаар томилж 2012-2016 онд дөрвөн жил ажиллуулсан байдаг. Хэнтий аймгийн Засаг дарга болсон Ж.Оюунбаатар Ерөнхий сайд Н.Алтанхуягт ёстой л “эрхэлсэн”. Ямар сайндаа л Хэнтий аймгийн төв Өндөрхаан хотыг Чингис хот болгон өөрчилж байв.

Нэгтгэвэл, Ерөнхий шүүгч Ж.Болдбаатарын төрсөн ах Ж.Оюунбаатар нь Н.Алтанхуягийг “татаас”-аар Хэнтий аймгийн Засаг даргын сэнтийд дөрвөн жил тухалсан. Өөрөөр бол, Н.Алтанхуягт ач санадаг, “өртэй” хүмүүсийн нэг нь Ж.Оюунбаатар гэж хэлж болно. Тиймдээ ч Н.Алтанхуягийг Хөгжлийн банкны хэргээс хуурай гаргах “ажиллагаа”-нд Ж.Оюунбаатар төрсөн дүү Ж.Болдбаатараараа дамжуулж оролцож байхыг үгүйсгэх аргагүй.

Эцэст нь, цаг хугацааны хувьд таарч байгаа бас сэжүүр байна. Дээр дурдсанчлан өнгөрөгч 2025 оны есдүгээр сард Ерөнхий шүүгч Ж.Болдбаатар Н.Алтанхуягийн гэм буруугүйд тооцож цагаатгасан. Гэтэл гурван сарын дараа буюу 2025 оны арванхоёрдугаар сард төрсөн ах Ж.Оюунбаатар нь Германд Элчин сайдаар суух виз халаасласан. Тэртээ 2016 онд Хэнтий аймгийн Засаг даргаас бууснаас хойш сэтэр зүүж, сэнтийд залраагүй Ж.Оюунбаатар гэнэт гарч ирээд Германд Элчин сайдаар томилогдохоор болсны ард Н.Алтанхуягийн оролцоо байгаа юу гэх хардлага гарч ирж буй. Өөрөөр бол, Н.Алтанхуяг Ерөнхий шүүгч Ж.Болдбаатараар хэргээ цагаатгуулсны хариуд төрсөн ах Ж.Оюунбаатарыг нь Элчин сайдаар томилуулахаар хөөцөлдсөн үү гэдэг хардлага байгаа юм.

Н.АЛТАНХУЯГ ХӨГЖЛИЙН БАНКНЫ ХЭРГЭЭ ХЭНТИЙН АХ ДҮҮСЭЭР ЦАГААТГУУЛСАН УУ

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.