“Эрдэнэт үйлдвэр”-ийн даргын суудал донсолгоотой байна. Зуслангийн хоолны хордлогоос хойш өөдөлсөнгүй, нар ч үзсэнгүй. Г.Ёндон явж, ОБЕГ-ын дарга асан бригадын генерал Т.Бадрал, УБТЗ-ын дарга Х.Хэрлэн нарын “Эрдэнэт үйлдвэр”-т ирж магадгүй гэх бор шувуу нисээд удлаа. Гэхдээ тохироо, тохиролцоо хоёр нь бүрдэхгүй байгаа сурагтай. Гэхдээ, “Эрдэнэт үйлдвэр”-т өөр нэг сонирхолтой зүйл өрнөж байгаа бололтой. 

  Тодруулбал, “Эрдэнэт үйлдвэр”-ийн гурилнаас ган бөмбөлөг хүртэл, талхнаас тоног төхөөрөмж хүртэл буюу бүх тендерийг хариуцах хосгүй эрх мэдэлтэй Хөрөнгө оруулалт, худалдан авах ажиллагааны газрын дарга С.Энхмандах гэх залуу “Эрдэнэт үйлдвэр”-ийг эзэгнээд байгаа гэнэ. Ноцтой нь, тэр энэ эрх мэдлээ ашиглан “Эрдэнэт үйлдвэр”-ийн тендерүүдийн өрмийг нь хэнд өргөж, хусмыг нь хэнд хаяахаа толгой мэдэн шийддэг болж, нэг ёсондоо засаглалаа тогтоосон гэнэ. Ингэхдээ тэр тендерт оролцогч компаниудаас хувь нэхдэг, хүссэнийг нь өгөхгүй бол тендерээс удаа дараа унагаж сүр хүчээ үзүүлдэг ч байж болзошгүй тухай мэдээлэл чих дэлсэх боллоо. Бүр ноцтой нь, С.Энхмандах “Хууль хяналтынхнаас айхгүй, ард томчууд байгаа, хүссэнээрээ заргалд” гэж даналцдаг тухай “Эрдэнэт үйлдвэр”-ээс “амь зогоодог” компаниуд ярьцгааж байна

      Тэгвэл “Эрдэнэт үйлдвэр”-т эзэн суучихсан гэгдэж буй С.Энхмандах гэгчийг хэн болохыг танилцуулж байна. Хамгийн ноцтой нь, С.Энхмандах нь Улсын ерөнхий прокурор асан М.Энх-Амгалангийн халаас нэгтэй хамаатан ажээ. Өөрөөр бол, С.Энхмандах “Эрдэнэт үйлдвэр”-т дураараа дургиж, хууль хяналтаас ч айхгүй хэнхэлзэж буйнх нь цаад шалтгаан энэ байж болзошгүй аж.

С.ЭНХМАНДАХ НЬ “САХАЛ” Д.ЭРДЭНЭБИЛЭГТ “ҮЙЛЧИЛЖ” ЯВСАН УЛСЫН ЕРӨНХИЙ ПРОКУРОР АСАН М.ЭНХ-АМГАЛАНГИЙН ХАМААТАН, ААВТАЙ НЬ БОЛОН ХҮҮХДҮҮДТЭЙ НЬ ДУНДЫН ХОЁР КОМПАНИТАЙ

      С.Энхмандах нь 2009 онд БНСУ-ын Хансо их сургуулийг төгссөн. Ингээд төрсөн дүү С.Амармандахын хамтаар “Гожи бэрри” ХХК-ийг байгуулан ажиллуулж байгаад 2020 оны аравдугаар сард “Эрдэнэт үйлдвэр”-ийн Гадаад харилцааны бодлогын газрын даргаар томилогдож очсон. Ингээд 2022 оны есдүгээр сараас “Эрдэнэт үйлдвэр”-ийн Хөрөнгө оруулалт, худалдах авах ажиллагааны газрын даргаар дэвшин ажиллаж байгаа.

Ноцтой нь, “Эрдэнэт үйлдвэр”-ийн Хөрөнгө оруулалт, худалдан авах ажиллагааны газрын дарга С.Энхмандах нь Улсын ерөнхий прокурор асан М.Энх-Амгалангийн тун ойрын хамаатан ажээ. Хэр ойрынх вэ гэдгийг нь хоёрхон жишээгээр тайлбарлая.

1. Улсын ерөнхий прокурор асар М.Энх-Амгалангийн гэр бүлийнхний “Талын хишиг пластик” ХХК гэж бий. Тэгвэл С.Энхмандахын төрсөн дүү С.Амармандах нь “Талын хишиг пластик” ХХК-ийн зургаан хувьцаа эзэмшигчийн нэг. Тухайлбал, “Талын хишиг пластик” ХХК-ийг М.Энх-Амгалангийн том охин Э.Ижилмөрөн, бага охин Э.Уянга, М.Энх-Амгалангийн төрсөн эгч М.Оюунчимэгийн охин Б.Гандирс, М.Энх-Амгалангийн төрсөн дүү М.Бат-Амгалангийн эхнэр Л.Баярмаа, түүний дүү Л.Жаргалмаа нар тус тус эзэмшдэг.

2. С.Энхмандах нь аав Д.Санжмятав, ээж Я.Өлзий-Утас хоёрын хамтаар Улсын ерөнхий прокурор асан М.Энх-Амгалангийн аав Гүржавын Магманноровтой “Монбармат-Инженеринг” ХХК-ийг хамтран эзэмшдэг.

     Тэгвэл “Эрдэнэт үйлдвэр”-ийн Хөрөнгө оруулалт, худалдан авах ажиллагааны газрын дарга С.Энхмандах нь Улсын ерөнхий прокурор асан М.Энх-Амгалантай ойрын хамаатан байх нь, тэгээд болоогүй хэд, хэдэн компаниар халаас нэгтгэсэн байх нь яагаад ноцтой асуудал вэ гэдгийг тайлбарлая. Энэ бол Монголын төр “Сахал” хочит Д.Эрдэнэбилэгээс “Эрдэнэт үйлдвэр”-ийн 49 хувийг буцаан авснаа үгүйсгэж байгаагаас өөрцгүй агуулгатай.

Тодруулбал, М.Энх-Амгалан 2015-2019 онд Улсын ерөнхий прокуророор ажиллаж байсан. Яг энэ үед өнөөх алдарт “Эрдэнэт үйлдвэр”-ийн 49 хувийн хэрэг мандсан. Гэтэл М.Энх-Амгалан Улсын ерөнхий прокурорын эрх мэдлээ ашиглан "Сахал" хочит Д.Эрдэнэбилэгт холбогдох “Эрдэнэт үйлдвэр”-ийн 49 хувийг ОХУ-аас хууль бусаар худалдаж авсан ноцтой хэргийг зориудаар гацааж, прокуророос буцааж байна гэгдэж байсныг санаж буй байх. Ноцтой нь, үүнийхээ хариуд М.Энх-Амгалан төрсөн дүү М.Бат-Амгалан, хүргэн О.Хонгор нарынхаа нэр дээр байгуулсан “Талын хишиг майнинг” ХХК-аар тухайн үед “Сахал” Д.Эрдэнэбилэгийн эзэмшилд байсан “Дарханы төмөрлөгийн үйлдвэр”-ийн төмрийн хүдрийг урд хөрш рүү тээвэрлэж, асар их ашиг олсон баримтыг бид дэлгэж байлаа.

     Эргэн санавал, 2019 онд “Эрдэнэт үйлдвэр”-ийг “Сахал” Д.Эрдэнэбилэгээс төрд буцааж авлаа гэж гол усаар нэг найрлах шахуу хөөрцгөөж байлаа, эрх баригчид. Атал одоо “Сахал” Д.Эрдэнэбилэгтэй хувь, хувьсгалын хамаарал бүхий М.Энх-Амгалангийн хамаатан нь “Эрдэнэт үйлдвэр”-ийг “эзэгнэж” байгаа нь логикгүй биш байна уу. Өөрөөр бол, “Эрдэнэт үйлдвэр”-ийг буцааж аваагүйгээс ялгаа байна уу.

Үргэлжлэл бий.