УИХ-ын гишүүн Д.Рэгдэл В.Путинээс нэг насаар, Ши Жиньпинээс хоёр насаар ах. Дэлхийн дунджаар “үеийнхэн”-тэйгээ хөл нийлүүлж яваа боловч, дотоодод бол ахмаддаа тооцогдож буй. Төрийн ордонд тохой нийлүүлэн суугаа С.Цэнгүүнээс л гэхэд 46 насаар ах. Өтөлсөн, өвгөрснөөр нь дуудаж, тэтгэвэрт нь суулгасан Ц.Нямдоржоос тав, Ц.Элбэгдоржоос 12, М.Энхболдоос 13 ах.  Тиймдээ ч Д.Рэгдэлийг бусад түшээдэд аав, ах шиг нь байх настай, намбатай хүн, нөгөө талаас, шинжлэх ухаанд амьдралаа зориулсан, шүүхийн хонгил гэж мэдэхгүй, төрийн хулгай, тендерийн наймаа гэж танихгүй хүн хэмээн МАН-ын жагсаалтын тавд бичиж, Төрийн ордонд “оруулж” ирсэн.

Гэтэл Д.Рэгдэл Шинжлэх ухааны академийн Тэргүүн дэд ерөнхийлөгч байхдаа буюу 2012 онд “Гантоонот констракшн” ХХК-ийг байгуулж, барилгын бизнест хүч үзэж эхэлсэн. Өдгөө “Гантоонот констракшн” ХХК-ийг нь бага хүү Рэгдэлийн Хангай нь удирдаж буй. Р.Хангай нь 1980 онд төрсөн, Ерөнхий сайд Л.Оюун-Эрдэнэтэй нас чацуу залуу бий.

Ноцтой нь, УИХ-ын гишүүн Д.Рэгдэлийн “Гантоонот констракшн” ХХК нь төсвийн санхүүжилттэй барилгын тендерүүдийг түүдгээс гадна, Улаанбаатар хотыг бетонон ширэнгэ болгоход “хувь нэмэр” оруулж буй компаниудын нэг.

Жишээ нь, “Гантоонот констракшн” ХХК нь:

• 2020 оны гуравдугаар сард “Техник спортын төв” ТӨҮГ-ын буудлагын спортын заалыг засварлах 979 сая төгрөгийн тендер,
• 2020 оны гуравдугаар сард Баянзүрх дүүргийн 4, 5, 14-р хорооны орон сууцны байруудын фасадыг засварлах 1.1 тэрбум төгрөгийн тендер,
• 2020 оны тавдугаар сард “Эрдэнэт үйлдвэр” ТӨҮГ-ын архивын байрны барилгын ажлыг гүйцэтгэх 7.0 тэрбум төгрөгийн тендер,
• 2023 оны дөрөвдүгээр сард Хан-Уул дүүргийн XVIII хороонд 640 хүүхдийн суудалтай сургууль барих 10.1 тэрбум төгрөгийн тендер,
• 2024 оны УИХ-ын сонгуулийн санал хураалтаас хоёр хоногийн өмнө буюу зургадугаар сарын 26-нд Баянгол дүүргийн  XVI хороонд сургууль барих 7.7 тэрбум төгрөгийн тендерт тус тус шалгарсан байна.

​

 Цаашилбал, УИХ-ын гишүүн Д.Рэгдэлийн “Гантоонот констракшн” ХХК нь Сүхбаатар дүүргийн IX хороо, Ерөнхий боловсролын IV сургуулийн ард, олны хэлж дадсанаар Дөлгөөн нуураас 32-ын тойрог явах зам дагуу “Дөлгөөн нуур апартмент” I, II, III, IV нэртэй хотхонуудыг барьж, борлуулж буй. Өнгөрөгч 2024 онд “Дөлгөөн нуур апартмент-4” хотхоныхоо эхний ээлжийн 96 айлын орон сууцыг ашиглалтад оруулсан. Орон сууцнууд нь 37м2-77м2 талбайтай, нэг м2 нь 4.4 сая төгрөгийн үнэтэй. Дунджаар 50м2-аар тооцвол, 96 айлын орон сууц нь 21.1 тэрбум төгрөгөөр зарагдана гэсэн үг юм. Уг нь УИХ-ын гишүүн Д.Рэгдэл 1976 оноос Шинжлэх ухааны академид ажиллаж, сүүлийн 23 жил Эрдэмтэн нарийн бичгийн дарга, Тэргүүн дэд ерөнхийлөгч, Ерөнхийлөгчөөр нь ажилласан. Энэ намтарт нь төр, түмэн хүндэтгэл үзүүлж, Төрийн соёрхол хүртээж, Шинжлэх ухааны гавьяат зүтгэлтэн цол, сүүлд 2021 онд Төрийн дээд шагнал Сүхбаатар одонгоор мялааж байлаа. Насыг нь бодсон ч, намтрыг нь харсан ч төрийн түшээдэд үлгэрлэл болох ёстой хүн. Харамсалтай нь, тэр төрөөс хэрхэн тендер авахыг, гэр хорооллын газрыг хэрхэн чөлөөлүүлж, орон сууц болгож яаж худалдахыг  хэний ч санаанд оромгүйгээр үлгэрлэх нэгэн бололтой. Шинжлэх ухааны академийн ерөнхийлөгч нь чимээгүйхэн тендер түүж, бетонон ширэнгэ “босгож” ажлыг гарддаг байсан гэхээр бусдаас нь юу ч хүлээх билээ.