“Эрдэнэт хивсний үйлдвэр”-ийн туслахаас ажлын гараагаа эхлүүлсэн Дамбын Батлут Орхон аймгийн Баян-Өндөр сумын Засаг даргын орлогчоор ажиллаж, улс төрд хөл тавьсан. 2008 онд Орхон аймгийн ИТХ-д төлөөлөгчөөр сонгогдож, аймгийнхаа намын дарга болсноор Эрдэнэтийн МАН-ыг “атгах” болсон. 2016 оноос Орхон аймаг бөгөөд Эрдэнэт хотын захирагчаар дөрвөн жил ажиллаж, тойргоо тордсоор  2020 онд УИХ-ын гишүүнээр сонгогдсон. Угтаа бол Д.Батлут УИХ-ын сонгуульд хоёр удаа сонгогдохдоо улс төрд мерит зарчмаар шат ахисан, “шударга” улстөрчийн “имиж” бүрдүүлж ирсэн нэгэн. Гэвч үнэндээ “Эрдэнэт” үйлдвэрт ноёрхлоо тогтоосон МАН-ын томчуудаар крандуулагсдын нэг юм. Д.Батлутыг Орхон аймгийн Засаг дарга болтол дээш нь татаж, гишүүн болох гүүрийг нь тавьж өгсөн хүн бол нутгийнх нь ах Чимэдийн Ганзориг гэгч. Өөрөөр хэлбэл, Ч.Ганзоригийг нэгэн цагт “Эрдэнэт” үйлдвэрт ноёрхлоо тогтоож явахад нь түүнийг дагасан залуучуудын нэг нь Д.Батлут байсан. Ингээд Ч.Ганзориг Стандарт банкны хэрэгт нэр холбогдож, хууль хяналтын байгууллагын хаалга татсанаар нутгийн дүү Д.Батлут нь түүний улс төрийн үйл хэргийг үргэлжүүлж, түүний хар түүхийг “баллуурдсаар” өдийг хүрсэн гэгддэг.

      Д.Батлут хувьдаа компанигүй, жилийн 63 сая төгрөгийн орлоготой, 180 сая төгрөгийн орон сууцтай хэмээн хөрөнгө орлогоо тун даруухан мэдүүлсэн нэгэн. Түүний хөрөнгө орлогын дээрх мэдүүлгээс харахад тэрбээр гэр бүлээрээ эрхэлдэг бизнесгүй төсвийн цалингаар амьдардаг, төрийн алба хаагчдын нэг гэсэн үг.

АТГ-Т ШАЛГУУЛЖ БАЙСАН Л.БАТЛУТЫН ХЭРГҮҮД ХААНА ЗАМХАРСАН БЭ

 Д.Батлут Орхон аймгийн Засаг даргаар ажиллаж байх хугацаандаа албан тушаалын байдлаа урвуулан ашиглаж, Хөдөлмөр эрхлэлтийг дэмжих сангаас зээл авсан гэх хэрэгт холбогдож, хуулийн байгууллагад шалгуулж байсан хар түүхтэй нэгэн. Тодруулбал, иргэн Б.Цэцэгмааг ХАДС-гаас Хөнгөн блокны үйлдвэр барих зориулалтаар 50 сая төгрөг зээлэхэд нь тухайн үеийн Орхон аймгийн Засаг дарга байсан Д.Батлутыг албан тушаал, танил талаа ашиглан олгуулсан хэмээх гомдол АТГ-т очиж, Хөдөлмөр эрхлэлтийг дэмжих санг “тоносон” улстөрчдийн жагсаалтад Л.Батлут албан ёсоор “орж” байлаа. Үүнээс удалгүй тэрбээр дахин АТГ-ын хаалгыг татсан байдаг. Тодруулбал, “Эрдэнэт” үйлдвэрийн Орхон аймагт төлөх ёстой 579 сая төгрөгийг газрын төлбөрт суутгах замаар зургаан жийп машин болгосон гэх асуудал дэгдэж, түүнийг шалгаж байлаа. Гэхдээ дээрх асуудлууд тэгсхийгээд намжиж, өдгөө ч хэрхсэн нь тодорхойгүй байгаа билээ.

Д.БАТЛУТЫН ХАМААРАЛ БҮХИЙ ЭТГЭЭДҮҮД ЭРДЭНЭТИЙГ “ЭЗЭГНЭЖ” ЭХЭЛСЭН ҮҮ

Орхон аймаг тэр дундаа Монгол Улсын саалийн үнээ гэгдэх “Эрдэнэт” үйлдвэр ТӨҮГ-т Л.Батлут дархан эрхтэй болж, ураг төрлийнхөн төдийгүй цүнх баригчдаа ч ажилд томилуулсаар байгаа мэдээлэл хэвлэлээс салахаа болиод удаж байна.

       Тодруулбал, “Эрдэнэт” үйлдвэр ТӨҮГ-т Д.Батлутын эхнэр Ч.Эрдэнэсувд, хадам эгч Ч.Эрдэнэчимэг, том хүү Б.Есүхэй нар нь ажилладаг аж. Батлутын Есүхэй нь “Хосцогт”, “Азтогтох” гэх хоёр компанид эзэмшигчээр бүртгүүлсэн.  “Азтогтох” ХХК-ийг Бадамсүрэнгийн Баттогтох, Батжаргалын Халиун нартай хамтран эзэмшдэг. Бадамсүрэнгийн Баттогтох нь Орхон аймгийн Баян-Өндөр сумын ИТХ-ын төлөөлөгчөөр сонгогдон ажиллаж байна. Түүнчлэн Д.Батлут туслахаараа ажиллаж байсан Б.Мөнхбаярыг Баян-Өндөр сумын Засаг даргад өрсөлдүүлэн томилуулаад багагүй хугацаа өнгөрөөд буй. Өөрөөр хэлбэл, Д.Батлутын Орхон аймаг дахь ноёрхол одоо ч албатуудаар нь дамжин үргэлжилж байгаа бөгөөд цаашлаад төрийн тендерүүд, төсөл хөтөлбөрүүдийг зохицуулсан шиг бие нь ордонд ч бэлчээр нь Орхондоо байсаар байна.