Монгол Улсаас БНСУ-ын Пусан хотод суух Консулын Дипломат төлөөлөгчийн газрын тэргүүн Ц.Жадамбаа Өмнөд Кёнгсан мужийн Олон улсын харилцаа, худалдааны газрын дарга Ким Мин Гю-г хүлээн авч уулзав. Уулзалтын үеэр Ким Мин Гю дарга, Өмнөд Кёнгсан мужийн Кочан хотод байрлах цахилгаан шатны аж үйлдвэрийн цогцолборын талаар танилцууллаа.

    Тус цогцолборт цахилгаан шат болон эд анги үйлдвэрлэдэг 31 аж ахуйн нэгж, цахилгаан шатны аюулгүй байдал, туршилт шинжилгээний газар, Цахилгаан шатны их сургууль, цахилгаан шат үйлдвэрлэгчдийн холбоо зэрэг үйлдвэрлэл, судалгаа, боловсролын бүх түвшний байгууллагууд төвлөрөн байрладаг байна.

    Уулзалтын үеэр Монгол Улстай цахилгаан шатны үйлдвэрлэл, судалгаа болон боловсролын салбарт харилцан туршлага солилцох, хамтарсан төсөл хэрэгжүүлэх боломжийн талаар санал солилцов. Энэхүү санаачилгыг дэмжиж, холбогдох байгууллагуудад уламжлан ажиллахаа илэрхийлээд, Кочан хотын цахилгаан шатны үйлдвэр, судалгааны байгууллагуудын үйл ажиллагаатай газар дээр нь танилцах сонирхлоо мөн илэрхийлэв.  Мөн Өмнөд Кёнгсан мужийн захирагч Пак Ван Сү 2025 оны есдүгээр сарын 18-19-ний өдрүүдэд Монгол Улсад хийх албан айлчлал хийх үеэр дээрх асуудлын хүрээнд холбогдох албан хаагчидтай уулзалт зохион байгуулах талаар санал солилцлоо.