Жүжигчин Ц.Номин, У.Уянга хоёр нэгдэн “Melon film”-ийг байгуулж, “ДДэш” телевизтэй хамтран эл киног бүтээжээ. Ингээд гол дүрийнх нь нэг болох Сараагийн дүрд Б.Хунцэнгүүн тоглосон байна. Бид энэхүү бичвэрээрээ эл киноны гол дүрийн гурван эмэгтэй болох тус жүжигчдийн тухай уншигч танд онцлон хүргэж байна.

СОЛОНГО БУЮУ ЖҮЖИГЧИН Ц.НОМИН

                     “Хайрын клуб” кинонд анхлан гол дүр бүтээж, СУИС-ийн жүжигчний ангид суралцан, төгсөх жилээ “Фантастик” продакшны “37-р Точка” киноны Солонгын дүрд тоглож, үзэсгэлэнтэй, хэрсүү дүрүүдээрээ үзэгчдийн хайрыг татдаг уран бүтээлчдийн нэг бол Ц.Номин. Анх Солонгын дүрд тоглох болж, зохиолтойгоо танилцсан тухайгаа “Хүний санаанд багтамгүй зүйл их байсан. Анх зохиолоо уншиж байхдаа л “Хүүе, би ингэх юм уу. Ийм юм хийж болох юм байх даа” гэж гайхдаг байсан. Тэгэхдээ зохиолын дүр ямар байхаас үл шалтгаалж жүжигчин тухайн дүрээ гаргах ёстой. Солонго бол гэр бүлийн халуун, дулаан, гэгээн байдлыг бүтэн авч үлдэх  оролдлогыг үргэлж хийдэг цагаахан, эрх охин. Үнэхээр дүрээ хайрлахгүй байхын аргагүй л дээ. Бусад дүрээс илүү сэтгэл хөдлөл өндөртэй санагдсан” гэж ярьсан байдаг.

    Мөн тэр “37-р Точка” киноноос гадна “Хүний цаана”, “Манан зүсэгч”, “One night”, “Hight school”, “Манайд ирсэн дурлал” зэрэг олон киноны гол болон туслах дүрийг чадварлаг бүтээсэн. Эдгээрээс “Манайд ирсэн дурлал” киноны дүр нь хөгжилтэй, хөгтэй, цайлган цагаан Ц.Номинг бидэнд нээн харуулсан нь сонирхолтой байв. Ингээд харахаар түүний хувьд амьдрал дээрээ илүү хэрсүү, шулуун шударга, зоригтой, хатуу чанга байж чаддаг бол дүрүүд нь эсэргээрээ эрх танхи, гэнэн цайлган, дураар байдаг гэмээр. Багаасаа хөтлөгч, нэвтрүүлэгч, жүжигчин болохыг мөрөөддөг байсан түүний хувьд өнөөдөр мөрөөдлөө биелүүлэн яваагийн зэрэгцээ ээжийнхээ урлагийн хүн болох мөрөөдлийг ч давхар гүйцээн биелүүлж яваагаараа бахархан ярьдаг юм билээ. Одоо харин үзэгчид түүнтэй эдгээр өдрүүдэд уран бүтээлч найзтайгаа хамтран шинэхэн фильмээ нээж, анх удаа продюсераар нь ажилласан, “Хундага дүүрэн хов” киноных нь Энхмаагийн дүрээр “уулзаж” байна. Эл бүтээл бүх кино сангуудаар гарч байгаа юм. Авхаалжтай, сэргэлэн дүрийн эзэн түүнд уран бүтээлийн өндөр амжилт хүсье.

СУВДАА БУЮУ ЖҮЖИГЧИН У.УЯНГА

      “Фантастик” продакшны “18 нас би чамд хайртай” кинонд анхлан дүр бүтээж, дараа нь “37-р Точка” киноны Сувдаагийн дүрийг бүтээсэн У.Уянгыг бид мөн цөөнгүй дүрээр нь мэдэх билээ. Тэр дундаа чинээлэг айлын эрх танхи, энхрий зөөлөн, ихэмсэг бардам охин болох Сувдаагийн дүрээр нь андахгүй. Анх “37-р Точка” кинонд тоглох болсон талаараа тэрбээр “18 нас би чамд хайртай” кинонд тоглосноос хойш хүүхэд гаргаад хэсэг гэртээ байсан. Тэр үедээ фэйсбүүкэд тайрмал үстэй зургаа оруулаад “Үсээ тайрчихдаг юм бил үү” гэх пост оруултал  Б.Тамир ах над руу яриад, “Чи үсээ тайруулахгүй шүү. Чамайг нэг кинонд тоглуулахаар ярьж байгаа. Студид ирээд уулзаарай” гэснээр анх зохиолоо уншаад, орохоор шийдсэн. Сувдаа бол гэнэн, аз жаргалтай, дэврүүн охин шүү дээ. Энэ ч утгаараа эмэгтэй хүн бүрийн дотор Сувдаа байдаг болов уу гэж боддог” гэж ярьсан байдаг.

     Түүний хувьд багадаа циркт уран нугардаг байж байгаад дараа нь бүжиглэдэг болж, урлагтай салшгүй холбоотой байсаар кинонд жүжигчнээр ажиллах болжээ. Түүний тоглосон өөр нэгэн дүр бол “No Rules” киноны дүр. Тэгвэл тэр энэ удаад найзтайгаа хамтран фильм байгуулж, анхны киногоо хүргээд буй нь “Хундага дүүрэн хов”. Мөн гол дүрийн нэг болох Намуунгоогийн дүрээр уулзаж байна. Энэ удаад тэр эрх танхи, энхрий хонгор Сувдаагаас тэс ондоо хөгжилтэй, дэггүй дүрийг бүтээсэн байна лээ. Налайхад бага нас нь өнгөрч, багаасаа л хот руу циркийн дугуйландаа микронд суугаад явчихдаг биеэ даасан, хэрсүү байсан нь кино гэх цаг наргүй, ачаалал өндөртэй, нөр их хөдөлмөр шаардсан салбарт амжилттайгаар хүч үзэж, өөрийгөө сорьж чадварт сургасан гэнэ. Түүнд уран бүтээлийн их амжилт хүсэж, хамтран байгуулсан шинэхэн фильмээсээ үзэгчдийн хайр талархлыг хүлээсэн олон сайхан бүтээл хийнэ гэдэгт итгэлтэй байна.

ЗАЛУУХАН УДВАЛ БУЮУ ЖҮЖИГЧИН Ц.ХУНЦЭНГҮҮН

       Б.Хунцэнгүүнийг бид “Хазаар цэцэгсийн дуулал”, “Гэгээн учрал”, “No Rules”, “Миний хайртай Пабло”, “Үүрдийн хайр”, “Улаан цэцэг”, “Өв залгамжлагч”, “Эрдэнэсийн арал”, “Тусгал” тэргүүтэй олон киноны гол болон туслах дүрд тоглосныг мэдэх билээ. Тэдгээрийн дотроос үзэгчид ХХ зууны манлай эмэгтэй, Төрийн шагналт, зохиолч С.Удвалын амьдрал, уран бүтээлийг өгүүлсэн “Улаан цэцэг” кинонд залуу Удвалын дүрийг бүтээснээр нь илүүтэй андахгүй билээ. Нэгэн зуунд өөрийн үйл хэрэг, бүтээсэн гавьяа, туурвисан зохиол, бүтээлээрээ манлайлан амьдарч, хүүхэд, эмэгтэйчүүдийн эрх чөлөөний төлөө дуу хоолой болж явсан сэхээтэн эмэгтэйн залуу насанд тоглоно гэдэг ямар ч залуу уран бүтээлчид олдох ховор боломж. Ц.Хунцэнгүүн энэ дүрийг үнэхээр ч бардам, ихэмсэг, зарчим журамтай нь өв тэгш сайхан бүтээж чадсан гэдгийг үзсэн хэн бүхэн санал нэгдэх биз ээ.

2021 онд СУИС-ийг жүжигчин мэргэжлээр төгссөн тэрбээр оюутан ахуй байхаасаа л кинонд тогложээ. Ихэвчлэн дурлалт бүсгүйн дүрд тоглодог түүний хувьд мөн онцлог нэг дүр бол “No Rules” киноны дүр. Хүчирхийлэгч, харгис хүний эрхэнд амьдарч, эрх чөлөөгөө боогдуулж байгаа ч хэзээ нэг өдөр охинтойгоо хоёул амар тайван сайхан амьдарна гэж итгэдэг эмэгтэй. Энэ удаад харин тэр “Хундага дүүрэн хов” киноны гол дүрийн нэг болох Сараагийн дүрийг бүтээсэн байна. Үеийн эмэгтэй уран бүтээлч дундаа тоглосон кино, оролцсон уран бүтээлээрээ тоо илүү, дүр бүхнээ чадварлаг бүтээдэг түүнд амжилт хүсье. Түүний дүрүүд энхрий зөөлөн мөртлөө эрх дураар, итгэлтэй, зоримог, тэгсэн мөртлөө тэрслүү.