Хүндийн өргөлтийн Ази тивийн аварга, Үндэсний шигшээ баг, Онцгой байдлын ерөнхий газрын “Аврагч” спорт хороо 120 дугаар ангийн тамирчин, ОУХМ Ганзоригийн Ануужин Говь-Алтай аймгийн Баян-Уул сумын уугуул юм билээ. Тэрбээр 2022 оны Ази тивийн аварга шалгаруулах тэмцээнээс н хоёр хүрэл медаль хүртэж байсан бол 2023 онд амжилтаа ахиулж 64 кг-ын жинд гурван алтан медалийг хүртэж Ази тивийн аварга болсон юм. Харин 2024 онд Узбекистаны Ташкент хотод болсон Ази тивийн аваргын 64 кг-ын жинд огцом өргөлтөөр 91 кг-ыг өргөж мөнгөн медаль хүртсэн билээ.

    Ази тивийн аварга, ОУХМ Ганзоригийн Анужин хүндийн өргөлтийн спортоор 12 дахь жилдээ хичээллэж байгаа. Анх тэр 2010 оноос хөнгөн атлетикаар хичээллэж эхэлсэн гэдэг. Өвлийн улиралд хөнгөн атлетикийн тамирчид гадаа бэлтгэл хийх боломжгүй байдаг тул хүндийн өргөлтийн зааланд хүчний бэлтгэл хийж байгаад энэ спорттой холбогдсон гэсэн. Нэгэн удаа хүндийн өргөлтийн тэмцээн болж, оролцох тамирчны тоо дутаад байсан тул багш нар түүнийг техник заалгуулаад тэмцээнд оролцохыг санал болгож л дээ. Улмаар бэлтгэл хийж эхэлтэл багш нар “Хүндийн өргөлтийн техникийг ийм хурдан сурдаг тамирчин ховор байдаг юм аа. Чамд төрөлхийн авьяас байна, хүндийн өргөлтөөр хичээллэж үзэх үү” гэсэн санал тавьснаар хүндийн өргөлтийн тамирчин болсон түүх эхэлжээ.

    Түүний сонгосон зам зөв байсан нь УАШТ-д найман удаа түрүүлж, улсын рекорд, дээд амжилтыг хэдэнтээ тогтоож, Азийн аваргаас алт, мөнгө, хүрэл медаль хүртсэн бахдам амжилтуудаас нь харагдана. Ялангуяа 2023 оны Азийн аваргын алтан медаль түүний хувьд хамгийн эрхэм. Өмнөх жил нь тивийн аваргаас хүрэл медаль аваад байсан тул тэрхүү тэмцээнд “Ногт ганзагалаж” очсон нь мэдээж. Өмнөд Солонгосын  Жинжү хотноо зохион байгуулдсан хүндийг өргөлтийн насанд хүрэгчдийн Азийн аварга шалгаруулах тэмцээний эмэгтэйчүүдийн 64 кг-ын жинд огцом өргөлтөөр 93 кг, түлхэлттэй өргөлтөөр 118 кг, нийлбэрээр 211 кг өргөснөөр Монголын хүндийг өргөлтийн тамирчдаас Азийн аварга болсон хоёр дахь тамирчин болсон билээ. ОУХМ Г.Анужин Азийн аварга болохдоо арын тамирчнаасаа дөрвөн килограмын илүү өргөж, алтан медаль хүртсэн юм.

     Харин Г.Анужин Ази тивийн аварга болсон амжилтаа их л даруухан байдлаар “Тухайн үед бэлтгэл маш сайхан ханасан болохоор өөртөө итгэлтэй байлаа. Багш надад чиний цаг ирсэн, чи хангалттай бэлтгэгдсэн гэх зэргээр дэмжиж, урмын үг хэлэн, урамшуулж байсан нь ч амжилттай өргөхөд нөлөөлсөн. Ер нь бие эрүүл, бэлтгэл ханасан тамирчин сэтгэл зүй сайтай байдаг юм билээ.  Азийн аварга болох тэр мэдрэмж үнэхээр гоё байсан. Мэдээж мөнгө, хүрэл медаль үнэ цэнэтэй л дээ. Гэхдээ алтан медаль авч, төрийнхөө дууллыг сонсох хамгийн эрхэм байлаа” гэж хариулж байлаа.

    Дэлхийн аварга, гавьяат тамирчин М.Анхцэцэгийн орыг залгаж, дэлхийн дэвжээнээс медаль зүүх том зорилго, том хүсэл, мөрөөдөл Г.Анужинд бий.  Харин энэ талаар Г.Ануужин “Үнэнийг хэлэхэд ДАШТ-ий медаль тийм ч хол санагддаггүй. Бие эрүүл болж, формдоо ороод ирэхээр болох л байх. Дэлхийн аваргаас медаль авах хэмжээний өргөлтийг бэлтгэл дээр олон удаа хийж байсан. Бүх юмны тохироо бүрдэнэ гэж байдаг. Тэр мөч нь хараахан ирээгүй байгаа юм болов уу.  ДАШТ-ээс медаль авч, М.Анхцэцэгийнхээ амжилтын буухиаг үргэлжлүүлэх чинь хүсэл, зорилго надад байдаг” хэмээн ярьж байсан юм.

    Тэрбээр 2024 оны арванхоёрдугаар сард Бахрейн Улсын Манама хотод болсон ДАШТ-д бага зэрэг зовуурьтайгаар 71 кг-ын жинд оролцож, огцомоор 98 кг, түлхэлттэй өргөлтөөр 117 кг, нийлбэрээр 215 кг өргөсөн амжилтаар жингийнхээ 28 тамирчнаас 17 дугаар байрт орж, санасан хэмжээндээ өрсөлдөж чадаагүй. ДАШТ-ээс ирсэн даруйд бэртлээ эдгээхэд анхаарч эхэлсэн хэдий ч бэртэл нь гүйцэд эдгэрч амжаагүй байхад 2025 оны УАШТ-д өрсөлдсөн билээ. Г.Анужин 2025 оны УАШТ-д түрүүлж, улсын аваргын ес дэх алтан медалиа авахыг хүссэн байх. Тэрбээр гам барьж, бүрэн эдгэрэхийг хүлээлгүй, тэсвэр, тэвчэээр заан УАШТ-д өрсөлдөж мөнгөн медаль хүртсэн билээ.

    Г.Анужин “Миний найз, дэлхийн аварга, МУГТ М.Анхцэцэг шигшээ багийн тамирчдад урам зориг, зөв үлгэр дуурайлал болж яваа. Анхаа хувь хүнийхээ хувьд мэдрэмжтэй, авьяастай. Сэтгэл зүй өндөртэй, дайчин тамирчин. Анхаа бидэнд “Монгол хүн” дэлхийн аваргаас алтан медаль авч болдог юм аа гэдгийг яруу тодоор харуулсан. Энэ том үлгэр дуурайлал, бодит жишээг бид харж, урам зориг, эрч хүчээр биеэ цэнэглэж явдаг даа. М.Анхцэцэг дэлхийн аварга болох, дэлхийн медальтан болох боломж нөөц байна аа гэдгийг өөрийн биеэр үлгэрлэн харуулсан. Тийм болохоор бид М.Анхцэцэгийнхээ гаргасан тэр замаар, тэр жимээр л явж байгаа. Шигшээ багт ийм мундаг тамирчин байгаа нь том аз завшаан шүү” хэмээн хэлсэн нь бий.