Байгаль орчин, уур амьсгалын өөрчлөлтийн яам (БОУАӨЯ)-ны Төрийн захиргаа удирдлагын газрын даргын албан үүргийг түр орлон гүйцэтгэгчээр Т.Золбаярыг 2025 онд томилсон нь Төрийн албаны тухай хуулийн үндсэн зарчмыг илт зөрчсөн, хууль бус томилгоо болсон гэв үү.   

Т.Золбаяр нь дэс түшмэлийн ангилалд ажиллаж байсан ч төрийн жинхэнэ албан хаагчийн тангараг өргөсөн эсэх нь тодорхойгүй. Төрийн албаны тухай хуулийн 36 дугаар зүйлд заасан тангараг өргөх үндсэн шаардлага биелээгүй нь ноцтой зөрчил юм.

    Мөн Засгийн газрын хяналт хэрэгжүүлэх газарт ахлах шинжээчээр томилогдохдоо тусгай шалгалт өгөөгүй, ахлах түшмэлийн мэргэшүүлэх сургалтад хамрагдаагүй. Хуулийн 33 дугаар зүйлийн 33.3-т заасан шаардлагыг үл биелүүлсэн нь шатлан дэвших зарчмыг илт зөрчсөн хууль бус үйлдэл болсон гэнэ.

    БОУАӨЯ-нд дэс түшмэлээс шууд эрхэлсэн түшмэлийн ангилалд шилжин томилогдсон нь ахлах түшмэлийн шатлалыг бүрэн алгассан бөгөөд хуулийн 22, 23, 26, 27 дугаар зүйлүүдийг илт зөрчжээ. Үүн дээр нэмээд, Төрийн албаны тухай хуулийн 21 дүгээр зүйлд заасан зэрэг дэвийг Т.Золбаяр авсан эсэх нь тодорхойгүй, энэ талаарх бүртгэл Төрийн албаны зөвлөлийн мэдээллийн санд байхгүй байгаа нь дахин нэг ноцтой зөрчил гэж үзэхээр байгаа ажээ. 

    Дээрх мэдээллээс харахад, БОУАӨГЯ-нд хийгдсэн энэ томилгоо нь зөвхөн хууль зөрчсөн үйлдэл төдий бус, төрийн албанд үнэнчээр олон жил ажиллаж, хууль ёсны шалгалт, шатлан дэвшлийн бүх шаардлагыг биелүүлж ирсэн шударга албан хаагчдын итгэл, нэр төрийг үл тоомсорлосон, тэдний хөдөлмөрийг дорд үзсэн ноцтой явдал аж.

    Ийм хууль бус томилгоо нь шударга ёсыг чанд сахиж буй төрийн албан хаагчдын урам зоригийг мохоож, төрийн албаны шударга тогтолцоонд иргэдийн итгэлийг алдагдуулж байна. Тиймээс эрх бүхий шийдвэр гаргах түвшинд энэ асуудлыг яаралтай шалгаж, хууль бус томилгоог даруй хүчингүй болгож, шударгаар хөдөлмөрлөж буй төрийн албан хаагчдын хууль ёсны боломж, нэр хүндийг хамгаалахыг иргэд шаардаж эхэлжээ. БОУАӨЯ-нд хууль бусаар томилогдсон Т.Золбаярыг хэзээ чөлөөлөх вэ, Б.Батбаатар сайд аа.