Монголын үндэсний бөхийн холбооны Япон Улс дахь салбар холбоо байгуулагдлаа. Энэхүү холбоо нь хилийн чанад дахь дөрөв дэх холбоо болж байна. Үүнээс өмнө Европ, Австрали тивд болон Өмнөд Солонгос Улсад ажиллаж амьдарч байгаа бөхийн зүтгэлтэн, бөхчүүд, иргэдийн оролцоотой салбар холбоо байгуулагдаж байв.

   Эдгээр салбар хороод нь Монгол үндэсний бөхөө гадаад улс оронд түгээн дэлгэрүүлэх, хүүхэд залуучууд нь үндэсний бөхөөрөө дамжуулан Монгол хэл, зан заншил, өв соёлоосоо алсрахгүй байх хэтийн зорилгыг хэрэгжүүлж ажиллахаар байгуулагдан ажиллаж байгаа билээ.

    МҮБХ-ны Япон Улс дахь салбар холбооны ТУЗ-ийн дарга, гүйцэтгэх захирал, нарийн бичгийн дарга, Удирдах зөвлөлийн гишүүдээр Завхан аймгийн Дөрвөлжин сумын харьяат, аймгийн арслан П.Батмөнх, Говь-Алтай аймгийн Тонхил сумын харьяат Б.Түвшинбаатар, Төв аймгийн Батсүмбэр сумын харьяат, аймгийн арслан Б.Дамба, Японы мэргэжлийн сүмо бөхийн магишира Азүмарюү С.Тодбилэг, чөлөөт бөхийн спортын мастер С.Мөнхсүх, жүдо бөхийн ОУХМ С.Энхчимэг, сагсан бөмбөгийн спортын мастер С.Одгэрэл нар сонгогдон ажиллахаар боллоо.