Тулгар төрийн 2232, Их Монгол Улсын 817, Үндэсний эрх чөлөө, тусгаар тогтнолоо сэргээн мандуулсны 112, Ардын хувьсгалын 102 жил, Ардчилсан хувьсгалын 33 жилийн ойн Үндэсний их баяр наадмын хүчит бөхийн барилдаанд Архангай аймгийн Цэнхэр сумын харьяат Мягмарын Бадарч түрүүлж, улсын арслан болсон билээ. Допингийн эсрэг үндэсний төвөөс шинжилгээ өгсөн 32 бөхөөс нэгээс нь допинг илэрсэн талаар мэдээлэл өгөөд байгаа. Мөн тухайн бөх В сорьцоо өгөх хүртэл нэрийг нь зарлах боломжгүй талаар мэдэгдээд байсан юм.

Улсын арслан М.Бадарчийн шинжилгээнээс допинг илэрсэн гэх мэдээлэл цацагдаад байгаа билээ. Допинг илэрсэн бөхийн нэрийг өнөөдөр зарлах байсан ч В сорьцоо өгөх хүсэлт гаргасан гэх мэдээлэл байна.

Энэ талаар нэр холбогдоод байгаа улсын арслан М.Бадарчтай холбогдож тодрууллаа. Тэрбээр “Допингийн шинжилгээний талаарх мэдээллийг та бүхэн хаанаас олдог юм бэ. Миний мэдэхгүй зүйл байна. Цахим сүлжээнд ийм мэдээлэл гараад байгаа бол цахим сүлжээнээс асуух нь зүйтэй. В сорьцын талаар би мэдэхгүй” гэлээ.