Монгол Улсын баатар “Эрдэнэт үйлдвэр” ТӨҮГ сүүлийн 10 жилд төсвийн орлогын найм орчим хувийг дангаараа бүрдүүлж байна.

Тодруулбал, цар тахлын хүнд цаг үед буюу 2020 онд нэг их наяд төгрөгийн татвар, шимтгэл, ногдол ашгийн орлогыг улс, орон нутгийн төсөвт төвлөрүүлсэн нь тухайн үед түүхэндээ хамгийн их үндэсний баялаг бүтээсэн жил болж байлаа. Тэгвэл 2021 онд энэ амжилтаа ахиулж, улс, орон нутгийн төсөвт 1.2 их наяд төгрөг төвлөрүүлсэн.

Өөрөөр хэлбэл 2021 онд Эрдэнэт үйлдвэрийн уурхайчин хамт олон хоногт 8.5 тэрбум төгрөгийн борлуулалт хийж, 3.4 тэрбум төгрөгийг улс, орон нутгийн төсөвт төвлөрүүлэн ажилласан гэсэн үг. Энэ нь 2016 онтой харьцуулахад долоо дахин өссөн үзүүлэлт юм. 

Мөн Эрдэнэт үйлдвэр 7,000 гаруй хүнийг ажлын байраар хангаж, нийт экспортын 10 орчим хувийг дангаараа бүрдүүлэн Монгол Улсын эдийн засагт жин дарах хувь нэмэр оруулаад зогсохгүй шинэ зууны хөгжил дэвшлийн түүчээ болон ажиллаж байна.

Түүнээс гадна цар тахлын хүнд цаг үед айл өрх, аж ахуйн нэгжүүдийн цахилгаан, дулаан, уур, ус, хог хаягдлын үйлчилгээний төлбөрт 1.1 их наяд төгрөгийн санхүүжилт хийсэн нь байгалийн баялгийг ард түмэндээ тэгш хүртээх, Үндэсний баялгийн сантай болох эхлэлийг тавьсан юм. 

Эрдэнэт үйлдвэрийн хамт олон эхний найман сарын байдлаар улс болон орон нутгийн төсөвт нэг их наяд төгрөгийн орлого төвлөрүүлэн амжилттай ажиллаж байна.