Боловсрол шинжлэх ухааны сайд Л.Энх-Амгалан “Хэд хоногийн өмнө нэгэн иргэн “Галзуугийн эмнэлэг шиг цэцэрлэг нээж болохгүй” гээд хана, шалыг нь ногооноор будаж, хэдэн сандал эгнүүлээд тавьсан өрөөний зураг нийтэлж, цахим хуудастаа оруулсан. Би тухайн иргэний бичсэн, зургийг нь оруулсан цэцэрлэгийг хайлгасан. Монгол Улсад тийм цэцэрлэг ерөөсөө байхгүй юм байна лээ. Нэр, нүүрээ нуусан бүлэг зохион байгуулалттайгаар, санаатайгаар оруулж байгаа юм билээ. Яагаад болж бүтэж байгаа зүйлийг хараар будаж, үгүйсгээд байгааг ойлгохгүй байна” хэмээн ярьсан байдаг.

Тэгвэл иргэний оруулсан зураг, Л.Энх-Амгалан сайдын хайгаад олохгүй байгаа цэцэрлэг Хан-Уул дүүргийн 309 дүгээр цэцэрлэг байжээ. Тодруулбал, 309 дүгээр цэцэрлэгийн бага бүлэг байсан аж. Тус ангид 43 хүүхэд суралцаж байна.