“Этик” продакшны жүжигчин А.Энхжингийн гэр бүл долоон настай хүүгээ сургалтын төвийн багшдаа зодуулж, гэмтсэн талаар бичсэн байдаг. Тодруулбал, түүнийг хүүг “Оюуны чадамж боловсролын төв”-ийн багш согтуурсан үедээ зодсон гэх.

        Энэ талаар “Оюуны чадамж боловсролын төв”-ийн захирал М.Хашчулуунаас тодрууллаа. Тэрбээр “Би гадаадад томилолттой явж байгаад өнгөрсөн шөнө ирлээ. Болсон үйл явдлын талаар тодруулахаар ажиллаж байна. Жүжигчин А.Энхжингийн хүүхдийг зодсон гэх багштай утсаар ярьж, лавлаж асуусан. Багш хэлэхдээ “Би хүүхдийг нь зодоогүй. Тийм учраас уучлалт гуйхгүй” гэсэн байр суурь илэрхийлж байна. Тэгээд ажил дээр ирэхээр нь уулзаж, лавлаж асуухаар боллоо. Харин жүжигчин А.Энхжинтэй холбогдоход “Хүүхдийг минь зодсон, цагдаагийн байгууллагад хандсан. Багшаар уучлалт гуйлгамаар байна” гэж хэлсэн. Би Монголд очоод шийдэж өгнө гэдгээ илэрхийлж, хэлсэн. Шалгаж байгаа цагдаатай нь холбогдох гэсэн боловч утас нь болохгүй байна. Хүүхэд зодсон гэх багш нь эмэгтэй, манай сургалтын төвд нэг сарын хугацаатай цагийн багшаар ажиллаж байсан. Гэрээнийх нь хугацаа наймдугаар сарын 20-нд дууссан. Тодорхой мэдээлэл авч, хоёр талын хүмүүстэйгээ уулзаж, тайлбар авчихаад эргээд тодорхой хариу өгье. Хүүхдийн ар гэрийнхэн багшийг архи согтууруулах ундаа хэрэглэсэн гээд байгаа. Энэ нь нотлогдохгүй байгаа. Анги танхимд хяналтын камер байхгүй, сургалтын төвийн хонгил камертай. Тухайн багш нь зүрхний өвчлөлөөс шалтгаалж, долоогонын ханд уудаг. Долоогонын ханд уусныг нь архи уусан гэж бодож байж ч магадгүй юм. Монголд ирсэн учраас өнөөдөр шийдэж, даруй арга хэмжээ авах болно” гэлээ.