Улсын төсвийн хөрөнгө оруулалтаар хэрэгжиж байгаа авто зам, зогсоолын ажлын явцтай Ерөнхий сайд Л.Оюун-Эрдэнэ, Нийслэлийн Засаг дарга бөгөөд Улаанбаатар хотын захирагч Д.Сумъяабазар нар өчигдөр танилцсан билээ.

Энэ үеэр ерөнхий сайд Л.Оюун-Эрдэнэ

-“Тамхи татаад хаячихвал хэдэн төгрөгийн торгуультай вэ” хэмээн Хотын дарга, орлогч болон бусад албаны хүмүүсээс асуув.

-Улаанбаатар хотын Барилга, хот байгуулалт хариуцсан орлогч Б.Сүхбаатар “50 мянган төгрөгийн торгуультай”.

-Ерөнхий сайд Л.Оюун-Эрдэнэ “50 мянган төгрөгийн торгуулиа 50 сая төгрөг болго. Тэгээд яах вэ дээ, мөнгөтэй байвал болно шүү дээ. Хяналтын камераараа хянаж, тоог нь нэм” гэсэн юм.

     Тэгвэл бид Хотын орлогч Б.Сүхбаатараас тамхины иш хаясан тохиолдолд 50 сая төгрөгөөр торгох боломж байгаа эсэхийг тодрууллаа. Тэрбээр “Би орон сууцны холбоотой асуудлаа мэднэ. Бусдыг нь мэдэхгүй. Өчигдөр би Ерөнхий сайдтай гэр хорооллын дахин төлөвлөлтөөр л хамт явсан. Тамхины иш хаявал 50 сая төгрөгөөр торгох нь надад хамаарах юм биш. Би 50 сая төгрөгийн торгууль тавьдаг хүн биш. Би тамхины иш хаявал 50 сая төгрөгөөр торгох асуудал дээр толгой дохиж, хамт яваагүй. Юу яриад байгаа юм бэ” гэв. Мөн тэрбээр “Буруу хүрдтэй машиныг ирэх сараас эхэлж зорчуулах, зорчуулахгүй гэх асуудлыг би мэдэхгүй. Хотын дарга л “Буруу хүрдтэй машиныг хязгаарлах саналаа хэлэлцье” гэж хэлж байна лээ” гэлээ.

Угтаа тэрбээр Ерөнхий сайд, Хотын даргатай харилцан ярьж, “Буруу хүрдтэй машиныг хязгаарлах асуудлыг энэ наймдугаар сарын чуулганаар хэлэлцэнэ. Өмнө нь нэг удаа энэ асуудлыг ярьсан чинь гал ирээд, чадаагүй” гэж ярьсан юм.