“Приус-20” автомашины ар хэсгийг чиргүүл болгож, машинаасаа чирсэн жолоочийн бичлэг цахим сүлжээнд цацагдаад байна. Бид тус автомашины жолооч Б. Эрдэнэбаатартай холбогдож, хийсэн ажлынх нь талаар тодрууллаа.

           Жолооч Б.Эрдэнэбаатар хэлэхдээ “Цар тахлын үед гэртээ байх хугацаандаа машинаа чиргүүлтэй болголоо. Аялалд явахад майхан маш чухал байдаг. Тийм учраас хуучин төмрийн хаягдал, эвдэрсэн “Приус-20” автомашины ар хэсгийг ашиглаж, унтлагын зориулалттай чиргүүл хийсэн. Ингэхдээ ах, дүү, таньдаг, таньдаггүй хүмүүсээс тусламж хүсэж, хэрэггүй болсон эд зүйлсийг нь цуглуулж, хооронд нь гагнаж, бэхэлсэн байгаа. Би “Приус-20” автомашинаа унаад найман жил болж байна. Энэ хугацаанд машинаараа 100 гаруй километр газар том жийп чирч үзлээ. Шаварт суусан том оврын суудлын автомашиныг чирч, гаргалаа. Тэгээд “Энэ том машиныг чирэхэд “Приус” машины мотор эвдрэхгүй байна. Тэгэхээр өөрт нь тохирсон чиргүүл чирвэл болохгүй зүйл байхгүй юм байна” гэж бодсон. Хэсэг хугацаанд чиргүүл судалж, “Яавал авсаархан, эвтэйхэн байх вэ” гэдэгт анхаарлаа хандуулсан. Тэгсэн чинь ОХУ-ын нэгэн сайтад “Harrier” автомашины араас “Harrier” чирээд, чиргүүл болгочихсон байгаа бичлэг үзсэн. Тэндээс санаа авч, чиргүүлээ хийж эхэлсэн. “Приус” машин монголчуудын эдэлгээ, гарын аяыг даасан, шалгарсан автомашин юм билээ. Миний хийсэн чиргүүл зөвхөн унтлагын зориулалттай шүү. Хүмүүс буруугаар ойлгоод, эрсдэлтэй байна гэж үзэх вий. Аяллын үед зөвхөн тогоо, шанага, ачаа бараагаа хийгээд машинаасаа чирээд явна. Хөдөлгөөнд оролцоогүй үед ачаагаа буулгаад, майхны зориулалттай ашиглаж, дотор нь тухтай амарна. Доторх сандал зэргийг аваад, модоор шал дэвсчихсэн байгаа. Өөрөөр хэлбэл, миний хийсэн чиргүүл явдаг төмөр майхан гэсэн үг. Манай гэр бүл өнөр учраас аяллаар явахад ачаа багтдаггүй юм. Энэ жил аялахад ачаагаа чиргүүлдээ ачаад, машин дотроо сэлүүхэн тухтай явж болохоор боллоо. Гэхдээ чиргүүлтэй үед зөвхөн засмал замаар нь зорчино. Шороон замаар явахад эрсдэлтэй, аюул ихтэй байх. Магадгүй цагдаа нар биднийг торгоод явуулахгүй байх. Би зөвшөөрөл, улсын дугаар авах талаар судалж үзсэн боловч боломжгүй гэсэн хариу өгч байна лээ. Бид маргааш өглөө аялалдаа Хөвсгөл аймаг руу гарна” гэв.