Үндэсний их баяр наадмыг зохион байгуулах хорооноос мэдээлэл өглөө. Энэ үеэр Хууль зүй дотоод хэргийн яамны төрийн нарийн бичгийн дарга П.Сайнзориг  “Хуулийн талаар товч хэлье. Бид үндэсний их баяр наадмыг зохион байгуулах асуудлыг 2003 оноос хуульчилж ирсэн. Зарим зүйл заалт тодорхойгүй хуульчилснаас болоод зохион байгуулалтын асуудал гарч ирсэн. Энэ ч утгаар энэ жил хуулийг шинэчлэх шаардлага байна хэмээн баталсан байгаа. Энэ жил баяр наадмыг төрийн байгууллагын оролцоотойгоор шийдээд явна. Цаашид мэргэжлийн холбоод нь илүү баяр наадмыг зохион байгуулах эрхийг ирэх жилээс шилжүүлэх асуудал яригдана. Бөхийн цол болон хурдан морины уралдаантай холбоотой баяр наадмын өдрүүдэд болдог сурын харваанаас гадна шагайн харваа зэрэг төрлүүдийг албан ёсоор оруулж ирсэн байгаа. Эдгээр зүйлсийг илүү тодорхой болгож өгсөн. Хурдан морины талаар бол хүүхдийн асуудал, хурдан морины уралдааны стандарттай холбоотой зүйлийг оруулсан. Энэ жилийн хувьд шилжилтийн зохицуулалтаар явж байгаа. Ирэх жилээс мөн Засгийн газар хуулийн хэрэгжилтийг бүрэн хангаж, Хүнс хөдөө аж ахуйн яам тодорхой ажил хийсний дараа стандартын дагуу бүртгэлжүүлж уралдах асуудлыг ярьж байна. Гадаадаас одоогоор 25 орчим бөх барилдах хүсэлтийг ирүүлсэн байна. Баяр наадмын өдрүүдэд аливаа иргэншил юм уу ялгаварлан гадуурхалт байж болошгүй учир хүсэлтийг зохих ёсоор хүлээж авна гэж бодож байгаа. Эдгээр оролцох бөхчүүд гол төлөв Монгол туургатнууд байгаа гэдгийг онцлох нь зөв байх” гэв.