АИ95 автобензин болон дизель түлшний үнэ өнгөрсөн хоногт 300 төгрөгөөр нэмэгджээ. Одоо АИ95 автобензиний үнэ 3910 төгрөг, дизель түлшний 3740 төгрөг байна. Тэгвэл дээрх асуудлаар Ашигт малтмал, газрын тосны газраас мэдээлэл хийлээ.

Ашигт малтмал, газрын тосны газраас “Дэлхийн зах зээл дээр газрын тосны үнэ сүүлийн нэг жилийн хугацаанд тасралтгүй өсөж байгаа бөгөөд үүнээс хамаарч ОХУ-ын Роснефть компаниас манайд улсад нийлүүлж буй шатахууны хил үнэ мөн нэмэгдээд байна. Тухайлбал, зургадугаар сарын хил үнэ: А-80 автобензин 1174 ам.доллар/тонн, АИ95 автобензин 1274 ам.доллар/тонн, дизель түлш 1095 ам.доллар/тонн болсон нь өмнөх сараас 49-141 ам.доллароор өссөн үзүүлэлт юм. Энэ нь дотоодын зах зээл дэх шатахууны үнэ өсөх нөхцөл байдалд хүргэж байна” гэв.