Өвөрхангай аймгийн Зүүнбаян-Улаан сумын ерөнхий боловсролын сургуулийн төгсөх ангийн сурагч охин бусдын гарт амиа алдсан хэрэг өнгөрсөн оны аравдугаар сард гарсан. Тэгвэл тус хэргийн мөрдөн байцаалт удааширч, үр дүнд хүрээгүйд талийгаач охины аав Г.Өлзийт өнөөдөр Хууль зүй, дотоод хэргийн сайд Х.Нямбаатар, Улсын ерөнхий прокурор Б.Жаргалсайхан нарт гомдол гаргалаа.

                  Гомдол гаргаж байгаа талаараа талийгаачийн аав Г.Өлзийт “Би өнгөрсөн оны аравдугаар сард хэрцгий алуурчны гарт охиноо алдсан. Өвөрхангай аймагт өнгөрсөн 2020 оны арваннэгдүгээр сараас мөрдөн байцаалт эхэлсэн. Мөрдөн байцаалт долоон сарын турш үргэлжилсэн ч, дорвитой шийдвэр гараагүйн улмаас өнөөдөр би Хууль зүй, дотоод хэргийн сайд Х.Нямбаатар, Улсын ерөнхий прокурор Б.Жаргалсайхан нарт гомдол хүргүүлж байна. Эцэс хүртэл нь, дорвитой шийдвэр гарч, арга хэмжээ авах хүртэл би тэмцэнэ” гэв.

Иргэн Г.Өлзийтийн хүргүүлж байгаа гомдолд “Аймгийн шүүгч, прокурор жирийн малчин иргэд биднийг үл тоомсорлон, хуулийн дагуу ажил үүргээ гүйцэтгэхгүй байгаад туйлын гомдолтой байна. Хэргийг үйлдсэн хэрэгтэн амиа егүүтгэж, шийтгэл хүртэх боломжгүй болсныг ойлгож байгаа. Гэсэн ч хэрэг гарах шалтгаан, нөхцөлийг бүрдүүлсэн хүмүүсийн үйлдлийг шалгаагүй. Үүнд галт зэвсэг худалдаалах, тусгай зөвшөөрөлгүй сум худалдаалах, үүрэг хайнга хандаж, хүний амь эрсдэхэд хүргэсэн багш нар багтаж байгаа”-г онцолсон байна.

Хэргийг эргэн сануулбал, Хэргийг эргэн сануулбал, 17 настай сурагч охиныг нутгийн залуу, 23 настай Б үерхэхийг удаа дараа шаардаж, гуйж байсан гэдэг. Талийгаач залуу алга болохынхоо өмнөх өдөр охинтой аж ахуйн хашаанд уулзаж, дарамталсан байж болзошгүй гэх мэдээллийг эх сурвалжууд өгөөд байгаа. Тус хашаанд тэднийг уулзаж байхад охины анги удирдсан багш, байрны багш харж, ирж уулзсан гэдэг. Ангийн багш нь охиныг дотуур байрны гадаа буулгаж, утсыг нь хурааж аваад оруулсан. Байрны багш нь жижүүртээ хүлээлгэж өгөөд гэртээ харьсан. Охиныг 21:00 цагийн үед ангийнх нь найз буюу талийгаач Б-ийн дүү дотуур байрнаас гаргаж өгсөн. Байрны жижүүр эрэгтэй алга болсныг нь нэг өдрийн дараа мэдэж, ар гэрийнхэнд нь хэл хүргэсэн байдаг. Эрлийн ажиллагааг 10 хоног үргэлжлүүлж, эцэст нь талийгаач О-гийн цогцсыг хэрэгтэн Б-ийн цогцостой хамт уулнаас олсон юм.