“Эмээлт” захад байрлах Хятад үйлдвэр махыг тусгай химийн бодист хольж байна” гэх мэдээлэл иргэнээс ирснээр одоогийн "Химийн хортой, цогцос хадгалах бодистой, цардуултай махны хэрэг" үүсэж, хүнсний аюулгүй байдал хөндөгдөж эхэлсэн. Дуудлагын дагуу холбогдох байгууллагууд, зарим хэвлэл мэдээллийн хэрэгсэл очиж, дүүрэн шингэн бүхий дөрвөлжинд төмөр савнуудад тонн, тонн мах хийсэн байсныг сурвалжилж, ил болгосон байдаг. Тухайн зураг, бичлэгүүд нь 20 гаруй хоног нийгэм даяар түгж, түгшүүрт автуулж, улмаар төрийн анхааралд сая л нэг очлоо. Одоогийн байдлаар Шадар сайд С.Амарсайхан холбогдох хяналт шалгалт хариуцсан байгууллагуудад “Эмээлт” захын махны үйлдвэрийн шалгах үүрэг даалгавар өгөөд байна. 

    Харамсалтай нь, Эмээлт захад нэгдсэн шалгалт хийх сургаар Хятадын махны үйлдвэрүүд агуулахаа хоосолж, нөөцөнд байсан махнуудаа нийслэл рүү тээвэрлэж эхэлсэн. Яг энэ үйлдлийг нь нэр бүхий хэвлэл мэдээллийн хэрэгслүүд илрүүлж, найман тонн мах ачсан нэг машиныг нь барьж авсан байдаг. Ингээд тухайн найман тонн махнаас нь дээж авсан бөгөөд ноцтой нь тухайн дээж гэх 20 гаруй килограмм мах нь гэрэлд гаргамагцаа өнгө нь өөрчлөгдөж, өмхий үнэр ханхалж эхэлсэн нь асуудлыг хурцатгасан. Нийслэлчүүдийн махны хэрэгцээг хангадаг Эмээлт захын дурын нэг үйлдвэрийн мах наранд гармагцаа нь ногоон өнгөтэй болж, өмхий үнэр ханхлуулж эхэлсэн нь ард иргэдийг айдаст автуулсан хэрэг. Хамгийн ноцтой нь, эл хэргийн мөрөөр Мэргэжлийн хяналтын ерөнхий газрын Хүнсний аюулгүй байдал, хөдөө аж ахуйн хяналтын газрын дарга Т.Балжинням очиж, асуудал дагуулсан өнөөх махнаас огтлон авч, Хятад үйлдвэрийн хашаанд чанаж, идэв. Идэх мөртөө "Амт, үнэр нь асуудалгүй байна" гэх дүгнэлтийг газар дээр нь гаргаж, иргэдийг ихээхэн бухимдуулаад буй. Мэргэжлийн хяналтын ерөнхий газрын Хүнсний аюулгүй байдал, хөдөө аж ахуйн хяналтын газрын дарга гэдэг албан тушаал бол бүхэл бүтэн 3.5 сая хүний буюу Үндэсний аюулгүй байдлыг хангаж, нийт хүн амыг хэрэглэж буй хүнсийг хортой, хоргүйг нь лабораторийн дүгнэлтээр хянаж, хариуцаж байх ёстой чухал албан тушаал. Гэтэл Т.Балжинням Хятад үйлдвэрийн махыг лабораторийн дүгнэлтээр бус чанаж идэх байдлаар шинжилсэн нь нийтэд таалагдаагүй юм. 

   Харин Мэргэжлийн хяналтын ерөнхий газрын дарга Б.Баасандорж Хятад үйлдвэрийн хашаанд мах чанаж идсэн ажилтнаа буюу Т.Балжиннямыг шүүмжилж, “Мах чанасан асуудалд миний бие МХЕГ-ын даргын хувьд шүүмжлэлтэй хандаж байна. Байцаагч ч бай, иргэн ч бай тэр компанид асуудал гарсан бол лабораторийн дүн гарсны дараа  махыг хэрэглэх үү, эс хэрэглэх үү гэдгийг шийдэх ёстой. Тэнд мах чанасан хүмүүс лабораторийн ажилтнууд биш юм. Энэ нь өөрөө эрсдэлтэй. Дотроо шүүмжлэлтэй хандаж байгаа учраас  холбогдох хариуцлага ногдуулна” гэсэн. 

    Ажлын хариуцлага алдаж, зохисгүй үйлдэл гаргасан Мэргэжлийн хяналтын ерөнхий газрын Хүнсний аюулгүй байдал, хөдөө аж ахуйн хяналтын газрын дарга Т.Балжинням өөрийгөө өмгөөлсөн зохисгүй тайлбарыг ч хэвлэлд өгөөд амжсан.

  Тэрбээр “Надад хувийн ашиг сонирхол гэж байхгүй. Би төрд 20 дахь жилдээ ажиллаж байна. “Найман тонн махыг өмхийрсөн эсэхийг бодитойгоор үзэгчдэд хүргэе” гэх асуудлыг сэтгүүлч надад тавьсан. Миний хувьд шинжилгээний хариу гараагүй байхад болохгүй гэх байр суурийг илэрхийлсэн. Тухайн үед хувь хүнийхээ үүднээс чанаж, амталж үзсэн болохоос төрийн байгууллагын өмнөөс амталж үзээгүй. Тэр найман тонн махнаас гаргаж ирэхэд ямар ч эвгүй үнэр, амтгүй байсан гэдгийг баттай хэлж байна. Буцалж байсан мах ямар нэгэн  үнэр байгаагүй. Үнэрийг дарах боломжгүй. Цардуул үнэр дардаг бодис биш, эзлэхүүн нэмэгдүүлэгч бодис” хэмээсэн. Үндэсний эрүүл мэндийн аюулгүй байдлыг толгойгоороо, томилогдсон албан тушаалаараа хариуцах ёстой энэ эрхэм ёс зүйгүй үйлдэл гаргаж, түүнийгээ хацайлсан хариу тайлбар өгөөд сууж байгаа нь иргэд болон Мэргэжлийн хяналтын ерөнхий газрын даргын ч бухимдлыг төрүүлж байна.

Тэгвэл дуулиан, шуугианы гол дүрд тоглоод буй мах шинжилдэг амьд лаборатори гэх Т.Балжинням гэгч хэн болохыг танилцуулж байна.

-МХЕГ-ЫН ХҮНСНИЙ АЮУЛГҮЙ БАЙДАЛ, ХӨДӨӨ АЖ АХУЙН ГАЗРЫН ДАРГА Т.БАЛЖИННЯМ ГЭЖ ХЭН БЭ-

  Мэргэжлийн хяналтын ерөнхий газрын Хүнсний аюулгүй байдал, хөдөө аж ахуйн хяналтын газрын дарга Т.Балжинням нь Завхан аймагт төрсөн аж. Тодруулбал, тэрбээр Завхан аймгийн Алдархаан суманд төрж, өссөн бөгөөд 1997 онд уугуул сумынхаа ерөнхий боловсролын сургуулийн аравдугаар ангийг төгссөн байна. Түүний дараа 2004 онд удирдлагын академийг төгссөн аж.

   Тэрбээр 2012 онд Нийслэлийн Мэргэжлийн хяналтын газрын Хүнсний аюулгүй байдлын газрын мэргэжилтнээр ажиллаж байгаад 2017 онд албан тушаал дэвшин, МХЕГ Хүнсний аюулгүй байдал, хөдөө аж ахуйн газрын даргаар томилогджээ. Өөрөөр хэлбэл, тэрбээр энэхүү салбартаа 20 жил ажилласан туршлагатай нэгэн. Харин гэр бүлийн байдлын хувьд түүний эхнэр нь ХӨСҮТ-ийн Тандалт судалгааны албаны Дархлаажуулалтын албаны даргаар ажилладаг бөгөөд хоёр жил гаруй хугацаанд халдварын голомтод ажиллаж, хэвлэлээр дархлаажуулалтын тоог мэдээг дамжуулсан гэж өнгөрсөн онд Хөдөлмөрийн хүндэт медиалаар шагнаж, урамшуулсан байдаг.

  Т.Балжиннямын өөрийн жилийн орлого нь 18 сая, гэр бүлийн орлого нь 37 сая бөгөөд 225 сая төгрөгөөр үнэлэгдэх хоёр нийтийн орон сууцтай, нэг хашаа байшинтай, 10 сая төгрөгийн үнэ бүхий Hyundai, Sonata загварын жижиг машинтай, 24 сая төгрөгийн мал аж ахуйтай, зургаан сая төгрөгийн үнэ бүхий үнэт эдлэлтэй, 18 сая төгрөгөөр үнэлэгдэх 0.7 га газартай, 30 сая төгрөгийн хадгаламжтай байна.