Дорнод аймгийн Халхгол сумын Сүмбэр багийн Ац холбоо гэдэг газар гарсан хээрийн түймрийн үеэр ажилласан онцгой байдлын албан хаагчид гал унтраах техник хэрэгсэл хомс, 100 гаруй километр явган алхаж гал унтрааж байгаа талаар ярьсан байдаг.

Бид энэ талаар Дорнод аймгийн Онцгой байдлын газрын дарга, хурандаа Г. Нармандахтай холбогдож, тодрууллаа.

-Дорнод аймгийн хэмжээнд гал түймэр унтраах, техник хэрэгсэл хэр хангалттай байдаг вэ?

         -Аймгийн хэмжээнд хэчнээн гал түймэр унтраах анги, албан хаагч, техник хэрэгсэл байдаг нь цэргийн нууц. Үүний тоог тодорхой хэлэх боломжгүй гэсэн үг. Ерөнхий мэдээлэл өгөхөд бидэнд олгогдож байгаа багаж хэрэгсэл, хэрэглүүр нь жил ирэх тусам нэмэгдэж байгаа. Ер нь техник хэрэгсэл хангалттай бий гэж ойлгож болно. Засгийн газрын дэмжлэгээр машин, гал унтраах багаж, хэрэгсэл хангалттай олгож байгаа.

-Халхголд гарсан гал түймрийг унтраах үедээ албан хаагчид 100 гаруй километр алхаж, гараараа гал түймэр унтрааж байгаа талаараа ярьсан. Энэ талаар?

          -Гурван өдрийн хугацаанд гал түймэр унтраахдаа хувь хүний барагцаагаар 100 гаруй километр алхсан байж магадгүй. Нэг өдөр 100 гаруй километр алхана гэж байхгүй. Түймрийг хэзээ ч машинаар явж унтраана гэж байхгүй. Байгалийн саад бэрхшээл, учирч болох бүхий л эрсдлээ тооцоолж, гал түймрээ унтраадаг. Зөвхөн манай улсын албан хаагчид явган яваад түймэр унтраагаад байгаа юм биш ээ.