“Оюунлаг ирээдүйн төлөө” уриатай Эргэлт.мн мэдээллийн сайт сэтгүүлч, уран бүтээлчдийнхээ шилдгийн шилдэг бүтээлүүдийг эмхэтхэн “ЭРГЭЛТИЙН НОМЫН САН” цуврал нэртэй 10 ном бүтээж, уншигчдынхаа оюуны санд өргөн барилаа. 

       Номын нээлтийн үеэр СГЗ, нэрт сэтгүүлч Хорлоогийн Цэвлээ “Ийм гэнэтийн зочид, уулзалт болно гэдгийг би ямар урьдчилан мэдэх биш дээ. Гэхдээ энэ сайхан уулзалтад уригдаж ирсэн учраас сэтгүүлч, уран бүтээлч та бүхэнд захиасын чанартай хэдэн үг хэлье. Нэгэн үедээ бидний үеийн сэтгүүлч, нөхөд залуу сэтгүүлч нарт хичээл зааж явсан бол одоо цагт залуу үеийнхэн минь бидэнд зааж зөвлөхөөр болжээ гэдгийг Эргэлт.мн мэдээллийн сайтын Ерөнхий эрхлэгч Э.Хүрэлбаатарын хэлсэн үгнээс ойлголоо. Сэтгүүлчид та бүхэн Монголын хөгжил дэвшилд юу саад болоод байгаа вэ гэдгийг илрүүлэхийн, түүнийг арилгахын төлөө ажиллаж байгаа. Үнэнийн төлөө зүтгэж байгаа. Үнэнийн төлөө явж байгаа учраас эрсдэл хүлээж байгаа шүү. Үнэн үг хэлсэн хүнд хүн өшөөтэй, үхэр унасанд хүнд нохой шийртэй гэдэг юм. Сэтгүүлч нар энэ бичигдээгүй айхтар хуулийг мэдэж байгаа ч эрсдлээс айхгүй явж байгаа нь эр зоригтон, энэ цагийн баатар гэж хэлэх бүрэн боломжтой.

“Эргэлтийн номын сан” цуврал 10 ширхэг номоо өлгийдөн авсан юм байна. Энэ ном цаашид цуврал болон үргэлжлэх юм байна. Миний баримжаагаар 10 хүрэхгүй жилийн дараа 108 боть ном гарах нь гэж би ойлголоо. Номын ач холбогдол нь Монгол Улс цэвэр, ариун, үнэнчээр амьдрах амьдралын нэвтэрхий толь бичиг нь болох болов уу гэж бодож байна. Цаашид сайн сайн бүтээл туурвиж, ард түмнийхээ нүдийг нээж, бүх нийтийн анхаарлыг нэгэн цэгт байрлууж яваасай гэж хүсэх байна” хэмээн захилаа.