-Сэтгүүлч, уран бүтээлч нартаа өөрсдөд нь үнэт өв, уншигчдад ахин дахин шимтэх уншууртай бүтээл,  оюутнуудад  мэргэжлийн сэтгүүл зүйн гарын авлага болгох зорилгоор “Эргэлтийн номын сан” цувралаа эхлүүлж байна-

Оюунлаг ирээдүйн төлөө” уриатай Эргэлт.мн мэдээллийн сайт сэтгүүлч, уран бүтээлчдийнхээ шилдгийн шилдэг бүтээлүүдийг эмхэтхэн “ЭРГЭЛТИЙН НОМЫН САН” цуврал нэртэй 10 ном бүтээж, уншигчдынхаа оюуны санд өргөн барилаа.  Номын нээлтийн үеэр Эргэлт.мн мэдээллийн сайтын Ерөнхий эрхлэгч, Балдорж шагналт сэтгүүлч Э.Хүрэлбаатар Эргэлтийн номын сан цувралын тухай ийн хэлэв.

               Тэрбээр “Энэ  танхимд цугласан  та бүхэндээ энэ өдрийн мэндийг айлтган мэндчилж байна. Эргэлт.мн мэдээллийн сайт үүсгэн байгуулагдаад  хоёр жилийн хугацаа өнгөрч байна. Эргэлтийнхэн маань ч сэтгүүл зүйн салбарынхандаа балчирханд тооцогдоно. Гэхдээ тэд, тэдний дундаас ирээдүйд мэргэжлийн сэтгүүл зүйд цахиур хагалах түүчээ сэтгүүлч цөөнгүй төрнө гэдэгт итгэлтэй байна.

     Ийм учраас бид Эргэлт.мн мэдээллийн сайтын сэтгүүлч, уран бүтээлч, гэрэл зурагчдынхаа тухайн оны шилдэг бүтээлүүдийг эмхэтгэн өөрсдөд нь бол үнэт өв, уншигчдад ахин дахин шимтэх уншууртай бүтээл,  оюутнуудад  мэргэжлийн сэтгүүл зүйн гарын авлага, орчин цагийн мэдээллийн сайтын сэтгүүлчдийн эрэл, хайгуул, “хадаас”-ын чансаа хэрхэн чамбайрсаар байгааг нэг дороос харуулах “Эргэлтийн номын сан” цувралыг эхлүүлж байна. Энэ нь ч манай редакцынхны хувьд бүтээл бүр нь хадаас байхын эрэл, зорилго болох юм.

 Монголын сэтгүүл зүй миний үеийн залуусын нуруун дээр иржээ.  Бид ямар үлгэр дуурайлалтай байхаас, редакцаа хэрхэн удирдаж, сэтгүүлчдээ яаж бэлтгэхээс шалтгаалж  энэ салбарын  нэр хүнд   дээшлэх үү, уруудан доройтох уу гэдэг дээр  тулж ирсэн байна. Уншигч, үзэгчдийн сэтгэлийг татахаар   даацтай ярилцлага, сурвалжилга, аян замын тэмдэглэл, хөрөг, эссэ тэргүүтэй бүтээлүүд  нүдний гэм мэт цөөрсөөр  байна. Иймд  мэдрэмжтэй,  авьяастай, мэдлэгтэй, оновчтой зүйрлэлтэй, гарц гаргалгаатай бичдэг, бэлтгэдэг сэтгүүлчдийг бэлтгэн гаргах нь та бидний үүрэг, бас хариуцлага юм шүү гэдгийг редакц удирдаж байгаа залуу  эрхлэгч нарт  сануулахыг хүслээ.  

           Монголын сэтгүүл зүй хөгжиж  байна.  Иргэд маань улс эх орон, дэлхий нийтэд болж байгаа үйл явдлыг цаг алдалгүй халуун цэгээс нь авч чаддаг болжээ. Мөн  Цахим орчин хүчтэй хөгжиж хүн бүр сэтгүүлчийн үүргийг гүйцэтгэж,  гар утсаараа мэдээллийг шууд дамжуулдаг болжээ. Мэргэжлийн биш хүмүүсийн цахим орчинд бичиж буй бүхнийг сэтгүүлч нарын бүтээлтэй  ард иргэд андуурдаг болсон байна.  Үүнээс болж    ард иргэдийн дунд сэтгүүлчдийн үнэлэмж буурч байна. Үүний хажуугаар цөөн тооны  сэтгүүлчид ёс зүйгээ улан доороо гишгэсэн, хүн чанар хүний мөсөө гээсэн үйлдэл ч гаргах болжээ.  Сэтгүүлчид нийгмийн оюун санааг дагуулах ёстой.  Гэтэл сүүлийн жилүүдэд нийгэмд таалагдах гэж хичээдэг болцгоожээ. Энэ мэт хүчин зүйл сэтгүүл зүйн нэр хүндийг унагаж байгааг та бүхэн мэдэж байгаа биз ээ. Иймээс бид илүү их сайжирч, мэргэжлийн  ёс зүй, хүн чанартай  байх ёстой гэдгийг энэ индэр дээрээс та бүхэнд хэлмээр байна. 

Эрлээс эрлийн хооронд амсхийх ч завгүй гүйж, гэгээнээс гэгээн бүтээл биччихээд дараагийн эрэл рүүгээ “гүйж” оддог сэтгүүлч  та нартаа илүү хурдан “гүйх”-ийг, эрсэн бүхэн нь эрдэнэ болохыг хүсье" гэсэн юм.