Тагнуулын ерөнхий газраас өмгөөлөгч Б.Баасанцогтыг саатуулсан билээ. Энэ талаар ТЕГ-ын Олон нийттэй харилцах хэлтсийн мэргэжилтэн П.Өгөөмөр “Олныг хамарсан жагсаал, цуглааны үеэр иргэдийн эрүүл мэнд, аминд санаатайгаар халдаж, үймээн самуун хийх гэж оролдсон таван иргэнийг баривчлан, шалгаж байна. Тухайн этгээдүүд дээрх үйл ажиллагааг санаатайгаар зохион байгуулахаар бэлдэж байсан ба орон гэр, автомашин, ажлын байранд хийсэн шалгалтаар байлдааны болон бусад төрлийн 12 зэвсэг, буу илэрсэн. Үүнээс гадна 861 сум болон тэсэрч дэлбэрэх хэрэгсэл олдсоныг хураан авсан. Хурааж авсан галт зэвсэгт Б.Баасанцогтын эзэмшлийн буу байсан учир түүнийг саатуулан, шалгаж байгаа” гэсэн юм.

Тэгвэл өмгөөлөгч Б.Баасанцогт тэргүүтэй таван хүнийг цагдан хорих хугацааг 30 хоногоор сунгах шийдвэр гаргажээ. Өнөөдөр Баянгол дүүргийн Эрүүгийн хэргийн анхан шатны шүүх хуралд цагдан хорих хугацааг сунгах эсэх талаар хэлэлцсэн байна.