Сонгинохайрхан дүүргийн Гэр бүл, хүүхэд залуучуудын хэлтсийн дарга Найдандоржийн Уранчимэг ажлын байрандаа архидан согтуурдаг, ажилчдынхаа үр дүнгийн урамшууллыг хувийн дансаар хурааж авдаг, жирэмсэн болохгүй байхыг шаарддаг, ажилчдаараа автомашинаа угаалгадаг, цахим тоглоомын газруудаас хахууль авдаг гэх мэт ноцтой баримтуудыг бид өмнө нь цувралаар хүргэсэн.

        Тодруулбал, Гэр бүлийн хүчирхийллийг таслан зогсоох, хүүхдийн эрхийг хамгаалах чиглэлээр ажиллах ёстой тус хэлтсийн ажилтнууд дарга Н.Уранчимэгийнхээ дарамт шахалтаас болж үндсэн ажлаа ч хийж чадахгүйд хүрсэн байна. Улмаар 30 гаруй хүн ажлаасаа халагдаад байгаа бөгөөд тэд Н.Уранчимэгт хариуцлага тооцуулахаар ХЭҮК болон АТГ-т хандаад байгаа аж. Тэгвэл Эргэлт.мн мэдээллийн сайтын эрэн сурвалжлах нэгдэл Сонгинохайрхан дүүргийн Гэр бүл, хүүхэд, залуучуудын хэлтсийн дарга Н.Уранчимэг хүүхдийн эрхийг хамгаалах бус эсрэгээрээ ажилтнуудаа хэрхэн ёс бусаар дарамталж, сэтгэлзүйн болон санхүүгийн мөлжлөгт оруулж байсан гомдол, мэдээллийн дагуу холбогдох байгууллагууд шалгалтын ажиллагааг хэрхэн үргэлжлүүлсэн талаар тодрууллаа.

ХЭҮК-ийн Гомдол, хяналт шалгалтын хэлтсийн дарга Т.ИХТАМИР: Сонгинохайрхан дүүргийн ГБХЗХ-ийн ажилчид шалгалтын явцад саад учруулсан

-Сонгинохайрхан дүүргийн Гэр бүл, хүүхэд залуучуудын хэлтсийн дарга Н.Уран чимэгтэй холбоотой ямар гомдлууд ирсэн бэ. Гомдлын дагуу хэрхэн хянаж, шалгасан бэ?

-Сонгинохайрхан дүүргийн Гэр бүл, хүүхэд залуучуудын хэлтэст өмнө нь ажиллаж байсан болон одоо ажиллаж байгаа ажилчдаас тус хэлтсийн даргын ёс зүйн үйл ажиллагаатай холбоотой гомдол ирсэн. Гомдлын дагуу ХЭҮК-оос хяналт, шалгалт хийж илэрсэн хэрэг зөрчлийг арилгуулахаар 2021 оны зургадугаар сард комиссын зүгээс шаардлага хүргүүлсэн. Шалгалтын явцад бусдыг үг хэлээр доромжилдог, ялгаварлан гадуурхдаг, хувийн ажлаа хийлгэдэг, хийсэн ажил хөдөлмөрийг нь үнэлдэггүй, хувийн мэдээллийг нь зөвшөөрөлгүй тараадаг, ур чадварын урамшууллын мөнгийг бэлнээр болон дансаар буцааж авдаг гэх гомдлуудын илрүүлсэн. Үүний хүрээнд хяналт, шалгалтаар илэрсэн зөрчлийг арилгуулах, дахин ёс зүйгүй үйлдэл гаргахгүй байх арга хэмжээ авч, хуульд заасан үндэслэл журмын дагуу хариуцлага тооцох шаардлага хүргүүлсэн. Шаардлагыг хүлээж авсан албан тушаалтан заавал биелүүлэх үүрэгтэй байдаг.

-Тухайлбал, ямар шаардлага хүргүүлсэн бэ?

-Хүний эрхэд алдсан ажлын шаардлага биелүүлээгүй зөрчил гаргасан Н.Уранчимэгт зөрчлийг таслан зогсоох, гомдлын хүрээнд тухайн байгууллагын албаны дарга Э.Д нар үйлчилгээний ажилтнаараа цалингийн зээл авхуулсан атлаа төлөх хугацаандаа төлж барагдуулаагүй, эрх мэдэл, албан тушаалын байдлаа урвуулан ашиглаж ажилтнаа сэтгэл зүйн болон эдийн засгийн хүндрэл дахин гаргуулахгүй байх шаардлага хүргүүлсэн. Энэ нь иргэн хоорондын харилцаа мэт боловч төрийн албанд байж болохгүй үйлдэл хэмээн үзэж байгаа. Мөн Сонгинохайрхан дүүргийн Гэр бүл, хүүхэд залуучуудын хэлтэст ажиллаж байгаа бусад ажилчид үйлчлүүлэгчидтэй ёс зүйгүй харилцсан, хяналт шалгалтын явцад саад учруулсан учраас төрийн албан хаагчдын ёс зүйн боловсролыг дээшлүүлэх шаардлагатай байгаа юм. Мөн тухайн байгууллага хүүхэд хамгааллын үйл ажиллагаанд хууль ёсны дагуу үүргээ биелүүлээгүй, хариуцлагагүй хандсан байдалд шаардлага хүргүүлсэн. Мөн ХЭҮК-оос жендерийн тэгш байдлыг хангах тухай хуулийн дагуу тухайн хуульд хяналт тавих чиг үүрэгтэй. Чиг үүргийнхээ хүрээнд жендерийн хуулийн өөрчлөлтийг хангуулж ажиллах шаардлагатай байгаа.

-Шаардлагын хариу ирсэн үү?

 -Гэр бүл, хүүхэд залуучуудын хэлтсийн газраас 2021 оны зургадугаар сард шаардлагын хариуг ирүүлсэн. Үүнд, Сонгинохайрхан дүүргийн Гэр бүл, хүүхэд залуучуудын хэлтсийн дарга Н.Уранчимэг нь албан тушаалын бүрэн эрхийн хүрээнд хариуцлага алдаж, албан тушаалын тодорхойлолтод заасан чиг үүргээ биелүүлээгүй, ёс зүйн хэм, хэмжээг зөрчсөн учир гурван сарын цалингаасаа 20 хувь хасуулах сахилгын шийтгэл ногдуулсан. ХЭҮК-ийн гишүүний шаардлагын дагуу хүүхдийн эрхийг зөрчин түүний төлөө ажиллаж чадаагүй, хууль, дүрэм, журам мөрдөөгүй учир хүүхдийн улсын байцаагч н.Алтаншагай мөн шаардлага хүргүүлсэн байдаг.

Энэ оны долдугаар сард ХЭҮК-ын шаардлагын мөрөөр ажилласан эсэх талаар Нийслэлийн гэр бүл, хүүхэд залуучуудын хөгжлийн газраас хариу ирүүлсэн. Үүнд, тухайн хэлтэст ажиллаж буй төрийн албан хаагчдыг ёс зүйн зөрчил гаргасан талаар уучлалт гүйхийг үүрэг болгож сануулсан, төрийн захиргааны болон үйлчилгээний албан хаагчдад ёс зүйн дүрмийг сахин биелүүлэх талаар сануулж ажиллаж байгаа гэх хариу ХЭҮК-т ирүүлсэн. Гэвч шаардлага хүргүүлж, хариу арга хэмжээ ирсэн боловч зөрчил арилаагүй, төрийн байгууллагын үйл ажиллагаа доголдолтой, тус хэлтсээр үйлчлүүлж байгаа иргэдийн хүүхдийн эрхийн зөрчлийн асуудлуудад арга хэмжээ авч, ажлаа хийхгүй байна гэх гомдол ирсээр байна" гэлээ. 

    Ажил үүргээ биелүүлдэггүй, ажилчдынхаа цалин, урамшууллыг буцааж авдаг даргад ямар хариуцлага тооцох талаар Хөдөлмөр, нийгмийн хамгааллын сайд А.Ариунзаяагаас тодрууллаа. Тэрбээр “Сонгинохайрхан гэр бүл, хүүхэд залуучуудын хэлтсийн даргатай холбоотой мэдээллийг харсан. Гэхдээ ажилчид хоорондын маргааны асуудал байсан гэж бодож байна. Хууль хяналтын байгууллага эцэслэн шалгаж, дүгнэлт гаргаагүй байгаа шүү дээ. Харин Н.Уранчимэгийг АТГ-аас шалгаж байгаа гэх мэдээлэл бий. Төрийн байгууллагад ажиллаж байгаа бүх хүнд ёс зүйн шаардлага тавьж ажиллаж байгаа” гэсэн юм.