Өвөрхангай аймгийн Зүүнбаян-Улаан сумын ерөнхий боловсролын сургуулийн захирал Д.Болдмаагийн ёс зүйгүй, хууль бус үйлдэлтэй холбоотой мэдээллүүд манай редакцад ирсэн байдаг. Тодруулбал, Д.Болдмаа захирал төгсөх ангийн сурагчдаа элсэлтийн ерөнхий шалгалт өгөхийг хориглодог, сургуулиас нь хөөдөг гэсэн юм.

           Тэгвэл бид эл мэдээлэлтэйгээр холбоотойгоор Өвөрхангай аймгийн Боловсрол, соёл урлагийн газрын дарга Ж.Пүрэвсүрэнтэй холбогдож тодрууллаа. Тэрбээр “Би сургалтад сууж байгаа учраас мэдээлэл өгмөөргүй байна. Д.Болдмаа захиралтай холбоотой асуудлыг судалж байж хариу өгнө. Уг нь сургуулийн захирал хүүхдүүдийг ЭЕШ өгөхийг хориглох боломжгүй. Манай Өвөрхангай аймаг шалгалт өгөх хүүхдүүдэд хязгаарлалт хийдэггүй. Д.Болдмаа захиралтай холбоотой мэдээлэл сая л ирж байгаа учраас судална. Судлаагүй учраас хариулт өгөх боломжгүй байна” гэлээ.

Мөн Боловсрол, шинжлэх ухааны сайд Л.Энх-Амгалан Зүүнбаян-Улаан суманд ахлах ангийн сурагч амиа алдсан хэрэгт Өвөрхангай аймгийн Боловсролын газар, сумын сургуулийн захиргаанд багаар хариуцлага тооцно хэмээн мэдэгдсэн билээ.

Энэ талаар Ж.Пүрэвсүрэнгээс тодруулахад “Шүүхийн шийдвэр гараагүй байна. Мөрдөн шалгах ажиллагаа үргэлжилж байна. Хэрэв шалгалтын ажиллагаагаар буруутай нь тогтоогдвол хариуцлага тооцож таарах байх” гэлээ.