Дэлхий даяар 500 гаруй сая хүнд халдварлаж, албан тоогоор зургаан сая хүний аминд “хүрсэн” цар тахлыг монголчууд мартжээ. “Ковид-19” ид голомтолж байх үед өдөрт бүртгэгдэх халдварын тохиолдлын тоо мянга мянгаараа нэмэгдэх үед эерэг гарсан нэгнээ “ад үзэх” нь холгүй байснаа мартсан байна. Өдөрт бүртгэгдэх халдварын тохиолдлыг тоог олон нийтэд мэдээлж байх үүрэгтэй Эрүүл мэнд яам ч хамгийн сүүлд дөрөвдүгээр сарын 30-ны өдөр 55 хүн коронавирусийн халдвар авсан гээд, “Монголд омикрон хувилбарын тархалт буурч байна” гэж мэдээлснээсээ хойш “сураггүй” болов. Харин энэ үеэр цар тахлын шинэ давлагаанууд дэлхий даяар сандаргаж байна.

-Коронавирусийн тархалт нэмэгдэж байгаатай холбоотойгоор БНХАУ Ханжоугийн Азийн наадмыг хойшлуулав-

Сүүлийн хоёр сарын хугацаанд БНХАУ-д “Ковид-19” цар тахлын тархалт нэмэгдэж, цаашид эх газрын Хятадад голомтлох төлөвтэй байгаа тул Ханжоу хотод болох Азийн наадмыг хойшлуулахаар болсныг урд хөршийн төрийн хэвлэлээс мэдээлсэн. Анхны товоор 2022 оны Азийн наадам БНХАУ-ын Ханжоу хотод ирэх есдүгээр сарын 10-25-ны өдрүүдэд зохион байгуулахаар байв. Гэсэн ч цар тахалтай холбоотойгоор Азийн наадмыг хойшлуулах шийдвэрийг Азийн олимпын зөвлөлөөс гаргажээ. Одоогоор Азийн наадам болох шинэ товыг зарлаагүй байна.

               БНХАУ-д коронавирусийн омикрон хувилбарын дэгдэлтийн улмаас шинэ давлагаа дэгдлээ. Азийн томоохон санхүүгийн төв гэгддэг 25 сая хүн амтай Шанхай хотод өнгөрсөн гуравдугаар сараас хойш хөл хорио тогтоосон. Одоогийн байдлаар Шанхай хотын хатуу хөл хориог цуцалсан ч, томоохон барилга, байгууламж, олон нийтийн газар хязгаарлалт тогтоосон хэвээр байна. Азийн наадмыг хойшлуулах шийдвэр гарсан өдөр буюу өнгөрсөн долоо хоногийн пүрэв гарагт эх газрын Хятадад коронавирусийн 4714 шинэ тохиолдол илэрсэн талаар холбогдох байгууллагаас мэдэгджээ. Тэр дундаа шинээр бүртгэгдсэн халдварын тохиолдлын дийлэнх хувь нь буюу 4340 нь шинж тэмдэггүй байсан аж.

               Азийн наадмаас гадна БНХАУ-д болох байсан өөр нэгэн том наадам цуцлагдсан нь Дэлхийн оюутны спортын наадам. БНХАУ-ын Ченду хотод болох байсан тус наадмыг ирэх жил хүртэл хойшлуулсан талаар урд хөршийн “South China Morning Post” сонин мэдээлэв.

-БНСУ-д өдөрт дунджаар 30 мянга орчим халдварын шинэ тохиолдол бүртгэгдэж байна-

БНСУ-д өнгөрсөн гуравдугаар сараас хойш өдөрт бүртгэгдэх цар тахлын шинэ тохиолдлууд ихсэж байна. Гуравдугаар сард нэг өдөрт 600 мянга гаруй халдварын тохиолдол бүртгэгдээд байсан БНСУ-ын эрх баригчид “Ковид-19” цар тахлыг “II түвшний өвчин” гэж мэдэгдээд иргэдээ амны хаалтгүй явахыг уриалж, аялал, жуулчлалын “гарц”-ыг нь нээж өгөв. Харин энэ асуудалд олон улсын судлаачид “БНСУ-ын эрх баригчид цар тахлын үед царцсан эдийн засгаа сэргээхийн тулд маш том бөгөөд аюултай алхам хийлээ” гэж онцолж байгаа юм.

               БНСУ-ын эрх баригчдын шийдвэр гарсан ч, халдварын тохиолдлын тоо буурахгүй байгаа нь өөр нэг том эрсдэл дагуулж байгаа гэх. Тухайлбал, тавдугаар сарын 2-ны өдөр буюу өнгөрсөн долоо хоногийн даваа гарагт БНСУ-д өдөрт 20,084 халдварын шинэ тохиолдол бүртгэгдсэнээс хойш долоо хоногийн турш 30 мянгаас буусангүй. Үүний хамгийн их тавдугаар сарын 7-ны бямба гарагт 75,449 тохиолдол бүртгэгдсэн нь байв. Гэсэн ч эдийн засгаа тогтворжуулж, сэргээхээр эрсдэлтэй алхам хийсэн эрх баригчдын шийдвэрийг дагах ч, иргэд халдварын дэглэмээ чанд баримталсаар байгаа аж.

ДЭМБ: Албан тоогоор зургаан сая хүн нас барсан гэж мэдэгдсэн ч, үнэндээ дэлхий даяар коронавирусийн улмаас 15 сая хүн амиа алдаад байна

Дэлхийн орнуудын коронавирусийн улмаас нас барсан хүмүүсийн тоог нэгтгэсэн мэдээллээр өчигдөр буюу тавдугаар сарын 9-ний байдлаар 6.2 сая хүн коронавирусийн улмаас нас барсан гэх албан мэдээлэл байна. Тэгвэл энэ мэдээллийг ДЭМБ-аас үгүйсгэж, дэлхий даяар 15 орчим сая хүн коронавирусийн улмаас амиа алдаад байгааг мэдэгдэв.

               ДЭМБ-ын мэдээлэлд дэлхийн орнууд нас барагсдын тоог дутуу тооцож, аль эсвэл зориудаар багасгаж мэдээлж байгааг онцолжээ.