Онцгой байдлын байгууллагын 2026 оны сургалт бэлтгэлийн төлөвлөгөөг хэрэгжүүлэх, алба хаагчдын мэргэжлийн ур чадвар, сахилга ёс зүйг дээшлүүлэх зорилготой сургуулийн жилийн 2 дугаар үеийн нээлтийн үйл ажиллагааг өнөөдөр буюу 2026 оны 09 дүгээр сарын 11-ний өдөр нийслэлийн Онцгой байдлын газар, Чингэлтэй дүүргийн Онцгой байдлын хэлтэс хамтран зохион байгуулжээ.

   Нээлтийн үйл ажиллагааг нийслэлийн Онцгой байдлын газрын дарга, хурандаа Г.Галбадрах нээж үг хэлэхдээ бие бүрэлдэхүүний сургалт, дадлагыг орчин үеийн дэвшилтэт техник, технологи, шинэ арга барилаар явуулах, алба хаагчдын сэтгэл зүй, бие бялдрын бэлтгэлжилтийг дээшлүүлэх, хөдөлмөрийн аюулгүй ажиллагааг чанд хангах чиглэлээр үүрэг чиглэл өгч, нийт бие бүрэлдэхүүнд амжилт хүссэн ажээ.

Энэ үеэр алба хаагчдад зориулсан мэргэжлийн болон танин мэдэхүйн сургалтуудыг амжилттай зохион байгуулсан байна. Тодруулбал:

• Чингэлтэй дүүргийн Засаг даргын Тамгын газрын Цэргийн штабын төлөвлөлт, сургалтын офицер, хошууч Г.Билгүүнбаатар “Эх оронч үзэл” сэдвээр,

• Гэр бүл судлаач, көүч Б.Бүрэнжаргал “Өөрийгөө сэргээх нь бусдад хүн болохын үндэс” сэдвээр тус тус лекц уншиж, мэдээлэл хүргэв.

• 

   Түүнчлэн арга хэмжээний хүрээнд Чингис хаан Үндэсний музей нийгмийн хариуцлагын хүрээнд Нийслэлийн Онцгой байдлын газар, Чингэлтэй дүүргийн Онцгой байдлын хэлтэс болон Гал түймэр унтраах, аврах 10, 86 дугаар ангийн алба хаагчдыг хүлээн авч, музейн үйл ажиллагаа болон түүх, соёлын өвтэй танилцуулсан нь энэ удаагийн нээлтийн үйл ажиллагааны онцлох үйл явдал болсон аж.