Монгол Улс, ОХУ-ын хамтарсан шумбалтын баг Дорнод аймгийн Халхгол сумын Буйр нуурт живсэн нисэх онгоц болон бусад техник хэрэгслийг илрүүлэх эрэн хайх ажиллагааны хоёрдугаар шатыг наймдугаар сарын 22-ноос есдүгээр сарын 13-ны өдрүүдэд амжилттай зохион байгуулж байгаа аж.

   Тус хамтарсан багт Монголын талаас Дорнод, Сүхбаатар, Хэнтий аймгийн Онцгой байдлын газрын алба хаагчид үүрэг гүйцэтгэж байгаа бөгөөд өнөөдрийн байдлаар 7-9 метрийн гүнд 23 удаагийн шумбалт хийжээ.

   Эрэн хайх ажиллагааны явцад гидролакатор, эхолот тусгай төхөөрөмж болон “Chasing” усны дронуудыг өргөнөөр ашиглаж байна. Үүний үр дүнд Буйр нуурын эргээс 560 метрийн зайд, 3 метрийн гүнд живсэн байсан дөрвөн хүний суудалтай аяны зориулалттай завийг илрүүлэн нуурын эрэгт татан гаргаж, холбогдох иргэнд хүлээлгэн өгсөн байна.

   Халхын голын байлдаан болсон түүхэн газар орон болон тус бүс нутгийн усны гүнд орших техник хэрэгслийн байршлыг нарийвчлан тогтоох, холбогдох ослын шалтгааныг илрүүлэх энэхүү ажиллагаа нь урт хугацаанд үе шаттайгаар хэрэгждэгээрээ онцлог ажээ.