БОУАӨЯ ээлжит шуурхай хуралдаанаа өнөөдөр хийлээ. Энэ үеэр Засгийн газрын хэрэгжүүлэгч агентлагийн Ойн газрын дарга Б.Оюунсанаа энэ жилийн самрын гарц болон баавгайн идэш тэжээлийн талаар мэдээлэл хийлээ.

Тэрбээр “Хүрэн баавгай суурьшлын бүс рүү орж байгаа нь идэш тэжээлийн хомсдол гэж судлаачид эхний байдлаар дүгнэж байна. Мөн уур амьсгалын өөрчлөлт нөлөөлж байна. Өмнө жилүүдэд баавгай суурьшлын бүс рүү орох тохиолдол харьцангуй бага байдаг байсан бол энэ жил давтамж ихсэж байна. Ийм учраас хуш мод хамгийн их ургадаг аймгууд буюу Архангай, Өвөрхангай, Сэлэнгэ, Завхан, Увс, Хөвсгөл зэрэг аймагт үйлдвэрлэлийн болон ахуйн зориулалтаар самар түүхийг хориглож байна. Самраар хооллодог амьтад зориулж жилийн нийт ургасан самрын 40 хувийг нь үлдээдэг. Энэ жилийн хувьд самрын ургац 40 хувиас бага гарцтай байгаа учраас энэ гарсан жаахан самраа зэрлэг амьтаддаа үлдээх хэрэгтэй. Хүрэн баавгай намарших тусмаа ичээнд орох шим тэжээлийн авах шаардлагатай байдаг учир иргэд сонор сэрэмжтэй байхыг анхааруулж байна” гэлээ.