Азийн наадам болон жүдо бөхийн Дэлхийн аварга шалгаруулах тэмцээний өмнө болж буй чансаа оноо олгох “Их дуулга” тэмцээн өнөөдөр Унгарын нийслэл Будапешт хотод эхэлж байна. Тэмцээний эхний өдөр хөнгөн жингийн буюу эмэгтэйчүүдийн -48, -52, -57 кг болон эрэгтэйчүүдийн -60, -66 кг-ын жингийн барилдаанууд 15:00 цагаас эхэлнэ.

     Энэ удаагийн тэмцээнд дэлхийн 67 орны 500 гаруй жүдоч оролцохоор мэдүүлгээ өгчээ. Эдгээр тамирчин дунд олимпын мөнгө, хүрэл медальт Италийн Одэтт Жиуффрида, дэлхийн аварга Неманья Маждов, олимпын мөнгөн медальт Теодорос Целидис, дэлхийн аварга болон олимпын медальт Раза Хершко нар багтжээ. Харин манай улсаас Хөдөлмөрийн баатар Х.Цагаанбаатарын удирдлага дор эрэгтэйчүүдийн гурван жин, эмэгтэйчүүдийн дөрвөн жинд нийт есөн тамирчин өрсөлдөх юм.

       Эрэгтэйчүүдийн -60 кг-ын жинд Н.Мэндсайхан, -66 кг-д Ө.Бямбасүрэн, Ө.Жанцандорж, -73 кг-ын жинд Л.Энхдөл, Л.Анхзаяа нар барилдана. Харин эмэгтэйчүүдийн -48 кг-д гавьяат тамирчин Б.Баасанхүү, -52 кг-д Б.Уранзаяа, -57 кг-д Л.Сосорбарам, -78 кг-д О.Хүслэн нар өрсөлдөнө.

       Энэ удаагийн тэмцээний эрэгтэйчүүдийн -73 кг-ын жинд хамгийн олон буюу 65 жүдоч бүртгүүлсэн бол эмэгтэйчүүдийн -48 кг-ын жинд 34 тамирчин өрсөлдөнө. Будапештийн “Их дуулга” гурван өдрийн турш болж, ням гарагт өндөрлөх юм.