АНУ Ираны газрын тос тээвэрлэгч таван хөлгийг өнгөрсөн мягмар гарагт сөнөөсний дараа дайны нөхцөл байдал улам идэвхэжсэн. Иран лхагва гарагт хариу цохилт өгч Ормузын хоолой болон Улаан тэнгисээр дайран өнгөрөх 10 орчим ачааны хөлөг онгоц руу халдсан. Ингэснээр тус хоолойгоор нэвтрэх хөлөг онгоцын тоо эрс багасаад байна. 

       АНУ-ын холбоотон болох Саудын Арабын газрын тосны байгууламж руу Хусит бүлэглэл агаараас довтолсон. Үүнтэй зэрэгцэн ОХУ-ын Новороссийск боомт дахь газрын тосны терминал Украины халдлагад өртсөн нь дэлхийн газрын тосны зах зээл дэх нийлүүлэлтийн хомсдолын айдсыг ихэсгээд байгаа. Ийнхүү дэлхийн хоёр өөр оролцогч тал бүхий дайны хор уршиг газрын тосны зах зээлийг хэлбэлзүүлээд байгаа юм. Үүний улмаас АНУ-д дизел түлшний үнэ 5.94 ам.долларт хүрч, дайны өмнөхөөс даруй 58%-аар өсөөд байна. Мөн шатахууны үнэ 4.22 ам.доллар болоод байгаа юм. Харин газрын тосны үнийн огцом өсөлт инфляцыг дахин хөөрөгдүүлэх эрсдэл бий болсны улмаас S&P 500 индекс 0.5%–0.8%-аар уналаа. Мөргөлдөөн цаашид даамжирвал газрын тосны үнэ 110 ам.доллароос 150 ам.долларт ч хүрч болзошгүйг шинжээчид анхааруулж байна.

Эх сурвалж: reuters.com

                     tradingeconomics.com

BBC 

С.Энхцэцэг