Ардчилсан намаас Монгол Улсын Ерөнхий сайд Н.Учралтай холбоотой асуудлаар Авлигатай тэмцэх газарт гомдол гаргаж, шалгуулахаар болсон талаар мэдээлжээ.

   Өчигдрөөс эхлэн Ерөнхий сайд Н.Учралын ээж Ж.Цэцэгмаагийн эзэмшдэг гэх “Их Засаг Кинг” сургууль төрөөс хувьсах зардал авах хүсэлтээ Боловсролын яаманд гаргасан гэх мэдээлэл олон нийтийн сүлжээнд тархаад байна.

   Уг мэдээлэлтэй холбогдуулан Ардчилсан намаас асуудлыг хууль хяналтын байгууллагаар шалгуулж, нөхцөл байдлыг тодруулах шаардлагатай гэж үзсэн байна. Энэ оны дөрөвдүгээр сард Засгийн газар нэг суралцагчид ногдох хувьсах зардлын дундаж хэмжээгээр тооцсон зардлыг тавдугаар сарын 1-нээс санхүүжүүлэх зохицуулалт баталсан байна.

   Харин “Их Засаг Кинг” сургуульд хувьсах зардал олгох эсэх, уг хүсэлт нь холбогдох журмын дагуу шийдвэрлэгдсэн эсэх болон Ерөнхий сайд Н.Учралтай ашиг сонирхлын зөрчил үүссэн эсэх асуудлыг эрх бүхий байгууллага шалгаж тогтоох юм.