Бие бүрэлдэхүүний сургалт, бэлтгэлийн төлөвлөгөөний дагуу Онцгой байдлын байгууллагын бүтцийн нэгжүүдийн дарга, санхүүгийн алба хаагчдад зориулсан нэгдсэн дадлага сургалтыг есдүгээр сарын 8-ны өдөр зохион байгууллаа.

   Тус сургалтад 70 гаруй алба хаагч хамрагдаж, цэргийн нийтлэг дүрэм, цэргийн дүрэмт хувцасны чимэг хэрэглэл зүүх журам, хүнсний хангалт болон цаашид хэрэгжүүлэх бодлого, Онцгой байдлын албаны нэгдсэн төсөв, төсвийн гүйцэтгэл, санхүүгийн программын ашиглалт, заавар зөвлөмж зэрэг сэдвээр мэдлэг, мэдээлэл авчээ.

   Мөн Нийгмийн даатгалын ерөнхий газрын Хяналт шалгалтын газрын дарга С.Лхагвадорж “Цэргийн алба хаагчийн тэтгэвэр, тэтгэмжийн тухай хууль, Нийгмийн даатгалын ерөнхий хуулийн хэрэгжилт” сэдвээр мэдээлэл өгсөн байна. Түүнчлэн Нийслэл дэх Төрийн аудитын газрын менежер Бүжинханд, ахлах аудитор Мөнхдэлгэр, аудитор Тэгшлхам нар бүтцийн нэгжүүдийн 2025 оны санхүүгийн тайлан, төсвийн гүйцэтгэлд хийсэн аудитын дүн, цаашид анхаарах асуудлын талаар сургалт зохион байгуулжээ.

   Нэгдсэн сургалт нь алба хаагчдын хууль, дүрэм, санхүү, төсөв болон санхүүгийн программын талаарх мэдлэг, ур чадварыг дээшлүүлэх, төсвийн хөрөнгийг үр ашигтай, хариуцлагатай зарцуулах, санхүүгийн үйл ажиллагааны хэрэгжилтийг сайжруулахад чиглэсэн юм.