Завхан аймагт коронавирусийн дахин хоёр тохиолдол батлагджээ. Тодруулбал, тус аймгийн Шилүүстэй суманд хоёрдугаар сарын 27-нд очсон иргэн Х-гийн нэгдүгээр хавьтлын 11 иргэнээс PCR шинжилгээ авахад хоёрынх нь хариу эерэг гарсан байна. Ингэснээр Завхан аймагт коронавирусийн батлагдсан тохиолдлын тоо нийт дөрөв болж байна. Халдвартай иргэдэд одоогоор эмнэл зүйн шинж тэмдэг илрээгүй бөгөөд биеийн байдал хэвийн байгаа аж. Түүнчлэн Шилүүстэй сумын Эрүүл мэндийн төвийн эрүүл ахуйн нөхцөл байдал хүнд байгаа тул халдвар авсан иргэдийг ХӨСҮТ-рүү шилжүүлэх хүсэлтийг Аймгийн онцгой комиссоос Улсын онцгой комисст хүргүүлжээ.