БНЭУ-аас Монгол Улсад буцалтгүй тусламжаар олгож буй АстраЗенека вакцины 150 мянган тунг өнөө өглөө Шадар сайд хүлээж авсан билээ. Тус вакциныг нэг хүнд хоёр тун хийх бөгөөд эхний ээлжинд эмнэлэг, цагдаа, онцгой байдлын алба хаагч зэрэг халдварын голомтод ажиллаж байгаа 75 мянган хүнийг вакцинжуулах юм. Цаашид уг вакцинаар 690 мянга гаруй хүнийг дархлаажуулах аж. Тэгвэл тус вакцины давуу болон сул тал, тариулахад үзүүлэх сөрөг нөлөөллийн талаарх мэдээллийг хүргэж байна.

       Их Британийн Оксфордын их сургуулийн үйлдвэрлэж буй АстраЗенека нь ДЭМБ-аас яаралтай тусламжийн үед ашиглах зөвшөөрөл авсан коронавирусийн хоёр дахь вакцин юм. Энэхүү вакциныг Их Британийн Оксфордын их сургууль болон Швед Улсын АстраЗенека компани хамтарч, Оксфордын их сургуулийн лабораторид бүтээсэн. Вакциныг эрүүл мэндийн байдал тогтвортой, ямар нэг архаг хууч өвчингүй, 18-аас дээш насны хүмүүст тарьж буй.

        АстраЗенека вакциныг “Ковид-19” халдварын эсрэг 63-92 хувийн нөлөө үзүүлж байгааг анхны туршилтаар тогтоосон. Тухайн вакцины эхний тунг тариулахад коронавирусийн бусад вакцины адилаар халуурах, толгой өвдөх, сульдах зэрэг сөрөг нөлөө илэрнэ. Вакцины эхний тун хүний биед 61.7 хувийн нөлөө үзүүлэх бөгөөд эхний тунг тариулснаас 22 хоногийн дараа хоёр дахь тунг тарих юм. Хоёр дахь тун нь 91.7 хувийн эерэг нөлөө үзүүлэх бөгөөд вакцинжуулалтад бүрэн хамрагдсанаас хойш 12 хүртэлх долоо хоног коронавирусээс хамгаалах аж. АстраЗенека вакциныг хөргөгчний хэвийн хэмд зургаан сар хүртэлх хугацаагаар хадгалж, ашиглах боломжтой.

АстраЗенека вакцин коронавирусийн мутацид бага нөлөө үзүүлж байна

        Дэлхийн 32 гаруй оронд дэлгэрээд буй B.1.351 буюу Өмнөд Африкийн коронавирусийн шинэ хувилбарын эсрэг АстраЗенека вакцин хамгийн бага нөлөө үзүүлж байгаа гэнэ. Өмнөд Африкийн Витватерсрандын их сургуулийн вирус судлаач Шабир Мадхи “Коронавирусийн эсрэг вакцинууд шинэ төрлийн мутацийн эсрэг туршилтад орж байгаа. Бид цаашид коронавирусийн шинэ хувилбарын эсрэг АстраЗенека вакциныг ашиглах талаар бодож үзэх хэрэгтэй” гэв. Харин Их Британийн Брайтоны их сургуулийн биоанагаахын шинжлэх ухааны мэргэжилтэн Сара Питт “Вакцин нь коронавирусийн шинэ хувилбарын эсрэг бага нөлөө үзүүлж байгаа нь найдваргүй гэсэн үг биш” хэмээсэн юм. Их Британи Улсад дэлгэрсэн Өмнөд Африкийн мутациар халдварласан 147 тохиолдлыг илрүүлж, АстраЗенека вакциныг тарьсан гэх мэдээлэл бий. Гэвч дэлхий даяар ашиглаж буй коронавирусийн вакцинууд дотроос АстраЗенека вакцин коронавирусийн мутацийн эсрэг хамгийн бага нөлөө үзүүлээд байгаа юм.