Молтогчин гэх содон нэртэй, авьяаслаг залуу орчин үеийн хип хоп урсгалд хүч түрэн орж ирж байна. Тэрбээр Кино урлагийн дээд сургуулийг жүжигчин мэргэжлээр төгссөн. Өсвөр насны хүү байхаасаа хип хоп хөгжимд дурлаж, үеийн найзуудтайгаа хамтран дуу хийж эхэлсэн байдаг. Харин 2022 оноос “Erdene label”-д харьяалагдаж, илүү мэргэжлийн уран бүтээлч болохоор зэхэж эхэлсэн. Ингээд түүнтэй ярилцсаныг минь хүлээн авч уншина уу.

-Сайн байна уу. Та бага  наснаасаа урлагтай ойр байв уу?

                           -Эмээ минь намайг бага байхад “Молтогчин” гэж дууддаг байлаа.  Ойр дотнынхон минь жинхэнэ нэрээс минь илүүтэй хочоор дуудах болж хожим уран бүтээлийн нэрээ болгосон. Харин эцэг, эхээс өгсөн нэр минь  М.Мөнх-ирээдүй. Бага насандаа зураг зурах дуртай байсан. Үүний дараа тиктоник бүжиг бүжгэлдэг байлаа. Өсвөр насандаа америк хип хоп сонсож эхэлснээр энэ урсгалд дурласан даа. Ингээд бодохоор хүүхэд байхын урлагт ойр нэгэн байж.

-“Hot headed” дууг албан ёсны анхны дуу гэж хэлж болох уу?

                           -Сайн найзтайгаа нийлж, 2014 онд анхны дуугаа хийж байлаа. Бороотой өдөр найзынхаа гэр лүү алхаж очоод хийж байсан юм. Одоо эргээд бодоход чанар муутай санагддаг. Гэхдээ артист болох эхлэлийг минь тавьж өгсөн болохоор хайртай. Түүнээс хойш ажлынхаа хажуугаар жилдээ 1-2 дуу хийдэг байлаа. Уран бүтээлээ ажил болгож, бүх цагаа зарцуулж хийхээр яах аргагүй өмнөх бүтээлүүд гологдоод ирдэг юм билээ. “Hot headed” дууг албан ёсны чанартай, жинхэнэ уран бүтээлчийн зүгээс цацсан анхны танилцуулга дуу гэж хэлж болно оо. Энэ дууны клипийг хоёр сар судалж, бодож байж бүтээсэн.

-Сүүлийн үед ямар уран бүтээл дээр ажиллаж байна вэ?

                           -Дүрсжүүлэхээр бэлтгэж буй дуунууд нэлээн хэд байгаа. Би жаахан удаан бодож, чанартай уран бүтээл гаргах дуртай.  Аливаа уран бүтээлийг амьтай болгодог зүйл бол клип байдаг. Би сүүлийн жилүүдэд хариуцлагатай байж, хүмүүсийн надад итгэж буй итгэлийг мохоохгүй байх юм сан гэж их хичээдэг болсон. Тиймээс сонсогчдынхоо итгэлийг алдахгүй чанартай уран бүтээл гаргаж байх болно.

-Таны дуунуудыг сонсоод байхад хайрын дуу байхгүй юм билээ. Хайр бол мөнхийн сэдэв шүү дээ. Хайрын тухай дуу гаргах бодол бий юү?

                           -Одоо хайрын дуу хийж буй уран бүтээлч олон байна. Тэд нар дээр нэмэгдээд би хийх хэрэггүй. Харин сонсогчдод ямар төрлийн дуу дутагдаж байна, тэрийг л хийхийг зорьж байна.  Би саркастик хэв маягаар нийгмийн тухай, сэтгэл зүйн асуудлын талаар уран бүтээл хийх дуртай.

-Жүжигчний мэргэжлээрээ ажиллах бодол бий юү?

                           -Би нэг бие, нэг сүнсээрээ нэг л удаа амьдарна. Харин өөрийн оршин буй хугацаандаа олон зүйл хийж үзэхийн тулд жүжигчний мэргэжлийг сонгож байлаа. Хүүхэд байхын л сониуч, шинэ зүйл турших дуртай зан минь мэргэжил рүү минь хөтөлсөн. Илүү боловсорсон үедээ кинонд тоглоно гэж боддог доо.

-Урлагаас өөр хобби байдаг уу?

                           -Би ном унших дуртай, гэртээ номын сантай. Франц Кафка, Фёдор Михайлович Достоевскийн номыг жилдээ нэг уншдаг. Уншсан номоо дараа жил нь дахиад уншихад илүү өөрөөр ойлгогдож, харах өнцөг минь өөрчлөгдсөн байдаг даа.

-Хип хоп артист болохоор дууныхаа үгийг өөрөө бичдэг байх. Өөр төрлийн бичвэр бичдэг үү?

                           -Би хаа явсан газраа утасныхаа тэмдэглэлийг гаргаж ирээд  үг бичиж, холбож явдаг. Оюутан байхдаа богино хэмжээний зохиол, өгүүллэг бичдэг байлаа. Одоо бол жоохон төсөөрсөн байх.

-Сонсогчид анхны цомгийг нь хүлээж байгаа байх. Энэ ондоо багтаж гаргах уу?

                           -Хоорондоо уялдаа холбоотой дуунуудаа нийлүүлж, цомог гаргана. Тиймээс төлөвлөгөө гаргаж байгаад хийнэ. Ойрын хугацаанд хийх бодол байхгүй ээ.

-Ярилцлагын төгсгөлд хип хоп хөгжим сонсдог. Уран бүтээлч болохыг хүсэж байгаа хүүхдүүдэд бяцхан зөвлөгөө өгөөч?

                           -Уран бүтээлчид олшрох тусам илүү өрсөлдөөн үүсээд, сонсогчдод сонирхолтой болж ирнэ. Тэгээд цагийн аясаар шигшигдээд жинхэнэ чадвартай хүмүүс нь үлддэг. Тиймээс хүсэж байвал хийгээд үз, хичээсэн хүнд боломж үргэлж байдаг. Эхлээд маш сайн сонсогч болоорой.

Бид реппер Молтогчинтой энэ удаад цөөн хором ийн ярилцлаа.