Эрүүл мэндийн сайд Э.Батшугар, Боловсролын сайд Л.Энх-Амгалан, Монгол Улсын Ерөнхийлөгчийн ахлах зөвлөх, АУ-ны доктор, профессор Н.Хүрэлбаатар нар өнөөдөр /2026.09.21/ Анагаахын Шинжлэх Ухааны Үндэсний Их Сургуулийн Зүүн кампуст ажиллажээ. Энэ үеэр тэд АШУҮИС-ийн Монгол-Японы эмнэлгийн үйл ажиллагаа, эмнэлзүйн ур чадварын сургалтын төв, робот мэс заслын сургалтын төв, шинэ технологийн үзэсгэлэн, багшийн эрүүл мэндийг дэмжих төв болон эмнэлзүйн тасгуудын үйл ажиллагаатай танилцсан аж. Эрүүл мэндийн сайд Э.Батшугар энэ үеэр эрүүл мэндийн салбарын хамгийн үнэт хөрөнгө нь барилга, тоног төхөөрөмжөөс илүүтэй мэдлэг, ур чадвар, ёс зүйтэй хүний нөөц болохыг онцолжээ. Тэрбээр “Эмчийг зөвхөн танхимд бэлтгэх боломжгүй. Бодит өвчтөнтэй ажиллах, эмнэлзүйн шийдвэр гаргах, багаар ажиллах замаар мэргэжлийн ур чадвар төлөвшдөг” гэв.

   Мөн их сургуулийн эмнэлэг нь оюутнаас эхлээд резидент эмч, төрөлжсөн мэргэжилтэн хүртэл тасралтгүй суралцаж, хөгжих үндсэн орчин байх ёстойг тэмдэглэв. Дээд боловсролын тухай хуульд анагаах ухааны чиглэлээр сургалт явуулдаг их сургууль их сургуулийн эмнэлэгтэй байхаар заасан. Иймд Боловсролын яам, Эрүүл мэндийн яам болон анагаахын боловсрол олгож буй их, дээд сургуулиудын хамтын ажиллагааг цаашид бэхжүүлэх шаардлагатайг сайд онцоллоо.

Монгол-Японы эмнэлгийн сайн туршлагыг түгээн дэлгэрүүлнэ

   Монгол-Японы эмнэлэг нь Япон Улсын Засгийн газар, ЖАЙКА, Японы их, дээд сургууль болон эмнэлгийн байгууллагуудын хамтын ажиллагааны үр дүнд байгуулагдсан бөгөөд эмнэлгийн тусламж, үйлчилгээ үзүүлэхээс гадна сургалт, судалгааны чухал орчин болж байна. Тус эмнэлэгт эпилепси, гемофили, нойрны эмгэгийн төрөлжсөн төвүүд ажиллаж, зүрхний хэм алдагдал, тархины харвалт, сэргээн засах эмчилгээ, үений дурангийн болон робот мэс засал зэрэг өндөр ур чадвар, дэвшилтэт технологи шаардсан тусламж, үйлчилгээг хөгжүүлж байгаа аж. Мөн үйлчлүүлэгчийг дэмжих алба, орны менежмент зэрэг тогтолцоог хэрэгжүүлж байгаа нь өвчтөн эмнэлэгт хандахаас эхлээд оношилгоо, эмчилгээ хийлгэж, эмнэлгээс гарах хүртэлх тусламж, үйлчилгээний үйл явцыг илүү зохион байгуулалттай, хүн төвтэй болгоход чиглэж байна.

   Эрүүл мэндийн сайд Э.Батшугар шинэ технологи нэвтрүүлэх нь өөрөө эцсийн зорилго биш гэдгийг онцлоод, түүнийг эзэмшсэн мэргэжилтнийг бэлтгэх, үр дүнг судлах, сургалтад нэвтрүүлэх, цаашид бусад эмнэлэгт түгээн дэлгэрүүлэх нь их сургуулийн эмнэлгийн чухал үүрэг болохыг тэмдэглэжээ. Тэрбээр “Бидний зорилго зөвхөн эмнэлэг барих биш, тогтолцоо бий болгох. Зөвхөн мэргэжилтэн бэлтгэх биш, тасралтгүй хөгждөг мэргэжлийн орчин бүрдүүлэх. Зөвхөн шинэ технологи нэвтрүүлэх биш, түүнийг эзэмшсэн хүний нөөц, мэдлэг, судалгааны чадавхыг бий болгох” хэмээн тодотгожээ.

   Цаашид Эрүүл мэндийн яам, Боловсролын яам, АШУҮИС болон анагаахын боловсрол олгож буй их, дээд сургуулиуд их сургуулийн эмнэлгийн тогтолцоог бэхжүүлэх, сургалт, судалгаа, эмнэлзүйн тусламж, үйлчилгээг уялдуулах чиглэлээр хамтын ажиллагаагаа өргөжүүлэх юм.