Цаг үеийн нөхцөл байдалтай холбоотойгоор Нийслэлийн Онцгой комиссоос мэдээлэл өглөө.

        Энэ үеэр ЦУОШГ-ын дарга Л.Оюунжаргал “Өнөө, маргаашдаа нутгийн хойд хэсгээр усархаг дуу цахилгаантай аадар бороо орно. Ялангуяа, Хэнтий, Хөвсгөл, Архангайн уулархаг нутгийн хүмүүст ихээхэн хамааралтай. Уулархаг бүс нутагт аянга цахилгаантай аадар бороо орох магадлал харьцангуй өндөр байдаг. Өөрөөр хэлбэл, уулын жалга хонхор хотгор газруудад зусаж байгаа айлууд илүү болгоомжтой, анхааралтай байгаарай. Энэ сарын 7-нд баруун аймгийн нутгийн хойд хэсгээр, Төвийн аймгийн нутгийн ихэнх хэсгээр, зүүн аймгийн нутгийн зарим хэсгээр, 8-нд баруун аймгуудын нутгийн хойно, төвийн аймгийн нутгийн баруун хойд, зүүн аймгийн нутгийн зарим газраар, 9-нд баруун болон төвийн аймгийн нутгийн зарим газар, зүүн аймгийн нутгийн зүүн хэсгээр, 10-нд баруун аймгийн хойд хэсгээр, төвийн аймгийн нутгийн зарим газраар дуу цахилгаантай аадар бороо орно. Нутгийн өмнөд хэсгээр хур бороо бага байна” гэв.