Засгийн газрын мөрийн хөтөлбөрийн дагуу хавдрын мэс заслын эмчилгээ, хими эмчилгээ, хөнгөвчлөх эмчилгээний хүлээгдэл, бэрхшээлийг арилгах чиглэлд бодлогын өөрчлөлт хийж, хөрөнгө оруулалтыг нэмэгдүүлжээ.

      Энэ талаар Эрүүл мэндийн сайд С.Энхболд “Санхүүжилтын тогтолцоонд шилжсэнээр төр болон хувийн хэвшлүүд цөм эрүүл мэндийн даатгалаар санхүүжилт авдаг болсон. Ингэснээрээ Монгол Улсын иргэн хаанаас ч үл хамааран, хөдөө орон нутагт явж байсан ч эрүүл мэндийн тусламж үйлчилгээ авах боломж бүрдсэн. Үүний нэг нь хавдрын тусламж үйлчилгээ. Өнөөдөр бид Улсын I, II, III эмнэлэгт хавдрын тусламж үйлчилгээ үзүүлэх ком багажийг хүлээлгэн өгөх гэж байна. Мөн өмнө нь ганцхан Улсын гуравдугаар төв эмнэлэгт үзүүлдэг байсан зүрх судасны эмчилгээг үзүүлдэг байсан бол одоо нэг, хоёр, гуравдугаар эмнэлэг, бүсийн таван оношилгооны төв, Хэнтий аймагт зүрх судас болон хэвлийн хөндийн судасны мэс заслын оношилгоо, эмчилгээг хийдэг болсон. Эдгээр нь 2021 оны төсвийн тодотголоор эрүүл мэндийн салбарт санхүүжилт хийгдсэн. Үүний хүрээнд бодлогоор эдгээр аймгуудад аппарат, оношилгооны тоног төхөөрөмжийг суурилуулж өгсөн. Мөн давхар хүний нөөцийг сургаж, бэлтгэсэн байгаа юм.

     Мөн манай улсад нарийн гэдэсний оношилгооны дурангийн шинжилгээ төдийлөн хийгддэггүй байсан бол өнөөдрөөс Улсын нэг, хоёрдугаар эмнэлэгт нарийн гэдэсний оношилгооны иж бүрэн тоног төхөөрөмжийг хүлээлгэн өгөх гэж байна. Мөн  Улсын нэг, хоёр, гуравдугаар эмнэлэгт мэдрэлийн мэс заслын тоног төхөөрөмжийг хүлээлгэн өгөх гэж байна. Бид хамгийн гол нь хавдрын тусламж үйлчилгээний төвлөрлийг бууруулж, иргэдэд хүлээгдэл, чирэгдэл үүсгэхгүй байх талаар нь Эрүүл мэндийн яам сүүлийн жилүүдэд онцгой анхаарч, энэ ажлыг эхлүүлээд байгаа. Иймээс Хавдар судлалын төвд ганцхан хийгддэг байсан үзлэг оношилгоо, Улсын I, II, III эмнэлэг, зарим орон нутагт хийдэг болж байна. Тэгэхээр иргэд тухайн харьяалагдсан дүүрэг болон лавлагаа шатлалын эмнэлгээр хавдрын тусламж үйлчилгээ авах боломжтой боллоо. Мөн 2021 оны гуравдугаар сард санхүүжилт орсноор хувийн эмнэлэгүүд мөн тусламж үйлчигээ үзүүлдэг болсон. Өнөөдрийн байдлаар Интермэт, Гурван гал, Гялс зэрэг эмнэлэг хавдрын тусламж үйлчилгээ үзүүлдэг болсон байна. Мөн хими эмчилгээг тухайн эмнэлгүүд хийхээр нэвтрүүлээд, зарим эмнэлэг ашиглалтад орсон байна" гэв.