Монгол Улс ходоодны хорт хавдраар дэлхийд тэргүүлж байна. Ходоодны шарх нь хорт хавдрын суурь өвчлөл юм. Ходоодны шарх өвчнөөр өвчлөөд, эмчлүүлэхгүй гурваас таван жил болбол хавдар үүсгэх эрсдэлтэй. Намрын завгүй өдрүүд эхэлж, гадуур хооллох нь элбэг болж байгаа энэ үед ходоодны шархнаас сэргийлэх таван аргыг танд хүргэж байна.

1. Ходоодоо дурандуулах

    Ходоодоо жилд нэг удаа дурандуулах нь ходоодны өвчлөлөөс урьдчилан сэргийлэх хамгийн зөв арга юм. Хеликобактер бол ходоодны олонх өвчний суурь болдог. Монголчуудын 80 гаруй хувь нь хеликобактертай байгааг АШУҮИС-ийн Оюунчимэг багшийн судалгаагаар гарсан. Таван хүн тутмын дөрөв нь хеликобактерийн халдвартай байна гэсэн үг.

2. Эмийн зөв хэрэглээтэй байх

     Төрөл бүрийн эмийн замбараагүй хэрэглээ нь ходоодны үйл ажиллагаанд сөргөөр нөлөөлдөг. Тухайлбал, антибиотикийг эмчийн зааваргүй олон удаа хэрэглэснээр ходоодыг шархлуулах эрсдэлтэй. Тиймээс эмчийн заавраар эмээ зөв хэрэглэж сурах хэрэгтэй.

3. Зөв хооллолтын дэглэмтэй болох

    Хоолоо тогтмол цагт идэж, хэвших нь ходоодны шарх, өрөвслөөс хамгаалах чухал аргуудын нэг. Түүнчлэн, хуурсан шарсан хоол идэх болон гадуур хооллохоос зайлсхийгээрэй.

4. Хорт зуршлаас зайлсхийх

   Манай улсад хоёр эрэгтэй тутмын нэг, дөрвөн эмэгтэй тутмын нэг нь шууд болон дам байдлаар тамхи татдаг. Мөн нэг эрэгтэй хүн жилд 10 литр архи ууж байна гэсэн судалгаа байна. Гэтэл нэг удаагийн архины хэрэглээний стандарт 30 гр байдаг. Хорт зуршлаас зайлсхийж ходоодоо хамгаалаарай.

5. Стрессээ зөвөөр тайлж сурах

   Сүүлийн жилүүдэд стрессээс болсон ходоодны шарх, цоорол бий болж байгаа нь ирээдүйд ходоодны хорт хавдар үүсгэх шалтгаан болж байна. Стрессгүй амьдарна гэж байхгүй ч стрессээ зөвөөр тайлж сураарай.