ЭМДЕГ-ын ажилтнууд “Капитал” банкнаас хураагдсан байранд орсон талаар тус газрын Олон нийттэй харилцах хэлтсийн мэргэжилтэн Б.Оюунчимэгээс тодрууллаа.

  -Эрүүл мэндийн даатгалын сангийн өрөнд хураагдсан байранд ЭМДЕГ-ын ажилтнууд хямд үнээр орсон гэх асуудалд тайлбар өгөхгүй юу?

       -Баянзүрх дүүргийн 14  дүгээр хороонд байрлаж байгаа орон сууцыг хүлээн авсан. Манай байгууллагын хувьд тухайн орон сууцнаас 29 орон сууцыг өр төлбөрт хураан авсан юм. Бид Эрүүл мэндийн даатгалын мөнгөн хөрөнгийг Эрүүл мэндийн даатгалын санд буцаан байршуулах зорилготой байгаа юм. Энэ мөнгийг буцаан байршуулах мөн ажилчдынхаа нийгмийн асуудлыг хангах хүрээнд 29 байрнаас 81мкв-аас доош хэмжээтэй 19 орон сууцыг ипотекийн зээлээр ажиллаж байгаа албан хаагчдад худалдан борлуулсан. Үнэлгээний хувьд Авлигатай тэмцэх газар болон Эрүүгийн  цагдаагийн ерөнхий газраас хамтран сонгон шалгаруулсан. Үүний үр дүнд “Дано” гэсэн компани сонгосон. Тухайн үед буюу 2021 оны есдүгээр сард  үнэлгээ хийсэн. Энэ үнэлгээгээр тухайн байрны 1 мкв-ийн үнийн 263.0000 төгрөгөөр худалдан борлуулах үнэлгээ гаргасан. Үүний дагуу манай албан хаагчид, банкны  хууль ёсны журмын дагуу ипотекийн зээлд хамрагдаж 19 ажилтан хүсэлтээ өгсөн. Одоогийн байдлаар зургаан ажилтны  зээлийн асуудлыг эцэслэн шийдвэрлэсэн.

 -Ямар албан тушаалтай хүмүүс байранд орохоор болсон юм бэ?

          -Зээлийн шийдвэрийг нь эцэслэн шийдсэн зургаан албан хаагчид бүгд мэргэжилтэнгүүд. Өөрөөр хэлбэл, ямар нэгэн удирдах түвшний албан хаагч зээлд хамрагдаагүй байгаа. Байраа хүлээн авахад бэлэн болсон зургаан ажилтны тав нь мэргэжилтэн, нэг нь үйлчилгээний ажилтан байгаа. Цалингийн шатлалын хувьд төрийн үйлчилгээний болон төрийн захиргааны шатлалын дагуу цалин хөлстэй ажилчид авсан.

  -Мкв-д хувьд хэдэн мкв хүртэл хэмжээтэй байгаа вэ. Үйлчилгээний ажилтны цалингийн хувьд зээлийн шаардлага хангасан уу?

            -Банкнаас судалсны үр дүнд тухайн үйлчлэгч ганцаараа эсвэл хамтран зээлдэгчтэй байх эсэхийг, цалингийн 45 хувийн банк зээлд нь суутгахад боломжтой эсэхийг судалж, тухайн арилжааны банк энэ хүнд зээл олгох боломжтой гэж үзсэний үндсэн дээр байр шилжиж очсон.