Сүүлийн үед иргэдийн дунд түгээмэл гараад байгаа ханиадны талаар Нийслэлийн Эрүүл мэндийн газрын ахлах мэргэжилтэн Б.Баатарсүхээс тодрууллаа.

   Тэрбээр “Томуу, томуу төст өвчний А хүрээний өвчлөл хаврын саруудад үргэлжилж байна. Томуугийн өвчлөлийн оргил үе нь аравдугаар сараас арванхоёрдугаар сард тохиодог ч зарим жил хавар хүртэл үргэлжилдэг. Үүнийг хаврын томуу ч гэж нэрлэдэг. Тэгэхээр иргэдийн дунд гараад байгаа энэхүү ханиад нь томуугийн А хүрээний вирус байгаа юм. Түүнээс коронавирусийн өөр хувилбар биш. Энэ бол өмнө нь ч байсан хаврын ханиад. Энэхүү ханиадаар хүүхдүүд их өвдөж байна. Тухайлбал, өнгөрсөн долоо хоногийн тоон мэдээллээр,

25.7 хувь нь 0-1 насны хүүхэд, 29.5 хувь нь 2-4 нас, 19.1 хувь нь 5-9 насны хүүхдүүд эзэлж байна. Харин өвчлөлийн 6.9 хувийг 10-14 насны хүүхдүүд эзэлж байгаа дүн гарсан.

 Өөрөөр хэлбэл, өвчлөлийн 70 хувийг хүүхдүүд эзэлж байна. Тэр дундаа 2-4 насныхан эзэлж байна. Тэгэхээр хүмүүс урьдчилан сэргийлж, дархлаагаа дэмжих нь зүйтэй. Тэр дундаа хүүхдүүдийнхээ дархлааг дэмжиж, эрт унтуулж, утас, компьютероос хол байлгах нь зүйтэй. Энэхүү ханиад нь улирлын чанартай учир дулаарахад багасах төлөвтэй байгаа” гэв.